Morgunblaðið - 04.09.2003, Blaðsíða 22

LISTIR
22 FIMMTUDAGUR 4. SEPTEMBER 2003 MORGUNBLAÐIÐ
TVEIR karlmenn á þrítugsaldri eru að verða
fremur vonlausir um að ná sér í kvenmann. Eft-
ir að hafa farið erindisleysu á skemmtistaðina
hverja helgina eftir aðra eru þeir nú staddir á
krossgötum og gera upp við sig samskipti sín –
eða öllu heldur samskiptaleysi – við konur.
Þetta er inntak leikritsins Ráðalausir menn
sem verður frumsýnt í Tjarnarbíói í kvöld kl.
20. Höfundurinn er nýr á leiklistarsviðinu, Sig-
uringi Sigurjónsson, og segir hann að upphaf-
lega hafi þetta verið smásaga sem hann síðan
færði í leikritsform eftir að hafa ráðfært sig við
félaga sinn Sigurð Eyberg leikara.
Verkið var frumflutt í fyrravetur af Leik-
félagi Keflavíkur í leikstjórn Siguringa sjálfs
við góðar viðtökur en hefur nú verið tekið til
endurskoðunar og enduruppsetningar með at-
vinnuleikurum og atvinnuleikstjóra við stjórn-
völinn.
Höfundurinn segir að einhverjir hafi lýst
verkinu sem „Beðmál í borginni frá sjónarhóli
karlmannsins“ en ég vona reyndar að þetta risti
aðeins dýpra.“
Leikarar í sýningunni eru tveir, þeir Sig-
urður Eyberg og Jón Páll Eyjólfsson. Leikstjóri
er Ingólfur Níels Árnason. „Við erum allir af
Suðurnesjunum og höfum þekkst í mörg ár.
Strákarnir voru allir í Leikfélagi Keflavíkur áð-
ur en þeir fóru í leiklistarnám erlendis. Sig-
urður og Jón Páll til London og Ingólfur í leik-
stjórnarnám til Ítalíu.“
Siguringi segir að karlarnir tveir í leikritinu
séu óframfærnir og ofurnærgætnir menn. „Þeir
eru svolítið svekktir yfir að því að þeir fái ekk-
ert af því sem er í boði. Þeim finnst of margar
ágætar konur fara í hundskjaft. Þeir spyrja í
ráðaleysi sínu hvort konur viti nokkuð hvað
þeim er fyrir bestu. Þeir velta konum mikið fyr-
ir sér og reyna að komast að því hvernig þær
hugsa. Áhorfendur fá að heyra og sjá hvernig
þessi tegund af karlmönnum talar og hugsar.
Það var greinilegt af viðbrögðum kvenna sem
komu á sýningunni í Keflavík að þeim þótti
þetta mjög fyndnar samræður. Samt er þetta
skrifað í fúlustu alvöru. Þetta eru bara mjög
einlægir og hreinskilnir náungar. Og líklega
finna fleiri sig í þeim en vilja viðurkenna það.“
Sýningin er sett upp með styrk frá Reykja-
nesbæ og stuðningi ýmissa fyrirtækja á Suð-
urnesjum.
Ráðgerðar eru sex sýningar í Tjarnarbíói á
næstu vikum og segir Siguringi framhald eftir
það alls óráðið. „Það kemur bara í ljós hvernig
gengur.“
Vita konur hvað þeim
er fyrir bestu?
Morgunblaðið/Kristinn
Ráðalausir menn fyrir utan Tjarnarbíó: Sig-
urður Eyberg, Jón Páll Eyjólfsson, Ingólfur
Níels Árnason og Siguringi Sigurjónsson.
NÚTÍMADANSHÁTÍÐ – Reykja-
vík dancefestival 2003 verður haldin
í annað sinn dagana 6.–7. og 13.–14.
september á Nýja sviði Borgarleik-
hússins.
Markmið hátíðarinnar er að skapa
vettvang þar sem sjálfstætt starf-
andi dansarar og danshöfundar
kynna verk sín.
