Morgunblaðið - 15.11.2002, Qupperneq 61

FÓLK Í FRÉTTUM
MORGUNBLAÐIÐ FÖSTUDAGUR 15. NÓVEMBER 2002 61
MONSTER eða No Such Thing er
ævintýri, skrímslamynd, en þó ekki
hefðbundin sem slík því hún er líka
býsna dæmigerð Hal Hartley-mynd.
Sem þýðir að hún fjallar eins og fyrri
myndir hans um mannleg samskipti
og er nett háðsádeila á firringu nú-
tímans. Monster var að stórum hluta
tekin á Íslandi sumarið 2000, af þess-
um virta bandaríska kvikmynda-
gerðarmanni, nánar tiltekið á
Reykjanesi, í Hvalfirði og á höfuð-
borgarsvæðinu en hún var framleidd
að hluta af Friðriki Þór Friðrikssyni
og Íslensku kvikmyndasamsteyp-
unni hans og hlaut styrk úr Kvik-
myndasjóði Íslands.
Auk íslenskra leikara á borð við
Baltasar Kormák, Ingvar E. Sig-
urðsson og Björn Jörund Frið-
björnsson er meðal erlendu leikar-
anna Sarah Polley sem leikur unga,
saklausa fjölmiðlakonu sem send er
út af örkinni alla leið til afskekkts
lands í norðri til að hafa upp á
skrímslinu ógurlega. „Sagan er fal-
leg og mér þótti snjallt af Hartley að
nota ævintýrahefðina, minnið um
Fríðu og Dýrið, í ádeilu á samfélagið
og samskiptaörðugleika fólks,“ sagði
Polley í samtali við blaðamann vorið
2001, stuttu eftir að myndin var klár.
„Ég heillast líka alltaf að klikkuðum
sögum eins og þessari.“
Polley er 23 ára gömul en þrátt
fyrir ungan aldur hefur hún leikið í á
annan tug mynda en ferill hennar
hófst þegar hún var 6 ára gömul.
Hún hlaut mikið lof fyrir frammi-
stöðu sína í myndum landa hennar
Atoms Egoyans, Exotica (’94),
Sweet Hereafter (’97) og Davids
Cronenbergs eXistenZ (’99) en auk
þeirra var hún m.a. í Go (’99). Hér á
landi er hún þó eflaust kunnust fyrir
að hafa leikið hana Söru litlu Stanley
í framhaldsþáttunum hugljúfu Leið-
inni til Avonlea sem sýndir voru all-
lengi í Sjónvarpinu fyrir nokkrum
árum. Þrátt fyrir ótal gylliboð um að
leika í Hollywood-stórmyndum hef-
ur hún haldið sig við minni myndir,
gerðar af sjálfstæðum kvikmynda-
gerðarmönnum á borð við Hartley
enda þykir hún með eindæmum
djörf og leitandi ung leikkona.
Þau hafa séð þáttinn!
„Ég verð að hafa fulla trú á þeim
myndum sem ég leik í og ekki síður
leikstjórunum sem mér stýra. Það
fyllir mig stolti að hafa leikið í Hal
Hartley-mynd.“
Polley viðurkennir fúslega að
þrátt fyrir að hafa leikið í nokkrum
mætum myndum þá sé hún enn
þekktust fyrir hlutverk sitt í Leið-
inni til Avonlea. „Það gerist enn að
fólk stoppar mig úti á götu vegna
þáttanna. Það er samt eitthvað það
undarlegasta sem ég hef lent í þegar
ég kom til þessa framandi lands, Ís-
lands, fór út að borða í fyrsta sinn og
það fyrsta sem þjónustustúlkan
sagði var: „Hei, ert’ ekki stelpan úr
Leiðinni til Avonlea??“ Ég bara sat
agndofa og hugsaði með mér: „Nei,
það getur ekki verið, Sarah! Þau
hafa séð þáttinn!!!“ Ég trúði því
varla þegar mér var síðan sagt að
þátturinn hefði verið vinsæll á Ís-
landi. Það var það eina við landið
sem olli mér vonbrigðum. Allt hitt
var svo fullkomið.“
Íslenskar kjarnakonur
Polley var við tökur hér á landi í
tvo mánuði og segist hafa notið dval-
arinnar út í ystu æsar: „Þetta er í
sannleika sagt eitt eftirminnilegasta
skeið ævi minnar. Mér leið allan tím-
ann eins og ég væri heima hjá mér og
hef aldrei fundið svo sterkt fyrir
þeirri tilfinningu. Ég virðist eiga
mjög gott skap með Íslendingum.
Allavega þótti mér mjög þægilegt og
auðvelt að umgangast þá.“
Polley segist hafa tengst sérstak-
lega íslensku konunum sem unnu við
tökur á myndinni og eignast góðar
vinkonur í þeim hópi. Hún telur ís-
lenskar konur þær „þroskuðustu,
sterkustu, sjálfsöruggustu og klikk-
uðustu“ sem hún nokkurn tíma hefur
kynnst og segir ungar konur frá sín-
um heimkynnum geta lært heilmikið
af þeim. „Hvergi hef ég upplifað ann-
að eins sjálfstæði hjá ungum konum.
Eina sem virðist vera ætlast til af
þeim er að þær séu alltaf þær sjálfar
og enginn gerir þær kröfur að þær
lagi sig að einhverjum fyrirfram
ákveðnum þörfum samfélagsins.
Kristallaðist þetta t.d. í viðhorfum ís-
lenskra kvenna til kynlífs. Það er
eins og þær hafi öðlast miklu meira
frelsi til að vera hreinskilnar og hisp-
urslausar, frelsi til að geta fullnægt
sínum þörfum en ekki einhverra
annarra. Íslenskar konur, eða þær
sem ég kynntist, eru kjarnakvendi
sem ég lærði heilmikið af. Þær
kenndu mér t.d. að vera ekkert að
eyða orku í fólk sem engan áhuga
hefur á að eyða orku í mann sjálfan.“
Polley segir Íslandsdvölina stuttu
hafa breytt sér heilmikið sem mann-
eskju, gætt sig auknu sjálfstrausti.
„Maður fær engin stig fyrir að vera
feimin og lítil í sér á Íslandi,“ segir
hún og hlær.
Sarah Polley hefur lítið leikið síð-
an hún lék Fríðu á móti Dýrinu eða
réttara sagt Skrímslinu. Ástæðan er
sú að hún stundar nú nám í kvik-
myndagerð, hefur meiri hug á að
verða bak við tökuvélarnar en fyrir
framan þær í framtíðinni. Hún hefur
þegar gert einar fjórar stuttmyndir
sem vakið hafa þó nokkra athygli í
heimalandi hennar þannig að það
hefur svo sannarlega ræst vel úr
henni Söru litlu í Avonlea.
„Hei, ert’ ekki stelpan
úr Leiðinni til Avonlea?“
Í dag er frumsýnd í
Háskólabíói bandarísk-
íslenska kvikmyndin
Monster sem framleidd
var af Friðriki Þór Frið-
rikssyni og Francis
Ford Coppola. Skarp-
héðinn Guðmundsson
ræddi við aðalleikkon-
una, hina kanadísku
Söruh Polley. Sarah Polley ber íslenskum kynsystrum sínum vel söguna.
skarpi@mbl.is
Sarah Polley leikur aðalkvenhlutverkið í Skrímslinu