Bændablaðið - 20.07.2023, Síða 7

7Bændablaðið | Fimmtudagur 20. júlí 2023
Traust og gott samband barns og hests.
Reiðskólinn á Bjarnastöðum í Ölfusi leggur áherslu á að bæta jafnvægi
knapa og hests sem má gera á margan hátt. Á myndinni má sjá Kötlu
og Stjörnu stökkva yfir hindrun í ístaðslausri dýnu.
LÍF&STARF
Í síðasta vísnaþætti birti ég stöku eina eftir
ónefndan höfund sem jafnan orti undir
skáldanafninu „Sláni“. Engan grun hafði
ég um eiginlegt heiti þessa höfundar. Svo
berast mér þau gleðilegu tíðindi í bréfstúfi
frá Hallgrími Gíslasyni að hið rétta nafn
höfundar sé Sigurgeir Þorvaldsson,
sem starfað hafi um langt árabil sem
lögregluþjónn á Keflavíkurflugvelli.
Hirði hann Hallgrímur ærið þakklæti fyrir
upplýsingarnar og ekki síður hitt, hve
prúðmannlega hann fletti ofan af fávísi
minni. Það hefur mér nefnilega vitnast að
Sigurgeir Þorvaldsson var ágætlega þekktur
fyrir lipran kveðskap og birst talsvert af
kveðskap hans bæði í bókum og blöðum.
Til frekari staðfestu á kveðskap Slána
birtast hér þrjár liprar vísur meðsendar úr
bréfi Hallgríms Gíslasonar:
Alltaf líkist e og é,
einnig c-ið g-i.
Pínulítið p og b
par ei d-ið t-i.
H-in máttu telja tvö.
T-in reynast níu.
N-in gera samtals sjö.
S-in hálft í tíu.
Vísur þessar vinur kær
vitið forðum leyndust.
Fjórar línur fylltu þær,
fjórtán orðin reyndust.
Fyrir skömmu setti ég inn á samfélagsmiðil
mynd af glænýju strauborði og nýjum
straubolta og lét drýgindalega yfir þeim
tímamótum í gistiþjónustu okkar hjóna.
Björn Ingólfsson, hagyrðingur á Grenivík,
var einn þeirra fjölmörgu sem samglöddust
mér við þessi tímamót:
Nú er Geirhjörtur glaður
hinn gestrisni eðalmaður.
Með straujárni fín-
u strýkur sitt lín
„alsæll og uppveðraður“.
Mikið gladdist ég við þessa hlýlegu
athugasemd Björns, og falaði samstundis
þessa listilega gerðu limru til birtingar
í Bændablaðsþáttinn. Björn fagnaði
hugmyndinni heilshugar:
Það er endalaust undir mig hlaðið
að því er vandlega staðið.
Lífið er dans,
það er draumur hvers manns
að komast í Bændablaðið.
Til ungs manns kvað Jón Bjarnason í
Garðsvík:
Vaknar fjör í ungum æðum,
inn um gluggann sveinninn gáir:
Yngismær á Evuklæðum
alla sína fegurð tjáir.
Dýrleg eins og heiðið háa,
himnesk eins og stjörnuglitið,
jarðnesk eins og blómið bláa,
sem bíður þess að verða slitið.
Kunn er mörgum þessi myndræna vísa Jóns
frá Garðsvík:
Alltaf hef ég ístru þráð,
er hún loksins fengin.
Lausnarans fyrir læt ég náð
lykkju á buxnastrenginn.
Nú er nepjukuldi um Norðurland eftir
fádæma sumarblíðu. Því fer vel á vísu
Valborgar Guðmundsdóttur frá
Tungufelli í Breiðdal:
Kveða á skjáinn kuldi og regn,
kveina strá og runnar.
Nepja lífsins næðir gegn
um nylon tilverunnar.
Og Valborg á einnig þessa tvíræðu vísu:
Úti um dimma ágústnótt
ýmsar vættir sveima.
Börnin sofa blítt og rótt
-bóndinn ekki heima.
Umsjón:
Árni Geirhjörtur Jónsson
kotabyggd1@gmail.com
MÆLT AF
MUNNI FRAM
Reiðskólinn Hestasnilld er í Mosfellsbæ og býður
m.a. upp á stutt námskeið þar sem foreldrar og
börn eiga gæðastundir með hestinum. Krakkar
fara á bak og foreldri teymir, ásamt því að
hestarnir eru kembdir og knúsaðir.
Oft og tíðum myndast dýrmætt og einstakt samband milli
knapa og hests. Hér er hnáta úr reiðskólanum Hestalíf
sem er á félagssvæði hestamannafélagsins Spretts.
Á Ölvaldsstöðum í Borgarfirði rekur Guðrún Fjeldsted reiðskóla og hestaleigu. Aðal- áherslan eru útreiðar og að hafa gaman í náttúrunni með hestinum þar sem riðið er um í mismunandi landslagi til að auka enn meira jafnvægi knapanna. Myndir / Aðsendar
Reiðskólinn í Ysta-Gerði, Eyjafirði, gefur æskunni tækifæri
til þess að stunda hestamennsku á ársgrundvelli. Að skjóta
með boga er alltaf vinsælt. Hér má sjá Sif Sævarsdóttur
skjóta úr kyrrstæðu standandi á hestbaki en einnig er skotið
með boganum á ferð.
Reiðskóli Reykjavíkur býður upp á skemmtileg reiðnámskeið á sumrin
fyrir börn á aldrinum 6–15 ára. Markmiðið er að börnin skemmti sér vel
og hafi ánægju af því að kynnast hestamennskunni.
Reiðskólar
um land allt
Á sumrin kviknar líf í reiðskólum víðs vegar um landið þar sem börnum og unglingum
gefst tækifæri á að kynnast hestinum og hestamennskunni. Það færist þó í aukana að
reiðskólar séu starfandi allan ársins hring en mestur fjöldi barna sækir þó reiðskólana
yfir sumartímann. Sumir þátttakendurnir hafa aldrei áður komist í snertingu við
hestinn á meðan aðrir eru þaulvanir. Fyrir marga eru reiðskólarnir þeirra fyrstu kynni
við hestinn og sinna þeir því mikilvægu hlutverki í nýliðun innan hestamennskunnar.
Hér má sjá nokkrar vel valdar myndir úr starfi reiðskólanna víðs vegar um landið.
/þag