Þeir sem standa að hátíðinni eru
meðal fremstu dansara og danshöf-
unda á Íslandi, þau: Ástrós Gunn-
arsdóttir, Cameron Corbett, Jóhann
Freyr Björgvinsson, Nadia Banine,
Ólöf Ingólfsdóttir og Sveinbjörg
Þórhallsdóttir.
Danshátíðin var fyrst haldin í
fyrra, og segir Jóhann Freyr hug-
myndina hafa sprottið af því hve lítið
sé að gera fyrir dansara á Íslandi.
„Við hittumst í fyrra og fórum að
velta því fyrir okkur hvort við ættum
að stofna dansflokk. Við vorum ekki
alveg tilbúin í það að fara af stað með
svo stóra hugmynd, en upp úr því
datt okkur í hug að efna til svona há-
tíðar, til þess að skapa okkur vinnu,
koma verkum okkar á framfæri og fá
að dansa sjálf. Planið er að þetta geti
orðið stærra í sniðum í framtíðinni,
en það byggist á því að við fáum
styrki til þess. Fólk gæti þá hugs-
anlega sótt um að fá að taka þátt í
hátíðinni, við gætum verið víðar um
bæinn og jafnvel fengið erlenda gesti
og dansflokka.“
Hátíðin í fyrra gekk mjög vel og
fékk afar góðar viðtökur. Jóhann
Freyr segir að undirbúningur fyrir
þessa hátíð hafi líka gengið mjög vel,
enda sé hópurinn að vinna með frá-
bæru fólki. „Það eru engir styrkir í
þessu í ár, þannig að það er verið að
snúa upp á eyrun á öllum þeim sem
taka þátt í þessu. Fólkið sem sér um
auglýsingar fyrir okkur og kynning-
armálin er til dæmis alveg frábært,
og fleiri – þetta er allt unnið af at-
vinnufólki fyrir ekki neitt. Ríkið
styrkti okkur danshöfundana hins
vegar með listamannalaunum, en all-
an kostnað við að koma þessu upp
berum við sjálf. Það kostar til dæmis
að leigja leikhús til sýninga. Þess
vegna ákváðum við að fara í samstarf
við Borgarleikhúsið, og við opnum
leikárið þeirra um helgina. Leikhús-
stjórinn var svo frábær að taka okk-
ur inn, og svo stólar hann bara á okk-
ur að þetta standi undir sér.“
Jóhann Freyr segir að vegna þess
að engir styrkir hafi fengist til hátíð-
arinnar í ár, hafi hópurinn ákveðið að
hver og einn skyldi semja sólóverk
fyrir sjálfan sig. „Það er ofboðslega
krefjandi en líka mjög hollt fyrir
danshöfunda. Útkoman er mjög
spennandi. Við höfum gagnrýnt
hvert annað, og þegar ég sá þetta í
fyrsta skipti í heild sinni á æfingu um
daginn þá sá ég að hvert og eitt okk-
ar er að gera eitthvað alveg sérstakt.
Það er alltaf erfitt að útskýra ná-
kvæmlega fyrir öðrum dönsurum
hvað maður ætlar sér í eigin verki –
fólk dansar sína dansa best sjálft.
Verkin eru öll mjög góð – það er mik-
il einlægni í þeim og mikill friður og
fegurð yfir þeim. Mér finnst við öll
hafa vaxið frá því í fyrra og vera að
gera flottari hluti.“
Jóhann Freyr segir að danshöf-
undarnir eigi það helst sameiginlegt
í verkunum sem verða frumsýnd um
helgina að vera persónulegir og kafa
svolítið innávið. „Það eru allir hver á
sinn hátt að skoða sjálfa sig – hver er
ég, hvar stend ég, hvert er ég að
fara. Þetta kemur fram í dönsunum.“
Verk Sveinbjargar heitir For I
am …, Ástrós Gunnarsdóttir er höf-
undur Skissu, Out of Body heitir
verk Camerons Corbett, verk Nadiu
Banine kallast Transitions, Jóhann
Freyr samdi Portrett og verk Ólafar
Ingólfsdóttur heitir The Secret Life
of a Wallflower. Verkin spanna öll
10–20 mínútur.
