Morgunblaðið - 10.02.2006, Side 42

42 FÖSTUDAGUR 10. FEBRÚAR 2006 MORGUNBLAÐIÐ
MINNINGAR
✝ Málfríður AgnesDaníelsdóttir
fæddist í Reykjavík
25. nóvember 1936.
Hún lést á heimili
sínu, Háteigi 19 í
Keflavík, 3. febrúar
síðastliðinn. For-
eldrar hennar voru
Daníel Ellert Pét-
ursson, f. 13. júní
1900, d. 14. júní
1977, og Guðlaug
Jónína Jóhannes-
dóttir, f. 18. mars
1910, d. 31. maí
1969. Systkini Málfríðar eru: Ein-
ar, f. 6. september 1927, d. 8. maí
2001, Vigdís, f. 15. febrúar 1935,
Pétur Jóhannes, f. 16. september
1938, d. 26. maí 1979, Jónína
Helga, f. 3. september 1940, Frið-
gerður Bára, f. 27. nóvember
1942, Örn Sævar, f. 27. nóvember
1942, Gunnlaugur Guðmundur, f.
15. ágúst 1945, d. 30. nóvember
1998, Unnur, f. 19. mars 1947, og
Kolbrún, f. 14. september 1948.
Hinn 1. janúar 1958 giftist Mál-
fríður Magnúsi Jónssyni, f. 16.
febrúar 1936. Foreldrar hans
voru Jón Jónsson, f. 30. júní 1902,
d. 20. júlí 1980, og Guðrún Mark-
úsdóttir, f. 17. mars 1908, d. 6. júlí
1991. Málfríður og Magnús eign-
uðust sjö börn. Þau eru: 1) Sigríð-
ur, f. 2. mars 1958, gift Einari
Hauki Helgasyni, sonur hennar og
uppeldissonur hans er Ársæll Páll
Óskarsson, synir þeirra eru:
Magnús Helgi og Sigurjón Veigar.
2) Ingibjörg Guðrún, f. 1. ágúst
1959, börn hennar eru: Guðrún
Jóna Kristjánsdóttir, sambýlis-
maður Vitor Manuel P. Soares,
Málfríður Agnes Kristjánsdóttir,
sambýlismaður
Hilmar Ævar Jó-
hannesson, Emil
Örn Emilsson, unn-
usta Sunna Lind
Ágústsdóttir, og
Gunnlaugur Jóhann
Emilsson. 3) Krist-
björg Jónína, f. 1.
ágúst 1959, gift
Árna Ingimundar-
syni. Börn þeirra
eru: Ragna Kristín,
Agnes Rut, Pétur
Loftur og Eygló
Rún. 4) Sjöfn, f. 13.
janúar 1961, sambýlismaður Ósk-
ar Gunnarsson. Börn hennar eru:
Ellen Dana Elíasdóttir, sambýlis-
maður Ellert Már Randversson,
Jóna Petra Guðmundsdóttir,
Magnús Þór Guðmundsson, Hólm-
fríður Ósk Guðmundsdóttir og
Elís Barri Símonarson. 5) Elísa-
bet, f. 14. ágúst 1962, sambýlis-
maður Hafþór Óskarsson, dætur
þeirra eru: Vaka og Íris. 6) Pétur,
f. 3. desember 1966, kvæntur
Valerie J. Harris. 7) Sigurborg, f.
1. maí 1977, gift Ásgrími S. Stef-
ánssyni, dætur þeirra eru: Birg-
itta Rós og Stefanía Ösp. Barna-
barnabörn Málfríðar eru átta.
Fyrstu hjúskaparárin bjuggu
Málfríður og Magnús á höfuð-
borgarsvæðinu þar sem þau ólust
bæði upp. 1963 fluttust þau til
Suðurnesja þar sem þau bjuggu æ
síðan, lengst af á Háteigi 19. Mál-
fríður starfaði að mestu við versl-
unarstörf en síðustu starfsárin
vann hún í grunnskólum Reykja-
nesbæjar.
Útför Málfríðar fer fram frá
Keflavíkurkirkju í dag og hefst at-
höfnin klukkan 14.
Vinátta er eitt af því fallegasta sem þú getur
eignast og eitt af því besta sem þú getur orðið.
