Bjarmi - 01.04.2021, Síða 4

| bjarmi | apríl 20214
RAGNAR GUNNARSSON
Hin ofsótta kirkja og
framtíðin:
Er trúfrelsið í hættu?
Í upphafi árs hvers færa kristniboðssamtökin
Opnar dyr (e. Open Doors) heimsbyggðinni
skýrslu sína um ofsóknir á hendur kristnu
fólki um víða veröld, svokallaðan World
Watch List (Heimsvaktarlistinn). 50 verstu
löndin eru skráð og það sæti sem hvert og
eitt skipar uppfært miðað við skýrsluna ári
fyrr. Með þessu vilja samtökin vekja athygli
á ofsóknum gegn kristnum mönnum og
reyna að sporna við þeim. Ekki veitir af því
það virðist ekki áberandi fréttaefni að kristnir
menn sæta ofsóknum víða um heim.
VANDI SEM BLASIR VIÐ
Samkvæmt skýrslu Open Doors sæta á
fjórða hundrað milljónir kristinna manna
ofsóknum af einhverju tagi eða rúmlega
10% þeirra sem telja sig kristinnar trúar.
Vesturlönd sleppa enn sem komið er en
sumir telja að smám saman sé þrengt að
kristnum gildum og þeim sem halda þeim
á lofti. Staðan geti því breyst á 10-20
árum enda eigi miklar breytingar sér stað
á ráðandi hugmyndafræði, grunngildum
og samfélaginu sem slíku. Helst er fundið
að því þegar menn eru fastheldnir á sviði
siðfræðinnar og ásakaðir um afturhaldssemi
en þegar fram í sækir er hætt við að
umburðarlyndið hverfi smám saman, einnig
þegar kemur að innihaldi trúarinnar og
trúariðkun, enda ekki allir sem vilja játa að
til sé algildur sannleikur á því sviði. Við vitum
hvernig samfélag okkar var og að miklu leyti
hvernig það er en takmarkað hvernig það
verður á komandi áratugum. Félagslegt
taumhald og frelsi einstaklinganna togast á.
Spurningin vaknar: Hvernig getum
við siglt áfram um lífsins sjó við þessar
aðstæður, bæði með okkar eigið samfélag
í huga og ekki síður með systur okkar og
bræður víða um heim sem þjást vegna
trúar sinnar? Hér á eftir er gerð grein
fyrir framsetningu þriggja einstaklinga á
vegum Lausannehreyfingarinnar sem lið
í undirbúningi fyrirhugaðrar ráðstefnu í
haust.1
TRÚFRELSI HLUTI MANNRÉTTINDA
Julia Doxat-Purser2 fjallar um mann-
réttindayfirlýsingu SÞ sem sé samin undir
áhrifum frá kristnu fólki sem aðstoðaði við
mótun hennar, enda hefst hún á því að
viðurkenna virði hvers og eins og jafnrétti.
Sú hugsun að maðurinn hafi sérstök réttindi
á rætur sínar í þeirri trú að við séum hvert
og eitt sköpuð í Guðs mynd og eigum rétt
á vernd og frelsi. Guð er því sá sem gefur
mannréttindi, ekki yfirvöld. En ábyrgð
yfirvalda er að gera gott og vinna að réttlæti.
En því miður ástunda ekki öll yfirvöld alltaf
það sem gott er og slíkt getur leitt af sér
mismunun og ofsóknir.
Doxat-Purser bendir á að trúfrelsi sé
hluti af grundvallarmannréttindum. Það
nái til allra, einnig fólks sem aðhyllist
veraldlega lífssýn eða heimsmynd,
að trúa því sem það vill og að haga
lífi sínu í samræmi við það. Í 9. grein
mannréttindayfirlýsingar EES segir að fólk
megi iðka trú sína opinberlega með öðrum