Morgunblaðið - 08.02.2006, Blaðsíða 25

MORGUNBLAÐIÐ MIÐVIKUDAGUR 8. FEBRÚAR 2006 25
MENNING
Öll góð heimili þurfa að gerasér dagamun og bjóða tilhátíðar annað slagið. Eflíta má á Reykjavíkurborg
sem eitt slíkt heimili ætti það sama að
gilda um hana, og sú er einnig raunin,
því Vetrarhátíð verður haldin í borg-
inni í fimmta sinn dagana 23.–26.
febrúar næstkomandi. Í boði verða
yfir 100 viðburðir þá fjóra daga sem
hátíðin er haldin, og eru þeir afar fjöl-
breyttir. Dagskráin fer fram í ýmsum
stofnunum á höfuðborgarsvæðinu,
utan dyra sem innan, og taka ungir
sem aldnir þátt í dagskránni sem ætl-
uð er gestum á öllum aldri. Hér er
ekki um að ræða listahátíð í eig-
inlegum skilningi, heldur menningar-
og skemmtihátíð sem kostar lítið sem
ekkert að taka þátt í.
Klípur ekki í budduna
En hvert er hið raunverulega
markmið með slíkri hátíð? Sif Gunn-
arsdóttir, verkefnisstjóri viðburða
hjá Höfuðborgarstofu, varð fyrir
svörum, en hún gegnir ennfremur
hlutverki verkefnisstjóra Vetr-
arhátíðar. „Þegar farið var af stað
með að halda þessa hátíð árið 2002
var hugsunin sú að halda stóra al-
menningsþátttökuhátíð sem myndi
vega upp á móti Menningarnótt í
dagatalinu. Þá var Menningarnótt
orðin gríðarlega stór, farin að draga
að sér þriðjung landsmanna, og aug-
ljóst að svona hátíðir þar sem hinn al-
menni borgarbúi er hvattur til þátt-
töku áttu fyllilega rétt á sér,“ segir
hún. „Eins var lagt upp með að búa til
hátíð þar sem ekki væri klipið í budd-
una; það er nánast allt á Vetrarhátíð
ókeypis fyrir gesti, rétt eins og á
Menningarnótt.“
Sif bendir ennfremur á að á þess-
um tíma árs sé skólastarf í fullum
gangi, ólíkt Menningarnótt, og þar
með hægt að bjóða þeim „upp í dans“,
eins og hún orðar það. Öll starfsemi
menningarstofnana sé í blóma á þess-
um tíma árs og tilhugsunin um að búa
til ramma utan um starfsemi þeirra
og koma á vettvangi fyrir samstarf
þeirra í millum hafi þótt aðlaðandi.
Hún segir Ingibjörgu Sólrúnu
Gísladóttur, þáverandi borgarstjóra,
og forsvarsmenn Orkuveitu Reykja-
víkur að líkindum „foreldra“ Vetr-
arhátíðarinnar. „Alla tíð hefur verið
lögð áhersla á lýsingu og ljósaleiki á
þessari hátíð – sem upphaflega hét
raunar Ljósanótt þótt frá því væri
horfið síðar vegna þess hve þröngt
hugtakið er, þótt það sé fallegt. Orku-
veitan hefur því verið dyggur stuðn-
ingsaðili allt frá fyrstu hátíð, bæði
með miðlægu fjármagni til hátíð-
arinnar og einnig eigin framkvæmd
stórra atriða á henni. Fjölmörg svið
og stofnanir Reykjavíkurborgar taka
höndum saman um að gera okkur
kleift að halda þessa hátíð.“
Vaxandi aðsókn
Aðsóknin hefur farið ört vaxandi
síðastliðin ár, og í fyrra tvöfaldaðist
aðsóknin frá árinu áður. „Við fundum
alveg að það gerðist eitthvað í fyrra,
án þess þó að við hefðum haft ástæðu
til að kvarta undan aðsókninni fram
til þess. En þá varð hreinlega hús-
fyllir kvöld eftir kvöld,“ segir Sif og
nefnir sem dæmi vinsæla tónleika í
Háskólabíói, þar sem leikin var tón-
list Barða Jóhannssonar við þöglu
kvikmyndina Häxan frá árinu 1922.