Vinur er lifandi fjársjóður og ef þú átt einn
slíkan, þá átt þú eina verðmætustu gjöf lífsins.
Vinur er sá sem stendur alltaf við hlið þér
gegnum gleði þína og sorgir.
Vinur er sá sem þú getur alltaf treyst á, sá sem
þú getur alltaf opnað þig fyrir, sú dásamleg-
asta persóna, sem alltaf trúir á þig.
(Höf. ók.)
Jæja, elsku mamma, þá er komið
að kveðjustund. Við, eins og svo
margir, vildum gjarnan fá tækifæri
til að kveðja þig á annan hátt en á
prenti, en það er ekki á allt kosið í
þessu lífi.
Heppin við erum að hafa átt þig að
sem mömmu, svo mikill vinur og fé-
lagi okkar allra þú varst, hjartahlý,
alltaf jákvæð og aldrei langt í brosið.
Í ferðalaginu austur á land fyrir
stuttu varstu svo ánægð og spennt
yfir að hitta Sjöfn og fjölskyldu og
koma þeim á óvart með morgunsöng,
ekkert vesen þó að langt væri keyrt
og þú ekki alveg heil heilsu. Aldrei
kvartaðir þú yfir þeim óþægindum
sem veikindin hljóta að hafa valdið
þér heldur hélst áfram að brosa og
passa barnabörnin, með dyggri að-
stoð pabba.
Þú hafðir gaman af að ferðast og
fórst víða, m.a. hinum megin á hnött-
inn til að heimsækja Lísu, Haffa og
Vöku, og nú síðast til Írlands með
systkinum þínum. Önnur ferð sem þú
hafðir mikið gaman af var ferðin til
Portúgals með pabba.
Hvort sem ferðalagið var með okk-
ur sem litlum börnum í rútu til
Reykjavíkur eða á bíl um Vestfirði á
fullorðinsaldri, þá gleymdir þú aldrei
góða skapinu og brosinu heima, sem
þú kenndir okkur að er svo
nauðsynlegt að taka með í ferðalag
lífsins.
Þú hafðir líka gaman af og varst
óþreytandi við að spila, hvort sem
það var við pabba, okkur krakkana,
eða barnabörnin sem þó varla voru
sum hver nógu gömul til að skilja um
hvað spilið snerist, en þú gast alltaf
gert spilið skemmtilegt og spennandi
fyrir þau svo þau hefðu gaman af.
Aldrei veit maður hvenær kvatt er
í síðasta sinn, eitt af okkar síðustu
skiptum saman var í veislunni hjá
Sigurborgu og Ása. Þú svo falleg sem
fyrr, opin og tilbúin að ræða við
hvern sem var í veislunni og virtist
njóta hverrar stundar. Ekki gátum
við vitað að þetta yrði ein okkar síð-
asta stund saman hér á jarðríki, en
mikið erum við ánægð að eiga hana í
minningabankanum.
Við vonum að guð gefi okkur öllum
styrk og þrek til að komast yfir frá-
fall þitt, elsku mamma, þá sérstak-
lega styrki hann pabba og líti eftir
honum.
Sigríður, Ingibjörg,
Kristbjörg, Sjöfn, Elísabet,
Pétur og Sigurborg.
Elsku besta mamma.
Kletturinn í lífi okkar allra.
Þú varst móðir fram í fingurgóma.
Þér er svo margt að þakka.
Hlýi faðmurinn og röddin þín eru
það sem ég mun alltaf minnast.
Faðmlag þitt sem heimsótti mig
hinum megin á hnöttinn og fékk mig
til að taka rétta ákvörðun á þeim
tíma.
Röddin þín sem alltaf róaði mig
hversu áhyggjufull sem ég var af þér
eða öðrum á þeim tíma.
Takk fyrir að hugsa svo vel um
okkur. Hugsa svo vel um maka okkar
og börnin okkar sem þú gerðir fram á
hinstu stund. Hugsa svo vel um okk-
ur öll.
Ég þakka þér fyrir allt elsku
mamma mín.
Hvíldu í friði. Þín
Elísabet.
Kveðja frá ömmubörnum
Elsku besta amma nú ertu burtu kvödd,
við ætíð munum þína minning geyma.
Í hugarfylgsnum okkar við heyrum þína rödd,
og höldum því að okkur sé að dreyma.
