Tímarit lögfræðinga - 01.12.2013, Qupperneq 4

350
sérfræðingar eru kallaðir til sem meðdómsmenn. Alkunna er að erf-
itt getur reynst og kostnaðarsamt að bæta úr mistökum sem gerð
eru á fyrsta dómstigi.
Ég hvet stjórnvöld til þess að taka aðbúnað héraðsdómstólanna
til gaumgæfilegrar skoðunar um leið og hugað er að öðrum þáttum
réttarkerfisins. Til skemmri tíma ætti að hverfa af braut niðurskurð-
ar, enda hefur starfsemi dómstólanna nú þegar verið skorin inn að
beini. Í kjölfarið ætti hins vegar að skoða kerfisbreytingar í ljósi
reynslunnar af störfum héraðsdómstólanna og dómstólaráðs undan-
farin ár.
Að lokum er óhjákvæmilegt að gera athugasemdir við viljayfir-
lýsingar borgaryfirvalda um að koma starfsemi héraðsdóms Reykja-
víkur fyrir annars staðar en í núverandi húsnæði á Lækjartorgi.
Samkvæmt fréttum telur borgarstjóri að starfsemi dómstólsins
stuðli ekki að auðugu mannlífi og að henni yrði betur komið fyrir
við Hlemm. Þá hefur forseti borgarráðs talað um að dómhúsið sogi
til sín orku og smiti engri gleði á torgið. Þessi sjónarmið verða seint
talin lýsa sérstaklega uppbyggilegu viðhorfi til réttarins.
Þótt staðsetning héraðsdóms Reykjavíkur við Lækjartorg sé að
mörgu leyti heppileg er hún að sjálfsögðu ekki heilög. Flutningur
dómstólsins verður hins vegar að grundvallast á þekkingu á þeirri
starfsemi (og mannlífi) sem fram fer í dómhúsinu, þörfum réttarins
og virðingu fyrir þessum stærsta dómstól landsins. Séu slík mál-
efnaleg sjónarmið látin ráða för má það raunar teljast fagnaðarefni
ef dómstóllinn fær nýtt dómhús á viðeigandi stað í borginni, sér-
sniðið að þörfum réttarins.
Hafsteinn Þór Hauksson