Skagfirðingabók - 01.01.2011, Qupperneq 134

SKAGFIRÐINGABÓK
stæðast um hana er að hún kenndi mér
að dansa á eldhúsgólfinu heima. Hún
giftist Tómasi Hallgrímssyni sem var
verslunarstjóri í vefnaðarvöruverslun
K.S. Þau áttu alltaf heima á Sauðár­
króki. Þau urðu fyrir þeirri miklu
raun að missa son sinn, en hann varð
fyrir bíl 1956 að mig minnir. Rósa
varð blind seinustu árin sem hún lifði
en hún er látin fyrir nokkrum árum
(2001).
Næstur í aldursröð barna Þorsteins
og Ingibjargar er Sigurður. Hann var
ætíð kallaður Siggi háseti. Hann var
mikið fyrir sjóinn. Siggi var mesti
myndarstrákur, vel í meðallagi stór,
herðabreiður og vel sterkur. Hann
gekk oftast með derhúfu. Hann
drukkn aði 16 ára. Hann var á Mb.
Glað með öðrum manni, Halldóri Sig­
urðssyni, að sækja rekavið út á Skaga.
Það þótti mikið þrekvirki að Halldór
skyldi ná honum um borð því að það
var fremur illt í sjóinn. En þegar hann
náði honum var hann örendur. Þetta
var hörmulegt slys og gleymist seint
þegar báturinn kom að landi með
flaggið í hálfa stöng.
Næstur honum var Haukur. Hann
var myndarlegur strákur og voru allar
stelpur skotnar í honum. Hann var
bráðmúsíkalskur og spilaði í hljóm­
sveit um áraraðir. Þá hafði hann mjög
góða söngrödd. Hann var lærður vél­
stjóri og vélvirki og vann við bíla­
viðgerðir í nokkur ár en var við sjó­
mennsku öðru hverju. Seinustu árin
var hann kennari við fjölbrautaskólann
á Sauðárkróki. Hann lést í bílslysi við
Akranesvegamót fyrir nokkrum árum
(1993). Kona hans var Helga Hannes­
dóttir.
Fjórða í röðinni var Erla. Hún var
jafnaldra mín, afar lagleg stúlka. Strax
í barnaskóla söng hún milliraddir í
flestum lögum. Hún varð landskunn
söngkona og komu út með henni
marg ar hljómplötur sem mikið voru
spilaðar í óskalagaþáttum útvarpsins.
Hún giftist kornung til Danmerkur
og hefur átt þar heima síðan.
Næst í röðinni er Gréta. Hún hafði
einnig góða söngrödd. Hún var afar
lífleg stelpa. Hún fór ung til Vest­
mannaeyja og giftist þar manni sem er
úrsmiður. Hann heitir Gísli Bryn­
geirsson. Hann var lamaður upp að
mitti en fór allra sinna ferða á hækjum.
Hann er bróðir Torfa Bryngeirssonar
stangarstökkvara. Hann var liðtækur
hljóðfæraleikari. Þau fluttust í Borgar­
nes eftir Vestmannaeyjagosið og áttu
þar heima í nokkur ár en fluttust síðan
aftur til Vestmannaeyja og hafa átt þar
heima síðan.
Yngstur er Rögnvaldur eða Valdi
Steina. Hann var talsvert baldinn ung­
lingur og fór mikið fyrir honum.
Hann hafði gaman af að gera at sem
kallað var. Þeir voru mikið saman
Kolli bróðir og hann. Hann fór ungur
að stunda sjóinn, reri á trillu ferm­
ingar árið sitt. Síðar fór hann á mótor­
bát frá Seyðisfirði, Ásþór. Með honum
á Ásþóri voru þeir Haukur bróðir hans
og Óskar bróðir minn. Er frá því að
segja að þeir lentu í sjávarháska
suðaustur af landinu og var á tímabili
óttast mjög um þá. Síðan lá leið Valda
suður á Keflavíkurflugvöll að vinna
þar og var, að mér skilst, ansi sukksamt
þar stundum. Síðar flyst hann til
Akraness þar sem hann hittir konu
sína, Dóru Engilbertsdóttur, og hafa
þau átt þar heima alla tíð og búnast
mjög vel.
134