Morgunblaðið - 09.04.1997, Blaðsíða 4

4 MIÐVIKUDAGUR 9. APRÍL 1997
MORGUNBLAÐIÐ
FRETTIR
Samningur við Mitsubishi um kaup á vélasamstæðu Nesjavallavirkjunar
Tímamót í virkjanasögxi
Reykjavíkurborgar
Morgunblaðið/Golli
FRÁ undirritun samnings Reykjavíkurborgar við Mitsubishi um kaup á vélasamstæðu fyrir Nesja-
vallavirkjun. Við borðið sitja Alfreð Þorsteinsson, formaður stjórnar Innkaupastofnunar, Ingibjörg
Sólrún Gísladóttir borgarsljóri og Takatoshi Ishida frá Mitsubishi Corporation í Tokyo.
Unglingsstúlkur stálu
bifreið og struku
Yeltu bíln-
um og fóru
í felur
SAMNINGUR vegna kaupa á véla-
samstæðu í Nesjavallavirkjun af
Mitsubishi Corporation var undirrit-
aður í Ráðhúsi Reykjavíkur í gær.
Samningurinn hljóðar upp á 1.336
miiljónir króna, sem eru 76,1% af
kostnaðaráætlun. Reykjavíkurborg
hefur farið fram á að kærumeðferð
hjá fjármálaráðuneytinu vegna kæru
umboðsmanns Sumitomo á máls-
meðferð í útboðinu verði hætt.
Ingibjörg Sólrún Gísladóttir borg-
arstjóri sagði eftir undirritunina að
þetta væri einhver stærsti samning-
ur um einstök innkaup sem Reykja-
víkurborg hefði gert og að með hon-
um væru mörkuð tímamót í virkjana-
sögu borgarinnar. Jafnframt væri
náð mikilvægum áfanga í atvinnu-
málum borgarinnar.
Raforkusala hefst 1. okt. 1998
Drög að samkomulagi milli
Reykjavíkurborgar og Landsvirkj-
unar lágu fyrir í desember sl. Gert
er ráð fyrir allt að 60 MW raforku-
vinnslu og stefnt að því að afhending
raforku frá fyrri 30 MW vélasam-
stæðunni hefjist 1. október 1998 og
frá þeirri síðari 1. janúar 1999. Fyrst
um sinn fer öll orkan til stóriðju en
1. mars 2001 hefst salatil Rafmagn-
sveitu Reykjavíkur og frá 2008 til
2018 skiptist orkusalan til helminga
milli Rafmagnsveitunnar og stóriðju.
Umsókn um virkjanaleyfi er nú til
meðferðar í iðnaðarráðuneytinu og
standa vonir til þess að það fáist
innan tíðar. Jafnframt þessu er unn-
ið að stækkun varmaorkuversins á
Nesjavöllum úr 150 MW í 200 MW
og eru áætluð verklok þess hiuta í
okt. 1997.
Tilboð í byggingu nýs stöðvarhúss
að Nesjavöllum voru opnuð 2. apríl
sl. og átti Ármannsfell hf. lægsta
tilboðið, 347.968.000 kr., sem er um
74% af kostnaðaráætlun. Þá voru
opnuð tilboð í 132 kV rofabúnað
virkjunarinnar og var iægsta tilboðið
frá Elin Hoec High Voltage,
62.150.829 kr. en kostnaðaráætlun
var 105.000.000 kr. Yfirferð tilboð-
anna er ólokið. Að sögn Aifreðs
Þorsteinssonar, formanns stjórnar
Innkaupastofnunar Reykjavíkur-
borgar, hefjast framkvæmdir við
stöðvarhúsið í apríllok.
Deilt um lögsögu
fjármálaráðuneytisins
Borgarstjóri benti á að jafnt til-
boðin í stöðvarhúsið sem og í véla-
samstæðuna gæfu ekki tilefni til að
óttast þá þenslu sem spáð hefur
verið. „Ef þensluástand væri komið
værum við væntanlega að sjá tals-
vert hærri tölur og þ.a.l. dýrari virkj-
un og ekki eins arðbæra og við get-
um gert okkur vonir um nú.“
Eftir að fyrir lá tillaga frá Inn-
kaupastofnun Reykjavíkurborgar
um að taka tilboði frá Mitsubishi
kærði umboðsmaður japanska fyrir-
tækisins Sumitomo, sem átti lægra
tilboð í vélasamstæðuna, málsmeð-
ferðina til fjármálaráðuneytisins og
hefur kærunefnd útboðsmála málið
nú til athugunar. Deilt hefur verið
um hvort íjármálaráðuneytið hafi
lögsögu í málinu.