Í hjörtu okkar sáðir þú frækornunum fljótt,
og fyrir það við þökkum þér af hjarta,
en þó í hugum okkar nú ríki niðdimm nótt,
þá nær samt yfirhönd þín minning bjarta.
Nú svífur sál þín amma á söngvavæng um geim,
svo sæl og glöð í nýja og betri heima,
við þökkum fyrir samveruna, þú ert komin heim,
og þig við biðjum guð að blessa og geyma.
(U.S.Á.)
Barna- og barnabarnabörn.
Elsku amma mín.
Þegar ég hugsa til þess að þú hefur
yfirgefið þennan heim vona ég inni-
lega að þú sért kominn á góðan stað.
Í mínum augum hefur þú ávallt
verið svo hlý, ástkær og tilbúin með
svör fyrir mig um lífið og tilveruna.
Mín minning um þig mun ávallt lifa í
hjartanu mínu og vera saga til barna
minna um þig, elsku amma mín. Ég
mun sakna þín mikið og hlúa að mín-
um minningum um okkar stundir
saman. Þegar ég skoða yfir liðna tíð
og horfi til framtíðar vona ég, að ég
hafi fengið eitthvað af þínum eigin-
leikum sem góð manneskja.
Þín elskandi Maddý litla,
Málfríður Agnes
Kristjánsdóttir.
Það hefur sjaldan verið sagt að lífið
sé sanngjarnt, og það sannar sig í dag
þegar ég þarf að kveðja hana elsku-
legu ömmu mína. Í dag finnst mér líf-
ið ósanngjarnt. Minningarnar sem ég
á um þig eru það eina sem veitir mér
smá huggun í þessari miklu sorg.
Þú varst alltaf svo yndisleg, amma
mín. Alveg sama hvað var að gerast,
þér datt alltaf eitthvað sniðugt í hug.
Ég mun aldrei gleyma því þegar ég
fór með þér og afa hringinn í kring-
um landið og þú varst búin að taka
allar dýnur, öll teppi og allar sængur
sem fóru með í ferðalagið og raða
þeim í aftursætið svo ég og Sigur-
borg gætum séð út um gluggana á
bílnum. Það var líka aldrei stoppað í
sjoppum nema bara til að pissa og
fylla á kaffibrúsann hans afa. Svo
fundum við fallegan stað til að borða
nestið okkar á. Þér þótti svo afskap-
lega vænt um Ísland og ég er svo glöð
yfir því að þú fórst með börnunum
þínum á Breiðdalsvík í janúar því þú
talaðir svo mikið um hvað leiðin hafi
verið falleg, þú lokaðir augunum þeg-
ar þú sagðir mér frá því fyrst og sást
hana fyrir þér.
Það var aldrei setið auðum hönd-
um, ef ekkert var að gera var kjörið
að taka í spil og við spiluðum oft. Ég á
líka aldrei eftir að gleyma því þegar
við Sigurborg fengum að hjálpa þér
að fylla á kælinn í Kaupfélaginu, það
var alveg toppurinn á tilverunni. Ég
man líka ennþá eftir því að hafa setið
heima hjá þér og afa og horft 100
sinnum á Með allt á hreinu. Það var
líka alltaf svo gott að leita til þín ef
eitthvað bjátaði á, þú gast alltaf
hjálpað. Þú vissir allt, amma mín, öll
heimilisráðin við hinu og þessu og
sögur við hvert tækifæri. Ég labbaði
Skúlagötuna núna nýlega og mér
varð hugsað til þín, allar sögurnar
sem gerðust á Skúlagötunni og bara
hérna í hverfinu mínu í Reykjavík.
Ég á eftir að sakna þín svo mikið,
elsku amma mín. Hugur minn verður
hjá þér alltaf þegar ég kveiki á kerti
og ég man eftir þér alltaf, alltaf.
Guð geymi þig, elsku amma mín.
Þín
Ragna Kristín.
Tíminn flýgur og allt í einu er allt
farið að líða svo hratt. Inn á milli á
maður það til að gleyma sér í amstri
dagsins og maður hefur nóg að gera,
nema hvað næstu stund er maður
fallinn á jörðina kylliflatur og getur
ekki hreyft sig því að eitthvað fór úr-
skeiðis. Mynstri dagsins var breytt
og það tekur mann alla ævi að venjast
breytingunum. Maður verður hrylli-
lega ósáttur hið fyrsta en lærir svo að
lifa með því sem gerst hefur.
