Bændablaðið - 16.11.2017, Síða 12
12 Bændablaðið | Fimmtudagur 16. nóvember 2017
Fyrirtækið Vallarnaut, sem flutt
hefur inn Solis dráttarvélar
frá Indlandi, hefur nú fengið
örlitla nafnbreytingu og heitir
Vallarbraut. Eru eigendur að
hætta nautaeldi sem þeir hafa
stundað um árabil og eru búnir að
taka að sér umboð fyrir tyrknesku
dráttarvélarnar Hattat.
Nafnbreytingin er að sögn Jóns
Vals Jónssonar framkvæmdastjóra
einungis til komin vegna breyttrar
áherslu í rekstri þar sem hætt verður
með nautaeldið en kennitalan
verður sú sama og hingað til. Þá
þurfi síður að útskýra nafnið fyrir
viðskiptavinum, en meginstarfsemin
er nú í kringum sölu á dráttarvélum
og ýmiss konar tækjum fyrir
landbúnað og verktaka.
Meiri breidd fæst með
Hattat
Ingvar Sigurðsson
sölumaður segir
að salan á Solis
vélunum frá Indlandi
hafi gengið mjög vel
og mikil aukning hafi verið
í sölu. Með umboði fyrir Hattat
dráttarvélarnar frá Tyrklandi verði
breiddin þó meiri auk þess sem
Hattat vélarnar séu enn einfaldari
og lausar við allan tölvubúnað og
stýringar sem oft vilja bila.
„Við vorum á Hvolsvelli á
viðburðinum Hey bóndi fyrir
skömmu. Þar kynntum við 102
hestafla Hattat vél sem fékk góðar
viðtökur. Eins og Solis vélarnar eru
Hattat ódýrar, en með þeim komust
við upp fyrir 90 hestafla stærðina.
Ég myndi segja að gæðastaðallinn
sé mjög svipaður í þessum vélum,
en í Hattat eru Perkins mótorar, en
verksmiðjurnar framleiða þá mótora
fyrir Breta. Þá er A-línan af Valtra
dráttarvélunum framleidd á sama
stað. Ég myndi því segja að Hattat
vélarnar séu kynslóð á undan Solis
hvað hönnun varðar, t.d. á húsi,
en sumir eru samt hrifnari af Solis.
Móðurfélagið framleiðir líka
íhluti fyrir bíla og flugvélar
„Móðurfélag Hattat heitir Hema
og framleiðir íhluti fyrir bíla og
flugvélar og fleira fyrir ólík fyrirtæki
um allan heim. Nafnið Hattat er
ættarnafn eigendanna sem hófu
framleiðslu undir eigin merki í
framhaldi af framleiðslunni fyrir
Valtra. Áður voru þeir að framleiða
fyrir Ford og hafa einnig framleitt
eldri týpur af Massey Ferguson fyrir
heimamarkað sem ekki stenst lengur
Evrópustaðla.
Í Hattat er notast við ýmislegt
úr Valtra, eins og framhásingu,
skiptingu og fleira. Þeir sem kynnt
hafa sér vélarnar segja að þarna sé
eiginlega um að ræða vél sem er
sambærileg Valmet dráttarvélunum
í kringum síðustu aldamót.“
Ingvar segir að margir sem
hrifnir hafa verið að einfaldleika
Solis dráttarvélanna séu jafnvel enn
hrifnari af Hattat. Þar er t.d. ekki
um að ræða Commonrail olíukerfi
og því engar tölvustýringar sem
geta truflað það. Sparneytnin verði
kannski ekki alveg jafn mikil, en
þeim mun auðveldara að eiga við
viðgerðir. Þá er verðið á nýrri
dráttarvél af Hattat gerð líka mun
lægra en gengur og gerist.
„Þú ert að fá 102 hestafla vél með
lyftikrók að aftan á 4,5 milljónir
fyrir utan virðisaukaskatt. Með
moksturstækjum að framan er verðið
í kringum 5,7 milljónir króna,“ segir
Ingvar.
