Morgunblaðið - 18.11.2005, Side 18

18 FÖSTUDAGUR 18. NÓVEMBER 2005 MORGUNBLAÐIÐ
ERLENT
Tel Aviv. AFP. | Ariel Sharon, for-
sætisráðherra Ísraels, og Amir Per-
etz, nýkjörinn leiðtogi Verka-
mannaflokksins, samþykktu í gær
að boða til kosninga í landinu á út-
mánuðum en kjördagur verður
ákveðinn á mánudag.
„Við ákváðum, að kosningar yrðu
á tímabilinu frá því seint í febrúar
til jafnlengdar í mars,“ sagði Peretz
eftir fund með Sharon. Eftir að
Peretz sigraði í leiðtogakjöri innan
Verkamannaflokksins, ákvað hann
að slíta stjórnarsamstarfinu við
Likudflokk Sharons.
Búist er við, að helstu málin í
kosningabaráttunni verði átökin við
Palestínumenn og efnahagsmálin en
Peretz hefur stutt ísraelsku frið-
arhreyfinguna, sem er andvíg
byggðum gyðinga á hernumdu
svæðunum. Nýjar skoðanakannanir
sýna, að Likudflokkurinn hefur um-
talsvert forskot á Verkamanna-
flokkinn.
Amir Peretz Ariel Sharon
Boðað til
kosninga
í Ísrael
Chicago. AFP. | Bandarískir sak-
sóknarar ákærðu í gær Conrad
Black, fyrrverandi forstjóra
fjölmiðlafyr-
irtækisins
Hollinger Int-
ernational,
fyrir fjárdrátt.
Black og
fleiri fyrrver-
andi stjórn-
endur Holl-
inger Inter-
national eru
sakaðir um að hafa dregið sér
nær 84 milljónir dollara, sem
samsvarar rúmum fimm millj-
örðum króna, úr sjóðum fyr-
irtækisins.
Hollinger International var
eitt sinn þriðja stærsta fjöl-
miðlaveldi heims. Það hefur
verið leyst upp og flest dagblöð
þess hafa verið seld, þeirra á
meðal Daily Telegraph í Bret-
landi og Jerusalem Post.
Conrad
Black
ákærður
Conrad Black
SÍÐUMÚLA 37 - SÍMI 510 6000 - WWW.SVAR.IS
Bagdad. AFP. | Bayan Baqer Solagh,
innanríkisráðherra Íraks, sagði í
gær að fullyrðingar um að fangar
stjórnvalda hefðu sætt barsmíðum
og verið sveltir í höfuðborginni, Bag-
dad, væru „ýkjur“. Solagh sætir
vaxandi þrýstingi vegna meintra
pyntinga, sem vakið hafa hörð við-
brögð í Írak og víða um heim.
Á sunnudag fundu bandarískir
hermenn 170 fanga, sem geymdir
voru í neðanjarðarbyrgi byggingar
er innanríkisráðuneyti Íraks ræður
yfir. Fullyrt er að mennirnir hafi
sætt pyntingum, margir þeirra hafi
verið barðir og þeir hafi verið svelt-
ir. Hermt er að mennirnir hafi verið
illa á sig komnir er þeir fundust.
Upplýsingar þessar hafa vakið
mikla reiði í Írak. Fangarnir eru
flestir súnnítar en það þjóðarbrot
fór með völdin í landinu í tíð Sadd-
ams Husseins forseta. Sjítar, sem
eru mun fjölmennari, eru nú ráðandi
í stjórn landsins. Segja talsmenn
súnníta fjölmörg dæmi þess að þeir
hafi sætt pyntingum og harðræði af
hálfu sjíta. Súnnítar hafa krafist
þess að óháð, alþjóðleg nefnd verði
skipuð til að rannsaka málið. Stjórn-
völdum sé ekki treystandi til þess.
Stjórnvöld hafa heitið því að ásak-
anir þessar verði rannsakaðar.
Innanríkisráðherrann sagði hins
vegar í gær að ýmislegt hefði verið
úr lagi fært í fregnum af máli þessu.
Hið rétta væri að sjö fanganna hefðu
verið pyntaðir. Þeim sem ábyrgð
bæru yrði refsað. „Ég hafna pynt-
ingum og mun refsa öllum þeim sem
iðka pyntingar,“ sagði ráðherrann.