Þetta hljóp um huga minn þegar
þú elsku amma mín fórst frá okkur.
Ég vildi svo óska þess að ég gæti
fengið meiri tíma með þér en ég
þakka fyrir að eiga alveg ótrúlega
margar minningar um þig sem munu
fylgja mér til enda. Ég heyri ennþá
hlátur þinn og finn fyrir rónni sem
fylgdi þér alltaf. Ég hef lært svo mik-
ið af þér og þú hafðir alltaf svo mikið
að gefa. Ég sakna þín svo ótrúlega að
orðin fá því ekki lýst. Nærvera þín
létti alltaf svo á mér og það er mér
ógleymanlegt þegar þú, ásamt
mömmu og pabba, heimsóttir mig í
Kaupmannahöfn. Ég saknaði þín svo
mikið þegar þið fóruð aftur og það
var svo gott að koma heim og fá að
sjá þig aftur. En söknuðurinn er
öðruvísi í dag. Ég vona að ég fái að
hitta þig aftur þegar minn tími er
kominn. Guð geymi þig, þú átt og
munt ávallt eiga stórt pláss í hjarta
mér.
Saknaðarkveðjur, þín
Agnes Rut.
Elsku amma mín.
Ég vil þakka þér fyrir allar stund-
irnar sem ég fékk að njóta með þér.
Efst í mínum huga er þegar þú
amma, afi, Pétur, Bogga, Árni, Sigga
og Einar Haukur komuð austur 13.
janúar til að koma mömmu á óvart á
45 ára afmælinu hennar.Vorum við
Pétur í sambandi alla vikuna á undan
og svo keyrðuð þið austur 12. janúar
og gistuð á Djúpavogi yfir nótt. Þið
lögðuð af stað um 5.30 til að geta
sungið afmælissönginn yfir rúminu
hjá mömmu. Mér fannst þetta svo
æðislegt hjá ykkur og mamma ljóm-
aði og var svo ánægð.
Þú varst svo hress og ánægð og
sagðir svo mikið með einu brosi.
Ég mun sakna þín óendanlega
mikið, elsku amma mín, og megi Guð
vera með þér.
Ég mun sakna þín óendanlega
mikið, elsku amma mín, og megi Guð
vera með þér.
Láttu nú ljósið þitt
loga við rúmið mitt.
Hafðu þar sess og sæti,
signaði Jesús mæti.
(Höf. ók.)
Takk, amma, fyrir að hafa verið
svona yndisleg, elsku afi og ættingj-
ar, megi Guð vera með ykkur á þess-
um erfiðu tímum.
Ellen Dana, Ellert Már,
Sindri Þór, Björgvin Bragi
og Silja Sjöfn.
Elsku Maddý mín.
Með þessum fáu línum vil ég þakka
þér alla þá aðstoð og styrk sem ég
varð aðnjótandi frá þér við slysfarir
mínar og síðar makamissi.
Vertu sæl, og Guð gæti þín,
leiði þig með líknarhendi,
lífsins brauð af himnum sendi.
Vertu sæl, og Guð gæti þín.
Vertu sæl, og Guð minn gæti þín,
um þig vefji örmum sínum,
öllum létti raunum þínum.
Vertu sæl, og Guð minn gæti þín.
(Höf. ók.)
Elsku Maggi, börn, tengdabörn og
barnabörn, Guð gefi ykkur styrk á
þessari sorgarstund.
Þín systir,
Unnur.
Elsku systir, hinsta kveðja.
Ljúfar voru stundir
er áttum við saman.
Þakka ber Drottni
allt það gaman.
Skiljast nú leiðir
og farin ert þú.
Við hittast munum aftur,
það er mín trú.
Hvíl þú í friði
í ljósinu bjarta.
Ég kveð þig að sinni
af öllu mínu hjarta.
(Maren Jakobsdóttir.)
Þín systir,
Kolbrún.