Tæki sem hægt er að fá á Hattat
vélarnar koma frá framleiðanda á
Írlandi. /HKr.
FRÉTTIR
Fyrirtækið Vallarnaut heitir nú VALLARBRAUT:
Komið með umboð fyrir tyrknesku
dráttarvélarnar Hattat
Ingvar Sigurðsson sölumaður og Jón Valur Jónsson, framkvæmda-
stjóri Vallarbrautar. Mynd /HKr.
Mynd / MÞÞ
Stjórnir fjögurra félaga sauðfjárbænda:
Skora á Norðlenska að hækka
afuðaverð þegar í stað
– Tökum ákvörðun ef forsendur leyfa
„Það hefur ekki verið tekin nein
ákvörðun um breytingu á áður
útgefinni verðskrá. Komi til
breytinga þarf að liggja fyrir vissa
um að þær séu vegna bættrar stöðu
og að hún hafi þá raungerst. Slíkt
liggur ekki fyrir á þessari stundu,“
segir Ágúst Torfi Hauksson,
framkvæmdastjóri Norðlenska.
Stjórnir félaga sauðfjárbænda í
Eyjafirði, Suður-Þingeyjarsýslu og
sem og félög þeirra á Austurlandi hafa
skorað á stjórn, framkvæmdastjóra
og aðra stjórnendur Norðlenska að
hækka þegar í stað afurðaverð til
sauðfjárbænda.
Fram kemur í bréfi frá félögunum
að fyrirtækið hafi sýnt metnað
í vöruþróun og framsetningu,
innleggjendur þess framleiði
gæðavöru, ekkert í birgðastöðu
eins og hún blasti við í upphafi
sláturtíðar réttlæti svo afgerandi
lækkun afurðaverðs og því sé
óásættanlegt að rekstrargrundvöllur
lambakjötsframleiðslu sé að fullu og
öllu brostinn á svæðinu.
Greiðslufall og fjöldagjaldþrot
„Afleiðingarnar þarf vart að
tíunda; stórfellt hrun í greininni,
greiðslufall og fjöldagjaldþrot
sauðfjárbúa með tilheyrandi
byggðaröskun og harmleikjum
fjölda fjölskyldna. Slíkt hrun hefði
auk þess sterk neikvæð áhrif á
aðra framleiðendur á innlendum
kjötmarkaði og afurðafyrirtækin
sjálf“, segir í bréfi stjórnarmanna
fjögurra félaga sauðfjárbænda á
Norður- og Austurlandi.
Fyrirtækið standi með bændum
Skorað er á Norðlenska að
standa með sauðfjárbændum,
sýna metnað og taka ábyrgð
með því að hækka afurðaverð til
sauðfjárbænda þegar í stað. Ágúst
Torfi segir að stjórn og stjórnendur
Norðlenska muni fylgjast vel með
næstu vikur og mánuði og taka
ákvarðanir þegar og ef forsendur
leyfa. /MÞÞ
Forsendur veitingar nýliðunarstyrkja í landbúnaði:
Stigagjöf samkvæmt vinnureglum
Búnaðarstofu Matvælastofnunar
Í síðasta Bændablaði var greint
frá veitingu nýliðunarstyrkja
í landbúnaði sem voru veittir í
fyrsta sinn 13. október. Nokkrar
umræður sköpuðust meðal
bænda á samfélagsmiðlum um
forsendur styrkveitinganna, en
Matvælastofnun forgangsraðaði
umsóknum eftir stigagjöf sem
unnið var eftir. Jón Baldur Lorange,
framkvæmdastjóri Búnaðarstofu
Matvælastofnunar, segir að
þrír þættir hafi verið lagðir til
grundvallar stigagjöfinni.