Sýningar verða fjórar og öll verkin
sex sýnd á hverri sýningu, laugardag
og sunnudag báðar helgarnar.
Jóhann Freyr segir hópinn rétt að
byrja og að nú þegar sé farið að
leggja drög að næstu hátíð, að ári.
Það verður líka látið reyna á það
góða orðspor sem fer af íslenskum
nútímadansi á erlendri grund.
„Við ætlum líka að reyna að selja
þessa hátíð erlendis. Við erum komin
með mjög flotta vefsíðu með efni um
okkur og dansana. Þetta eru allt
ungir og efnilegir danshöfundar og
frábærir dansarar. Við hljótum að
eiga erindi á erlenda grund.“
Vefsíða hátíðarinnar er:
http://www.dancefestival.is.
Sex ný dansverk frumsýnd á Nútímadanshátíð Reykjavíkur í Borgarleikhúsinu um helgina
Morgunblaðið/Kristinn
For I am…: Sveinbjörg Þórhallsdóttir.
Persónuleg
einlægni, frið-
ur og fegurð
Morgunblaðið/KristinnPortrett: Jóhann Freyr Björgvinsson.
ÞESSA dagana stendur yfir sýning
á verkum Bjarna Bernharðs á
Mokka. Um er að ræða þriðju einka-
sýningu hans og sýnir hann nú fimm-
tán verk, öll í framúrstefnulegum
stíl.
Sýningin stendur til 12. október.
Endurútgefin ljóð
Þá hefur Bjarni endurútgefið
ljóðabók sína Náttglöpin. Í henni má
finna eldri endurskoðuð ljóð höfund-
ar í bland við ný.
Bókin fæst í helstu bókabúðum en
hægt er að nálgast hana á sérkjörum
með því að senda tölvupóst á deus-
@internet.is eða hjá höfundi, sem
gjarnan situr á Mokka þessa dagana.
Útgefandi er Deus.
Málverk á
veggjum Mokka
♦ ♦ ♦
SAMSÝNING á myndverkum Sig-
urdísar Hörpu Arnarsdóttur og
Stefáns Berg verður opnuð í Jóns-
húsi í Kaupmannahöfn kl. 17 á morg-
un, föstudag, að staðartíma. Sigurdís
Harpa sýnir teikningar auk olíumál-
verka á striga og Stefán Berg teikn-
ingar. Þau hafa dvalið í Kaupmanna-
höfn síðastliðinn mánuð og unnið að
þessari sýningu.
Þetta er í fyrsta sinn sem þau sýna
saman en hafa bæði sýnt heima og
erlendis.
Þetta er sölusýning og stendur til
mánaðamóta.
Samsýning
í Jónshúsi
Óvinurinn eftir
Emmanuel Carrère
er kominn út í kilju.
Þýðandi er Sigurður
Pálsson.
Sögupersónan
Jean-Claude Rom-
and var manna ólík-
legastur til voða-
verka. Hann var
virtur læknir hjá Alþjóða heilbrigð-
ismálastofnuninni, mikilsmetinn vís-
indamaður og heimagangur hjá
heimsfrægum mannvinum. Hann var
fyrirmyndar sonur í daglegu sambandi
við aldraða foreldra, snjall pen-
ingamaður með fjármál fjölskyldu og
tengdafólks á sinni könnu.
Á yfirborðinu var allt í sóma, en síð-
ar kom sannleikurinn í ljós; hann
hafði aldrei tekið læknapróf; var ekki í
neinu starfi; þekkti engar frægar per-
sónur; hann hafði sólundað sparifé
tengadaforeldranna. Þegar segja átti
foreldrum hans tíðindin þá fundust
þau einnig í blóði sínu – myrt af fram-
andi manni, syni þeirra.
Höfundurinn verður gestur Bók-
menntahátíðar í september.
Kilja
♦ ♦ ♦