Bjarmi - 01.04.2021, Síða 8

| bjarmi | apríl 20218
Við lifum á tímum þar sem umræður
um hlutverk trúar í hinu opinbera lífi er
spennuþrungin og jafnvel erfið. Ekki er
alltaf auðvelt að koma því til skila hvað
það þýðir að lifa sem kristnir menn í
umhverfi sem virðist okkur andsnúið – og
verður kannski enn erfiðara ef við erum
virk. En við erum salt og ljós sem kallar
okkur til aðgerða.
AÐ TALA MÁLI HINNA OFSÓTTU
Michael Mutzner8 bendir á mikilvægi þess að
tala máli kristinna, ofsóttra manna þannig að
það efli kristinn vitnisburð okkar. Við trúum
því að Guð frelsi af náð fyrir trú og löngun
okkar er að sérhver maður lifi í samfélagi
þar sem hann hefur frelsi til að velja Jesú
Krist sem frelsara sinn. Við trúum á Guð
sem gefur frelsi og ábyrgð til að velja hann,
eða ekki, og gerum ráð fyrir afleiðingum af
vali hvers og eins. Samviskufrelsi og trúfrelsi
hafa því verið mikils metin af lifandi, trúuðu
fólki í aldanna rás, enda eðlilegt. Það er
réttur sem mikilvægt er að leggja áherslu á.
Á heimsvísu eru víða takmarkanir
fyrir kirkjulegu starfi. Við þurfum að koma
kristnum bræðrum og systrum til varnar
þar sem trúfrelsi er ógnað – og gera það af
krafti og djörfung. En allt gott má misnota.
Við sjáum stjórnmálamenn, flokka og
yfirvöld stíga fram og segja sig vera
verjendur trúfrelsis en nota það aðeins
til að þjóna eigin hagsmunum. Vegna
þess að við tengjumst sterklega frelsi og
trú verða fylgjendur mótmælendatrúar
enn frekar slíkri blekkingu að bráð. Ef
þessi framganga verður áberandi getur
hún hamlað fólki í að aðhyllast kristna
trú. Þar nefnir Muntzner þrennt sem við
getum gert til að styrkja trúfrelsið og
stundað málsvörn fyrir fagnaðarerindið
sem styrkir vitnisburð okkar og gerir hann
trúverðugan:
TRÚFRELSI ALLRA
Í fyrsta lagi að stunda málsvörn vegna
trúfrelsis allra – ekki bara kristinna manna.
Trúfrelsið er réttur allra og því óeðlilegt að
krefjast þess fyrir aðeins einn hóp, heldur
þurfum við að vinna að því fyrir alla. Í
yfirlýsingu WEA9 um trúfrelsi og samstöðu
með hinni ofsóttu kirkju frá 2008 segir:
„Við staðfestum málsvörn fyrir ofsóttu
kristnu fólki og þeim sem aðhyllast önnur
trúarbrögð. ... Réttur til trúfrelsis er fyrir alla
og ekki unnt að krefjast hans fyrir einn hóp
fram yfir aðra.“
Barátta fyrir trúfrelsi og mannréttindum
allra trúarbragða á sér guðfræðilega stoð.
Allir eru skapaðir í Guðs mynd, mannkyn
er ein fjölskylda, að vísu sködduð vegna
syndafallsins. Við berum ábyrgð á
náunganum, mannlegum systkinum. Það
gerum við í trú á að þau beri ábyrgð á
ákvörðunum sínum og vali gagnvart Guði.
Munur er á að tala máli trúfrelsis fyrir alla og
halda fram sannleika eigin trúar. Við getum
barist fyrir réttindum annarra án þess að
viðurkenna það sem þeir trúa á.
Slík umhyggja fyrir náunganum gengur
þvert á hugsun margra í heiminum sem
berjast aðeins fyrir sínum eigin rétti. Barátta
fyrir réttindum allra endurspeglar kærleika í
takt við eðli Guðs. Barátta fyrir trúfrelsi allra
er spámannlegt tákn og vitnisburður um
fagnaðarerindið meðal þjóðanna. Ef við
hugum aðeins að okkar eigin rétti erum
við ótrúverðug og göngum gegn þeirri
hugsun að allir séu skapaðir í Guðs mynd
og jafndýrmætir í augum hans.
ÖLL RÉTTINDIN
Annað atriði er að málsvörn fyrir
mannréttindum og lögum og reglum fer
saman og má ekki vera fyrir trúfrelsinu einu.
Við getum ekki valið sum mannréttindi og
horft fram hjá öðrum því öll tengjast þau og
BARÁTTA FYRIR TRÚFRELSI ALLRA ER
SPÁMANNLEGT TÁKN OG VITNISBURÐUR UM
FAGNAÐARERINDIÐ MEÐAL ÞJÓÐANNA