Hún nefnir einnig svokallaða Safna-
nótt, sem var haldin í fyrsta sinn á
Vetrarhátíð í fyrra og mun framvegis
verða fastur liður á hátíðinni, þar sem
ýmis söfn í borginni eru opin fram-
eftir á föstudagskvöldi Vetrarhátíðar,
með sérstökum uppákomum. „Við
bárum auðvitað svolítinn kvíðboga
fyrir að prófa eitthvað svona nýtt, en
það var ástæðulaust – 1.200 manns
mættu í Þjóðminjasafnið þessa
klukkutíma sem var opið, Listasafn
Reykjavíkur – Hafnarhús fékk 900
gesti og sömuleiðis Listasafn Íslands,
og jafnvel Rafheimar uppi í Elliðaár-
dal fengu 300 gesti í heimsókn á
þessu föstudagskvöldi. Það var eins
með marga aðra viðburði; hvar sem
maður kom var alls staðar fullt af
fólki.“
Menning með
víðtæka skírskotun
Dagskráin í ár er ekki síður viða-
mikil og spennandi en áður. Að sögn
Sifjar er hér um að ræða yfir 20 blað-
síðna dagskrá, með meira en 100 við-
burðum á þessum fjórum dögum sem
hátíðin er haldin. „Þeim sem hafa
áhuga á að taka þátt í hátíðinni með
einhverjum hætti er alltaf að fjölga,
og hópurinn er sömuleiðis að breikka.
Það finnst okkur frábært, því Vetr-
arhátíð á að vera breið; menning-
arhátíð þar sem orðið menning hefur
mjög víða skírskotun,“ segir hún.
Svo sannarlega er skírskotunin víð,
því mannréttindasamtök á borð við
Amnesty International, Ör-
yrkjabandalagið og Sjálfsbjörg hafa
skipulagt dagskrárviðburði á Vetr-
arhátíð, íþróttafélög og -miðstöðvar,
skólar á ýmsum stigum; leik- og
grunnskólar auk Tónlistarskólans í
Reykjavík og Söngskólans í Reykja-
vík, svo dæmi séu nefnd. Auk þess
taka að sjálfsögðu margar menning-
arstofnanir í borginni, til dæmis leik-
hús og nær öll söfn á höfuðborg-
arsvæðinu, þátt í Vetrarhátíð með
einum eða öðrum hætti, opna dyr sín-
ar fyrir almenningi og standa fyrir
óvenjulegum uppákomum.
„Skemmtileg hefð hefur skapast fyrir
því að fulltrúar Akureyrar líti við á
hátíðinni, enda vetrarvænir,“ segir
Sif.
Fimmtudagur
til laugardags
Hátíðin verður sett fimmtudags-
kvöldið 23. febrúar kl. 20 á Aust-
urvelli, þar sem fjöllistahópurinn
NorðanBál umbreytir torginu. Mörg-
um er eflaust í fersku minni opnunar-
atriði hátíðarinnar frá því í fyrra,
þegar sami hópur lýsti Hallgríms-
kirkju upp með sérstæðum hætti.
„Austurvöllur mun aldrei líta svona
út, hvorki fyrr né síðar,“ segir Sif, en í
atriðinu koma meðal annars línudans,
brúður, sigmenn, dansarar og tónlist-
arfólk við sögu, en það tekur um 20
mínútur í flutningi. Við taka svo ýmis
atriði, og er miðborgin í forgrunni á
þessu opnunarkvöldi.
Föstudagskvöldið breytist síðan í
Safnanótt eins og fyrr segir, þar sem
söfnin í borginni, og þá ekki einungis
listasöfnin heldur einnig söfn með
ýmis önnur markmið, hafa opið fram
eftir kvöldi og standa fyrir ýmsum
uppákomum.
Laugardagurinn verður mikill tón-
listardagur á Vetrarhátíðinni að
þessu sinni, með margvíslegum við-
burðum. Þá kemur einnig fram svo-
nefndur „gestur Vetrarhátíðar“, en á
hverju ári hefur erlendur gestur ver-
ið fenginn til að koma fram á hátíð-
inni. Að þessu sinni mun samíska
söngkonan Marit Hætta koma fram
ásamt völdum hópi innlendra tónlist-
armanna með þá Hilmar Örn Hilm-
arsson og Steindór Andersen fremsta í
flokki. „Hún jojkar, og það verður ein-
hver samruni milli íslensks rímnakveð-
skapar Steindórs og samíska jojksins
á tónleikunum. Þetta er mjög spenn-
andi, enda er jojkið mjög taktföst og
skemmtileg tónlist,“ útskýrir Sif.
Sunnudagur í Laugardalnum
Á undanförnum árum hafa einstök
hverfi verið tekin fyrir á sunnudegi
Vetrarhátíðar, síðast Hlíðarnar og
þar áður Árbærinn. Nú mun Laug-
ardalurinn og umhverfi hans lenda í
kastljósinu, þar sem hægt verður að
skoða alla þá skólastarfsemi, íþrótta-
starf af ýmsu tagi, og söfn, kirkjur og
garða sem þar er að finna, en íþrótta-
og tómstundasvið leggur þar hönd á
plóg. „Maður þekkir sitt eigið hverfi,
og miðbæinn, og svo kannski Kringl-
una. En maður veit lítið um allar þær
gersemar sem er að finna í íbúðar-
hverfunum,“ segir Sif um tilurð þessa
þáttar á Vetrarhátíð.
