Bændablaðið - 10.10.2019, Síða 9

Bændablaðið | Fimmtudagur 10. október 2019 9
Landbúnaðarháskóli Íslands
úthlutaði nýverið úr doktorssjóði
skólans í fyrsta sinn. Tilgangurinn
með doktorssjóði skólans er að efla
Landbúnaðarháskóla Íslands sem
alþjóðlegan rannsóknaháskóla,
auka enn frekar þekkingu á
fræðasviðum náttúruvísinda,
auðlinda- og búvísinda á Íslandi
og gera efnilegum nemendum
kleift að stunda doktorsnám við
skólann.
Tveir styrkir voru til úthlutunar
og þá fengu þær Heiðrún Sigurðar­
dóttir og Jónína S. Þorláksdóttir.
Þess má geta að 11 nýjar umsóknir
um doktorsnám hafa borist
skólanum á árinu og er stór hluti þess
þegar samþykktur og fjármagnaður.
Það er mikill fengur fyrir skólann
að fjölga í hópi sérfræðinga sem
munu efla rannsóknir og nýsköpun í
þessum mikilvægu greinum og bera
með sér ferska strauma og nýjar
hugmyndir.
Erfðafræðilegur grunnur
gangtegunda íslenska hestsins
Doktorsverkefni Heiðrúnar ber
heitið Exploring the genetic
regulation of ability and quality
of gaits in Icelandic horses.
Markmið verkefnisins er að veita
innsýn í erfðafræðilegan grunn
gangtegunda íslenska hestsins;
hvaða þættir ráða eða hafa áhrif á
ganghæfni og gæði gangtegunda.
Í dag erum við einungis á
byrjunarreit þegar kemur að því
að greina erfðafræðilegan grunn
magnbundinna gangeiginleika.
Á sama tíma er ekkert hestakyn
í heiminum sem býr yfir jafn
umfangsmiklum og nákvæmum
svipfarsmælingum og íslenski
hesturinn. Þar gefst því stórkostlegt
tækifæri til að hefjast handa við
að vinda ofan af leyndardómum
erfðamengis íslenska hestsins á
markvissan hátt.
Heiðrún s tefni r að
sameiginlegri doktorsgráðu frá
Landbúnaðarháskóla Íslands
(LbhÍ) og Landbúnaðarháskólanum
í Svíþjóð (SLU). Leiðbeinendur
Heiðrúnar er hópur fræðimanna á
sviði erfðafræða og búfjárræktar, dr.
Susanne Eriksson, dósent við SLU,
dr. Gabriella Lindgren, prófessor
við SLU, dr. Marie Rhodin, dósent
við SLU, dr. Elsa Albertsdóttir
hjá Bændasamtökum Íslands
og dr. Þorvaldur Kristjánsson,
ábyrgðarmaður hrossaræktar og
gestalektor við LbhÍ.
Samþætting þekkingar
ólíkra hagsmunaaðila
Doktorsverkefni Jónínu ber heitið
Implementation and impact of
stakeholder engagement within a
new vegetation and soil monitoring
programme of Icelandic range­
lands. Markmið verkefnisins
er að kanna hvernig samvinna
og samþætting þekkingar ólíkra
hagsmunaaðila, m.a. vistfræðinga
og landnotenda í vöktun og mati
á gróður­ og jarðvegsauðlindum
beitilanda geti skapað betri grunn
fyrir sjálfbæra landnýtingu. Þá
verður skoðað hvernig brúa megi
bilið milli þeirra sem safna saman
þekkingu um ástand vistkerfanna
og þeirra sem taka ákvarðanir
um hvernig nýta eigi þessi sömu
vistkerfi. Verkefni sem tvinna
saman vísindalegar rannsóknir og
þátttökunálganir á sviði vöktunar
og sjálfbærrar landnýtingar eru í
dag af skornum skammti og mun
verkefnið því afla mikilvægrar
þekkingar sem mun nýtast áfram á
sviði þverfaglegra rannsókna. Auk
þess munu niðurstöður verkefnisins
nýtast beint inn í GróLindarverkefni
Landgræðslunnar, en rannsóknin
verður unnin í tengslum við það.
Jónína stefnir að sameigin legri
doktorsgráðu frá Landbúnaðar­
háskóla Íslands (LbhÍ) og Wagen­
ingen háskólanum (WUR) í
Hollandi. Leiðbeinendahópur Jónínu
er með breiðan fræðilegan bakgrunn,
sem hentar vel þverfaglegu eðli
verkefnisins. Þetta eru dr. Ása L.
Aradóttir, prófessor við LbhÍ, dr.
Annemarie van Paassen, dósent við
WUR, dr. Isabel C. Barrio, dósent við
LbhÍ og dr. Bryndís Marteinsdóttir
hjá Landgræðslunni. /VH
Landbúnaðarháskóli Íslands:
Fyrstu úthlutanir úr doktorsnámssjóði
Heiðrún Sigurðardóttir. Jónína S. Þorláksdóttir.
Mývetningar fara
í sund á Laugum
– Fá ókeypis rútuferðir
Mývetningum gefst áfram kostur
á að nýta sér ókeypis sundferðir
á Laugar, en sveitarfélagið bauð
upp á ferðir í sundlaugina á
Laugum á vorönn, einu sinni í
mánuði.
Alls voru farnar 5 ferðir
yfir tímabilið og nýttu sér
samtals 46 manns rútuferðir úr
Skútustaðahreppi að Laugum.
Heildarkostnaður við rútuferðirnar
var 250 þúsund krónur. Við bætist
kostnaður að upphæð 125 þúsund
krónur samkvæmt samkomulagi við
Þingeyjarsveit á ársgrundvelli um
aðgengi að sundlauginni.
Sveitarstjórn Skútustaðahrepps
samþykkti samhljóða að halda áfram
að bjóða upp á ókeypis sundferðir
í sundlaugina á Laugum einu sinni
í mánuði fram að áramótum, enda
rúmast það innan fjárheimildar
ársins. /MÞÞ