„Að því gefnu að fjármálaráðu-
neytið hafi yfirleitt lögsögu í málinu
- sem við teljum raunar ekki - þá
hefur það lögum samkvæmt rétt til
að stöðva framkvæmdir fram að
þeim tíma þegar samningur er kom-
inn á milli bjóðanda og verkkaupa,
en eingöngu fram að þeim tíma,“
segir borgarstjóri. „Eftir að komið
er að mati á tilboðum er það ekki
ráðuneytisins að skipta sér af því,
ráðuneytið getur aldrei sagt verk-
kaupa að hann skuli taka einu til-
boði fremur en öðru.“
Á hinn bóginn segir borgarstjóri
ljóst að menn eigi rétt á að sækja
mál sín fyrir dómstólum, telji þeir
að á sér sé brotið, en þá eigi að
fara eftir hefðbundnum dómstóla-
leiðum en ekki gegnum fjármála-
ráðuneytið. í versta falli gæti borgin
þurft að greiða fjársektir, sem að
mati borgarstjóra næmu þeim kostn-
aði sem bjóðandi hefur haft af því
að senda inn tilboðið.
ÞRJÁR unglingsstúlkur, tvær af
meðferðarheimilinu Bakkaflöt í Lýt-
ingsstaðahreppi í Skagafirði og ein
sem dvaldist að Laugahvammmi á
sama stað, struku á mánudagskvöld
og hafa verið í felum síðan. Þær
tóku bíl heimilisins traustataki
nyrðra en för þeirra endaði utan
vegar skammt frá Borgarnesi. Það-
an komust þær til Reykjavíkur og
leitar lögreglan þeirra nú.
Mikið skemmd og mannlaus
Snemma á mánudagsmorgun til-
kynnti starfsmaður á vistheimilinu
um hvarf stúlknanna og bifreiðarinn-
ar, og var lögreglan á Blönduósi beð-
in um að svipast um eftir þeim og
bílnum. Síðdegis sama dag tilkynnti
bifreiðarstjóri hjá Sæmundi í Borgar-
nesi um bifreið er lægi mikið skemmd
og mannlaus utan vegar í Borgar-
firði. Kom í ljós að um bifreið vist-
heimilisins var að ræða.
Á mánudagskvöld var óskað eftir
að auglýst væri eftir stúlkunum og
leiddi sú eftirgrennslan í ljós að stúlk-
urnar höfðu farið með Akraborginni
til Reykjavíkur. Hafði farþegi þar
greitt fyrir þær fargjaidið, þar sem
þær voru illa á sig komnar, kváðust
hafa lent í umferðarslysi en lögreglan
á staðnum ekki viljað liðsinna þeim.
Aðfaranótt þriðjudagsins handtók
lögreglan í Reykjavík stúlku í húsi
á Þórsgötu sem hefur staðið mann-
laust og verið athvarf fyrir útigangs-
fólk um nokkurt skeið. Stúlkan er
vinkona einnar þeirra sem struku
af Bakkaflöt.
Neitaði að segja frá
Við yfírheyrslur kvaðst hún vita
að vinkona sín hefði komist til borg-
arinnar ásamt stöllum sínum og hefði
hún meiðst á baki þegar bifreiðin, sem
þær stálu valt. Hún sagði að vinkona
sín hefði sofnað við stýrið og velt
bifreiðinni. Ekki viidi hún segja hvar
vinkonan væri niðurkomin og gisti
hún í fangageymsium í fyrrinótt.
Stúlkurnar þijár sem struku eru
frá Reykjavík. Tvær þeirra eru sex-
tán ára en sú þriðja fimmtán ára.
Islensk stúlka yngsti frambjóðandi í
sveitarstjórnakosningum á Grænlandi
Finnst gaman að berjast
TUTTUGU og fimm ára íslensk stúlka,
Inga Dóra Guðmundsdóttir, hefur verið í
framboði fyrir grænlenska flokkinn Sium-
ut í bæjar- og sveitarstjórnakosningum
sem haldnar voru á Grænlandi í gær. Hún
var yngsti frambjóðandinn í kosningun-
um, og var úrslita að vænta seint í gær-
kvöldi eða í morgunsárið.
Inga Dóra bauð sig fram í Nuuk, þar
sem um 13 þúsund manns búa, en kosning-
ar fara þannig fram að ekki eru haldin
prófkjör, heldur er frambjóðendum list-
anna raðað í stafrófsröð. Kjósendur velja
síðan einn frambjóðanda og sá sem fær
flest atkvæði er efstur á lista flokks síns.
Nú verður hins vegar í fyrsta sinn leyfi-
legft að greiða eingöngu flokki atkvæði
sitt, treysti menn sér ekki til að gera upp
á milli frambjóðenda. Fjórir flokkar bjóða
sig fram í Nuuk og er annar Islendingur
þar i framboði, Árni Guðnason smiður,
fyrir Atassut-flokkinn. íslendingarnir
tveir hafa þó ekki att kappi saman í kosn-
ingabaráttunni, sökum þess að Árni hefur
verið fjarverandi.