Á sunnudeginum verður enn-
fremur haldinn „Heimsdagur barna“
í Laugardalnum. Hann fer fram í
Laugalækjarskóla og býðst börnum á
grunnskólaaldri að prófa óvenjuleg
hljóðfæri, læra dansa, mála og leika,
með ríkri fjölmenningaráherslu. Þá
verður Alþjóðahúsið með Þjóðahátíð,
sem fer fram í gamla Blómavalshús-
inu, þar sem alls fjörutíu lönd verða
kynnt. Vetrarhátíð verður síðan
formlega slitið með brennu um kvöld-
ið í Fjölskyldu- og húsdýragarðinum.
Lokkandi dagskrá
Aldrei hafa fleiri sóst eftir að taka
þátt í hátíðinni en nú, en tæpast er
það peninganna vegna, því Vetr-
arhátíð er „þátttakendahátíð“ eins og
Sif orðar það. „Þetta er ekki hátíð
sem býr sér til tekjur með aðgangs-
eyri, og þess vegna greiðir stjórn
Vetrarhátíðar í engum tilfellum eig-
inleg laun. Frekar erum við að búa til
möguleikana til þess að framkvæma
sérkennilegar og skemmtilegar hug-
myndir á þessari hátíð, hjálpa fólki að
finna húsnæði og leigja ef með þarf,
eða útvega tæki á borð við hljóðkerfi
eða ljós. Við reynum sem sagt eftir
bestu getu að gera fólki kleift að
koma fram á hátíðinni, en hátíðin er
ekki þannig fjárhagslega vaxin að
hún ráði við launakostnað. Við erum
vel undir tíu milljónum fyrir fjögurra
daga hátíð með yfir hundrað við-
burðum, og það er óneitanlega heil-
mikil áskorun að láta allt ganga upp.
Hún er allt annars eðlis en til dæmis
Listahátíð, og á líka að vera það,“
segir Sif.
Komist er að kjarna hátíðarinnar
þegar Sif er spurð hvers vegna fólk
taki þá þátt í henni. „Ég held einfald-
lega að fólki þyki það skemmtilegt,“
svarar hún brosandi eftir stutta
stund. „En um leið er þetta kærkom-
ið tækifæri fyrir þær stofnanir og
samtök sem eiga í hlut til að kynna
sig og gera eitthvað nýtt, sem þær
eru ekki að gera dags daglega. Tæki-
færi til að sýna sig í öðru ljósi en
venjulega. Það er hvatinn til þátt-
töku, hugsa ég.“
Hún segist vona að hátíðin laði að
sér sem flesta gesti, fólk úr öllum ald-
urshópum með alls konar áhugamál.
„Það er okkar markmið með Vetr-
arhátíð að nánast allir finni eitthvað
sem þeir myndu ekki vilja missa af,“
segir hún. Og eiga þau von á mörgum
í ár? „Já, ekki spurning. Dagskráin er
einfaldlega svo lokkandi.“
Dæmi nú hver fyrir sig; dagskráin
verður komin á netið í lok þessarar
viku.
Vetrarhátíð á
að vera breið
Reykjavík mun iða af menningu af margskonar
tagi á Vetrarhátíð, sem haldin verður í fimmta
sinn dagana 23.–26. febrúar. Í samtali við Ingu
Maríu Leifsdóttur segist Sif Gunnarsdóttir verk-
efnisstjóri eiga von á góðri þátttöku, enda dag-
skráin bæði fjölbreytt og skemmtileg.
Morgunblaðið/Brynjar Gauti
Sif Gunnarsdóttir, verkefnisstjóri Vetrarhátíðar, telur að Austurvöllur muni hvorki fyrr né síðar líta út eins og á
opnunarkvöldi hátíðarinnar, 23. febrúar næstkomandi, en hún mun standa í fjóra daga.
www.reykjavik.is/vetrarhatid
ingamaria@mbl.is
Skógarhlíð 18 · 105 Reykjavík
Sími: 591 9000 · www.terranova.is
Akureyri sími: 461 1099
Hafnarfjörður sími: 510 9500
MasterCard
Mundu
ferðaávísunina!
Bibione frá kr. 49.995 Portoroz frá kr. 58.595
Ein glæsilegasta sólarströnd Ítalíu
Planetarium Village að seljast upp!
Perlan við Adríahafið
Búlgaría frá kr. 29.990 Salou frá kr. 42.995
Sló í gegn - yfir 2.000 sæti seld Sólarperlan á Costa Dorada
Brottfarir í júní að seljast upp!
Bókaðu beint á www.terranova.is ogfáðu lægsta verðið
Barcelona
Düsseldorf
París
München
Frá kr. 29.990
Tryggðu þ
ér
10.000 kr
. afslátt
á mann!
Tryggðu þér bestu
gististaðina og
lægsta verðið!
2006Sumar
E
N
N
E
M
M
/
S
IA
/
N
M
20
3
41