Veitt var úr 130 milljóna króna potti,
annars vegar í samræmi við ákvæði
um nýliðunarstyrki í landbúnaði í
reglugerð um almennan stuðning í
landbúnaði og hins vegar vinnureglur
Búnaðarstofu Matvælastofnunar um
forgangsröðun umsókna.
Áhersluatriði Samtaka
ungra bænda
Jón Baldur segir að forgangsraðað
hafi verið í samræmi við ákvæði
fyrrnefndrar reglugerðar með vísun
til menntunar, jafnréttissjónarmiða
og eignarhlutar í búrekstrinum sem
nýliðunarfjárfestingin nær til. Þetta
hafi verið þeir þættir sem Samtök
ungra bænda lögðu áherslu á að yrðu
til grundvallar. „Við útfærðum síðan
sérstakar vinnureglur til að meta
þessa þætti til stiga, sem við kynntum
í Framkvæmdanefnd búvörusamninga
og birtum síðan áður en opnað var
fyrir umsóknir til að tryggja jafnræði
umsækjenda og fullt gegnsæi. Í
svarbréfum til allra umsækjenda
veittum við síðan upplýsingar um
stigagjöfina,“ segir Jón Baldur.
Vinnureglurnar kváðu á um,
að sögn Jóns Baldurs, að beitt yrði
svokölluðum jákvæðum mismun til
að tryggja að jafnréttissjónarmiðið
næði fram að ganga. Það þýddi
að nú þegar færri konur sóttu um
en karlar þá fengu þær fleiri stig.
Hann segir að vinnureglurnar um
forgangsröðun verði endurmetnar í
ljósi reynslunnar og unnið út frá nýrri
reglugerð um almennan stuðning
við landbúnað sem atvinnuvega- og
nýsköpunarráðuneytið gæfi út fyrir
næsta ár.
Spennandi tímar
framundan á Akri
Einn nýliðanna sem fengu styrki
er Linda Björk Viðarsdóttir á
garðyrkjubýlinu Akri í Blá skógar-
byggð. Þar býr hún með manni sínum,
Gunnari Þórðarsyni, og tveimur
börnum. „Við ræktum grænmeti eftir
lífrænum aðferðum með sjálfbærni
að leiðarljósi. Við ræktum undir gleri
í upphituðum húsum, erum með þrjú
gróðurhús, alls 2.000 fermetra,“ segir
Linda um búskapinn.
Foreldrar Gunnars hófu lífræna
ræktun á Garðyrkjustöðinni Akri árið
1991. „Gunnar ólst því upp í þessu
umhverfi og við keyptum stöðina
af þeim. Við höfum undanfarin ár
unnið við skrifstofu- og þjónustustörf
og fundum það að okkur langaði
frekar að eyða tímanum í að byggja
eitthvað upp, rækta eigin mat og hafa
sveigjanlegri vinnutíma,“ segir Linda
um ástæður þess að þau söðluðu um
og tóku við Akri.
Færanleg gróðurhús
Gunnar er menntaður þrívíddar-
og hreyfimyndahönnuður frá Norges
Kreative Faghøgskole. Einnig hefur
hann stundað nám við margmiðlun í
Danmörku. Linda er með BS-gráðu
í ferðamálafræði frá Universitetet
i Stavanger og stundar nú nám við
Landbúnaðarháskóla Íslands þar sem
hún er að læra lífræna matjurtaræktun.
Linda segir að það skipti miklu máli
fyrir þau að fá nýliðunarstyrkinn.
„Styrkurinn mun nýtast okkur vel
þegar kemur að rekstri, viðhaldi og
uppbyggingu garðyrkjustöðvarinnar,“
segir hún.
„Það eru spennandi tímar
framundan hjá okkur. Við erum að
vinna í að þróa og byggja færanleg
gróðurhús, fikra okkur áfram í
aquaponics [sameldi plantna og
fiska] og taka á móti fleiri hópum
til að sýna almenningi og áhugafólki
hvað fer fram í gróðurhúsum okkar,“
bætir Linda við um framtíðarsýnina
á Akri. /smh