Fangarnir væru hins vegar „glæpa-
menn og hryðjuverkamenn“ en
súnnítar halda því fram að menn-
irnir hafi engin lögbrot framið og að
þeir tengist ekki andstöðu við er-
lenda hernámsliðið í landinu.
Ráðherrann hélt vegabréfum á
lofti því til sannindamerkis að í hópi
fanganna væru erlendir hryðju-
verkamenn, sem væru sérlega
hættulegir. Þá bar hann og til baka
fullyrðingar um að fangarnir væru
allir súnnítar. Nefndi hann að í hópi
fanganna væri að finna sjíta sem
ábyrgur væri fyrir fjórum sprengju-
tilræðum, sem kostað hefðu alls 66
mannslíf. Allir mennirnir hefðu ver-
ið handteknir af lögmætum ástæð-
um.
Reuters
Abdul Salam al-Kubaisi, liðsmaður Samtaka íslamskra fræðimanna í Írak,
heldur á blaðamannafundi á lofti ljósmynd af líki manns sem sagður er
hafa verið pyntaður í leynilegu fangelsi innanríkisráðuneytisins í Bagdad.
Segir fregnir
af pyntingum
„ýktar“
ÓTTAST er, að fuglaflensan verði
að faraldri í mönnum, berist hún í
HIV-smitað eða alnæmissjúkt fólk.
Kemur það fram hjá bandaríska
vísindamanninum dr. Robert
Webster en hann er sérfræðingur í
inflúensuveirum.
Webster segir, að ónæmiskerfið í
alnæmissjúku fólki sé mjög veiklað
og því sé meiri hætta á, að það
smitist af fuglaflensuveirunni. Þá
fengi veiran líka aukið svigrúm til
að aðlagast og verða síðan að far-
aldri að því er fram kom á fréttavef
BBC, breska ríkisútvarpsins, í gær.
Sem stendur getur fuglaflensu-
veiran, H5N1, ekki smitast auðveld-
lega á milli manna en hún hefur
borist í 125 manns í Suðaustur-Asíu
úr sýktum fugli. Almennt er óttast,
að hugsanlegur faraldur muni eiga
upptök sín á þeim slóðum og þá
vegna mikils nábýlis manna og
fugla.
Bæklað ónæmiskerfi
gæti orðið stökkpallurinn
Webster telur hins vegar ástæðu
til að óttast, að umbreyting veir-
unnar geti átt sér stað þegar fugla-
flensan kemur upp í Austur-Afríku
en þar er mikið af alnæmissmituðu
eða alnæmissjúku fólki.
Webster bendir á í þessu sam-
bandi, að krabbameinssjúkt fólk
með bæklað ónæmiskerfi eigi mjög
erfitt með að vinna bug á venjulegri
flensu og stundum taki það margar
vikur. Það sama gæti gerst með al-
næmissjúklinga, sem smitast af
H5N1. Nái veiran að fjölga sér
lengi í líkama þeirra, aukist um leið
líkurnar á, að hún fari að smitast
milli manna.
Fuglaflensan hefur ekki komið
upp í Austur-Afríku enn svo vitað
sé en nú eru á leið þangað margar
fuglategundir frá sýktum svæðum.
Gæti kvistað niður fólk
með aðra sjúkdóma
Laurie Garrett, sérfræðingur í
heilbrigðismálum, segir að í Afríku
sé ástandið þannig, að þar sé ekki
aðeins mikið um alnæmi, heldur
líka ýmsa aðra sjúkdóma, til dæmis
berkla og malaríu. Fari fuglaflens-
an að berast á milli manna þar, sé
þó ekki víst, að eftir því verði tekið
alveg strax. Ástæðan er sú, að ein-
kennin myndu líkjast svo einkenn-
um margra annarra sjúkdóma. Við
þær aðstæður væri hætta á, að
fuglaflensan legði að velli alla þá,
sem smitaðir væru af alnæmi og
jafnvel öðrum sjúkdómum.
Alnæmi gæti
ýtt undir fugla-
flensufaraldur
Reuters
Alnæmissjúklingi í Papúa Nýju Gíneu sinnt á sjúkrahúsi.