Bændablaðið - 16.11.2017, Side 34

34 Bændablaðið | Fimmtudagur 16. nóvember 2017
Þegar blaðamaður Bændablaðsins
var staddur í Lególandi í Billund
í Danmörku á dögunum tók hann
eftir því hversu veigamikinn þátt
landbúnaður hefur í „litla landi“
garðsins þar sem sjá má glæsileg
líkön af húsum, heilu bæjunum,
farartækjum og mörgu fleiru sem
allt er byggt úr Legókubbum.
Áætla má að í litla landinu sé
búið að byggja landbúnaðartengd
kennileiti úr rúmlega tveimur
milljónum Legókubba.
Smiðurinn Ole Kirk Christiansen
byrjaði að framleiða tréleikföng í
nafni Lego árið 1934 og í kjölfarið
hófst þróun á Legókubbum en
markmið Ole var alltaf að framleiða
hágæðaleikföng sem hefðu gott
endingargildi. Nafnið kemur frá
dönsku orðunum „leg godt“, eða
leikið vel. Það var þó ekki fyrr en 13
árum síðar sem Ole byrjaði að gera
tilraunir á plastkubbum sem síðar
áttu eftir að verða hinir heimsfrægu
Legókubbar.
Kubbaverksmiðja tekur til starfa
Uppbygging kubbanna með hinum
smellanlega eiginleika kom til
sögunnar tveimur árum síðar, eða
1949, en það tók önnur níu ár að fá
einkaleyfi fyrir Legókubbum sem
við þekkjum í dag, eða árið 1958.
Það sama ár lést upphafsmaður Legó,
Ole Kirk Christiansen, úr hjartaáfalli
og fékk því aldrei að njóta vinsælda
þeirra. Sonur Ole, Godtfred, tók við
keflinu og framleiðsla á kubbum
sem hægt var að setja saman hófst
í verksmiðju í Billund í Danmörku.
Segja má að verksmiðjan hafi síðar
orðið hvati til þess að Lególandi var
komið á fót.
Nokkrir Legóskúlptúrar voru
settir fyrir utan verksmiðjuna sem
dró að fleiri og fleiri ferðamenn
til Billund ár hvert sem komu til
að líta skúlptúrana augum. Þegar
ferðamennirnir urðu fleiri en 20
þúsund á ári fékk Godtfred þá
hugmynd að gera eins konar safn
með skúlptúrunum til að sýna fram
á möguleika Legókubbanna og fyrsta
Lególandið varð til.
Ævintýraheimur úr
67 milljónum kubba
Árið 1968 var Lególand í Billund
opnað og þar má sjá alls kyns
hluti byggða úr Legókubbum,
allt frá vélknúnum farartækjum,
flugvélum, bílum, bátum og lestum
ásamt glæsilegum skúlptúrum. Í
garðinum hafa verið notaðir 67
milljónir Legókubba til að byggja úr
ýmislegt milli himins og jarðar til að
gera upplifun gesta ógleymanlega.
Við opnun garðsins fyrir tæpum 50
árum var hann 125.000 fermetrar
að stærð en í dag er hann helmingi
stærri. Nú er hann bæði tívolí- og
skemmtigarður í bland við mörg
glæsileg líkön af húsum og borgum
sem allt er byggt úr Legókubbum og
kallast litla landið innan garðsins.
Litla landið verður alltaf hjartað
í starfseminni þar sem garðurinn
byggðist út frá því.
Í dag eru starfræktir níu
Lególandgarðar í heiminum,
í Bandaríkjunum, Þýskalandi,
Bretlandi og í Danmörku.
Byggja upp betri landbúnað
Það fer ekki á milli mála að
landbúnaður skipar stóran sess í
starfsemi Lególands, það er að segja
í litla landi þess, og er mikil upplifun
að sjá hvernig þeim hefur tekist til
með að byggja úr kubbum ýmislegt
sem tengist sveitinni.
Þannig er Lególandgarðurinn
í Günzburg í Þýskalandi, sem
opnaður var árið 2002, umkringdur
sveitabæjum á alla kanta og er
sérstakt land innan garðsins sem er
tileinkaður lífinu í sveitinni og þá
sérstaklega kúabúskap.
Lególandgarðurinn í Flórída í
Bandaríkjunum á í sérstöku samstarfi
við landbúnaðaryfirvöld á svæðinu
til að kynna betur landbúnaðinn.
Eitt verkefnið kallast „Ferskt frá
gróðurhúsi í Flórída“ og á að
hjálpa börnum að skilja út á hvað
landbúnaður og ræktun gengur og
hvaðan maturinn kemur. Með þessu
móti ná landbúnaðaryfirvöldin að
kynna landbúnað fyrir milljón gestum
sem koma árlega í garðinn. Þetta
sýnir að hægt er að kynna landbúnað
og efla hann á margvíslega vegu og
hvað er betra en að hafa Legókubba
í hönd og byggja upp með þeim enn
betri landbúnað til framtíðar?! /ehg
Áætla má að í Lególandi í Billund í Danmörku sé búið að byggja landbúnaðartengd kennileiti úr rúmlega tveimur
milljónum Legókubba. Myndir / ehg