Borgfirðingabók - 01.12.2010, Qupperneq 211

211Borgfirðingabók 2010
Brunavarnalöggjöfin
Í lögum um brunavarnir7 kemur ábyrgð sveitarstjórna á „verðmætum“
fram, en þar segir að sveitarstjórn „beri ábyrgð á starfsemi slökkviliðs
og framkvæmd eldvarnareftirlits“ (10.gr) og að halda eigi skrá yfir
staði „þar sem eldsvoði getur valdið sérstakri hættu á manntjóni
eða umtalsverðu tjóni á umhverfi eða öðrum verðmætum“ (12.
gr). Þá kemur ábyrgð sveitarstjórna einnig fram í því að „á hverju
starfssvæði slökkviliðs skal liggja fyrir brunavarnaáætlun sem fengið
hefur umsögn Brunamálastofnunar og samþykki sveitarstjórnar“ (13.
gr).
Í brunavarnaáætlun svæðisins segir að „ráðandi áhætta“ í Skorradal
sé náttúruumhverfi og sumarhúsabyggðir. Fjallað er um nauðsyn þess
að í framtíðinni verði unnin áætlun „um rýmingu frístundabyggða á
svæðinu“ og að stefna skuli „að gerð áætlunar í samráði við lögreglu,
fulltrúa almannavarnadeilda Ríkislögreglustjóra og sveitarstjórnir á
svæðinu“.8 Samkvæmt framansögðu er brunavarnalöggjöfin býsna skýr
um ábyrgð sveitarstjórna, en því miður nær ábyrgðin fyrst og fremst
til þess að ákveðin gögn (skrá og áætlun) séu til um ástand mála, án
þess að gögnin tryggi á nokkurn hátt að farið sé eftir þeim af hálfu
sveitarfélaganna sjálfra.
Segja má að umræður og áhyggjur af hugsanlegu manntjóni sem
gróðureldur á frístundasvæði getur leitt til hafi orðið til þess að Skorra-
dalshreppur sá að við svo búið mátti ekki una. Ákveðið var að ráðast
í vinnu við að undirbúa gerð hættumats og viðbragðsáætlana vegna
gróðurelda og var sótt um stuðning til Fjárlaganefndar alþingis sem
tvívegis hefur greitt eina milljón til verkefnisins. Hreppurinn metur
þetta opinbera framlag ekki síst sem viðurkenningu á því að verkefnið
varði almannahagsmuni og telur afar mikilvægt að sú frumvinna sem
hér er farin af stað verði nýtt þannig að hugað verði að mögulegum og
samræmdum opinberum viðbrögðum gegn gróðureldavá á Íslandi. Við
þá vinnu þarf m.a. að leggja mat á staðaráhættu frístundahúsa með tilliti
til landnotkunar og skoða fjölmarga áhættuþætti ef miða á að heildstæðu
hættumati. Ljóst er að ákvörðun um viðmiðin er pólitísk og að hún þarf
að eiga sér lagastoð.
7 Lög nr. 75/2000
8 Brunavarnaáætlun Borgarbyggðar, Skorradalshrepps, Eyja- og Miklaholtshrepps, 2008. Sjá:
http://www.brunamal.is/brunamalastofnun/upload/files/brunavarnaaaetlanir/ brunavarnaaetlun__
borgarbyggdar_2008.pdf