Var meinað að fara í framboð
Inga Dóra er nemandi í háskólanum í
Nuuk og hefur búið í Grænlandi með stutt-
um hiéum um þrettán ára skeið. Hún er
íslenskur ríkisborgari og er óheimilt að
bjóða sig fram til landsþingsins af þeim
sökum, en vegna þess hversu lengi hún
hefur búið í landinu má hún bjóða sig
fram í sveitarstjórnakosningum. Hún
þurfti þó að beita hörðu til að fá því fram-
gengt.
„Baráttan er búin að vera hörð og ekki
síst hjá mér, því ég hafði aðeins fjóra
daga til framboðsins. Mér var stillt upp
af flokknum en þegar kjörskráin kom
fram 18. mars, var ég ekki á henni. Þrem-
ur dögum seinna var mér sagt að ég
gæti ekki farið í framboð því ég hefði
ekki búið nægilega lengi í landinu sam-
fellt. Þá fór ég auðvitað með málið fyrir
heimastjórnina og 2. apríl tóku þeir
ákvörðun um að ég mætti bjóða mig fram,
þannig að tíminn hefur verið af skornum
skammti," segir Inga Dóra.
Útlend nöfn eru sjaldséð sjón á fram-
boðslistum á Grænlandi, að sögn Jens
Bronden, ritstjóra Gronlandsposten. Þrír
útlendingar bjóða sig fram í kosningunum
nú, Árni, Inga Dóra og einn Færeyingur.
Enginn Dani er í framboði þar.
Raunar segir Bronden Grænlendinga
ekki líta á Ingu Dóru sem útlending,
móðir hennar sé grænlensk, Benedikta
Þorsteinsson ráðherra í landsstjórninni,
hún tali grænlensku og búi í Nuuk. Inga
Dóra kveðst ætla að sækja um danskan
ríkisborgararétt í náinni framtíð til að
geta boðið sig fram á landsvísu 1999. Hún
hefur um eins árs skeið verið formaður
ungliðahreyfingar Siumut-flokksins í
INGA DÓRA í flugfreyjubúningi Flug-
leiða, en hún sótti námskeið á vegum
fyrirtækisins hér á iandi fyrir skömmu.
Nuuk og hafa samherjar hennar þar lagt
dijúgt af mörkum til að tryggja henni
brautargengi.
Tók tæknina í þjónustu sína
Meðal annars hefur veggspjöldum
henni til stuðnings verið dreift sem víðast
og auglýsingum útvarpað, en öðrum fram-
bjóðendum hugkvæmdist ekki að beisla
tæknina á þennan hátt.
Mikið er í húfi og róðurinn þungur,
enda bjóða sautján manns fram fyrir
Siumut-flokkinn í Nuuk, þar af 3-4 ung-
menni sem eru í framboði í fyrsta skipti.
Álíka margir eru í framboði fyrir hina
flokkana. Siumut-flokkurinn, flokkur
jafnaðarmanna, hefur verið í stjórn frá
fyrstu þingkosningunum árið 1980. Hann
er með meirihluta í Nuuk, og borgarstjór-
inn, Agnethe Davidsen, er úr Siumut.
Atassut er fijálslyndur flokkur og á tvo
af sex fulltrúum í heimastjórninni. Þriðji
flokkurinn, Inuit Ataqatgiit, er til vinstri
við hina tvo.
„ Allir flokkarnir vilja að tekið sé á
húsnæðisvandanum í Nuuk, sem er mjög
slæmur, en einnig eru barnaskólarnir
mikið hitamál enda of smáir og þarfnast
lagfæringa. Þá er tekist á um hvernig
tómstundastarfi fyrir börn og unglinga
verður háttað. Fólk kýs frekar persónur
en flokka, þá frambjóðendur sem það
treystir og það má greina mikinn vilja til
breytinga og að reyna nýtt fólk. Siumut-
flokkurinn er við völd í Nuuk og spurning-
in er hvernig atkvæðin falla,“ segir Inga
Dóra, þegar Morgunblaðið ræddi við hana
í gærdag, en kjörstöðum átti að Ijúka
klukkan 20 að staðartíma.
Vill vekja unga fólkið
„Nuuk er þakinn veggspjöldum og
stemmningin er svo góð að halda mætti
að jólin væru komin. Ég skemmti mér
konunglega, enda finnst mér gaman að
rífa kjaft þyki mér eitthvað þess virði að
beijast fyrir því eða gegn. Ég vil að yngri
kynslóðin vakni betur og verði sjálfstæð-
ari, því að til að þjóðin geti orðið sjálfstæð
þurfa einstaklingarnir að vera það.“