Mig langar í fáum orðum að kveðja
hana Maddý frænku mína sem lést
hinn 3. febrúar síðastliðinn. Ég hef
þekkt þessa góðu konu frá því ég
man eftir mér, hún var gift móður-
bróður mínum, Magga frænda. Það
lýsir Maddý kannski best, að þegar
ég eignaðist mitt fyrsta barn kom í
ljós að það var mjög veikt og þurfti að
fara í stóra aðgerð erlendis. Maddý
kallaði mig til sín, unga og hrædda
konu, og sagði mér að þetta yrði allt í
besta lagi og að ég skyldi ekki vera
hrædd. Hún var þá sjálf að fara utan
og hafði safnað sér gjaldeyri til að
geta verslað og haft gaman. Hún
setti þetta seðlabúnt sem hún hafði
safnað í lófann minn og sagði mér að
hún vissi að við ættum ekki mikinn
pening og að við þyrftum meira á
þessu að halda en hún. Maddý í hnot-
skurn, límið sem hélt öllu saman, það
var alveg sama hvenær og á hvaða
tíma sólarhrings, maður gat alltaf
leitað til hennar og maður var alltaf
velkominn.
Elsku Maggi, Sigga, Inga, Bogga,
Sjöfn, Lísa, Pétur og Sigurborg, nú
horfir hún niður á ykkur stolt af því
hvað þig standið ykkur vel í þessari
sorg. Tíminn læknar öll sár, en minn-
ingin um yndislega konu lifir að ei-
lífu.
Guðrún Markúsdóttir.
Sorgin er gríma gleðinnar.
Þeim mun dýpra sem sorgin
grefur sig í hjarta manns
þeim mun meiri gleði getur það rúmað.
Skoðaðu hug þinn vel, þegar þú ert glaður,
og þú munt sjá, að aðeins það,
sem valdið hefur hryggð þinni
gerir þig glaðan.
(Úr Spámanninum.)
Með þessari tilvitnun kveð ég móð-
ursystur mína, þakka henni góðar
minningar frá æskuárunum og fyrir
allt sem hún var mér.
Systurnar Maddý og Helga
bjuggu nærri hvor annarri mjög
lengi. Fjölskyldurnar hafa verið stór
hluti af hvor annarri, lungann af
æskuárum barna þeirra og fram á
fullorðinsár. Margs er að minnast,
Maddý að púsla eða lesa í bók, dálítill
bóhem í sér með stóran barnahóp en
alltaf pláss fyrir gesti, hvort sem var í
mat, kaffi eða í gistingu.
Samheldni Skúlagötusystranna
sex var ótrúleg, þær hjálpuðust að
við undirbúning fermingarveislna,
giftingar, skírnir eða þegar einhver
átti stórafmæli. Minningar um mikla
gleði og kátínu sem ætíð var í kring-
um þær meðan bakað var, skreytt
eða eldað. Þessar minningar eru mér
afar dýrmætar og þarfar í hringiðu
nútímans þegar enginn hefur eða öllu
heldur gefur sér tíma til að rækta
sína nánustu.
Lífið er stutt og uppskera þess
verður ætíð háð því hvernig sáð var
til í upphafi. Maddý hlúði vel að því
allra dýrmætasta í lífi hvers og eins,
fjölskyldunni. Ótrúleg hlýja, viska og
góð nærvera einkenndi hana og mik-
ið eru börnin hennar lánsöm að hafa
fengið svo gott veganesti út í lífið.
Megi góður Guð styrkja Magga á erf-
iðum stundum og börnum þeirra og
fjölskyldum sendi ég mínar dýpstu
samúðarkveðjur.
Jónína Holm.
Kær æskuvinkona er kvödd. Þvílík
sorgarfrétt. Við Maddý, en svo var
hún kölluð af flestum, kynntumst
haustið 1949 í gagnfræðaskólanum
við Lindargötu. Ég kom ókunnug í
skólann, nýflutt frá Flateyri. Þá eign-
aðist ég góða og trygga vinkonu og
vinátta okkar hefur varað alla tíð síð-
an. Á æskuheimili hennar á Skúla-
götu 76 var ég alltaf velkomin. Þó að
margt væri um manninn, níu systkini
ásamt foreldrum sínum, gestir og
gangandi var alltaf nóg rými hjá
þeim heiðurshjónum Jónínu og Dan-
íel.
Maddý var glæsileg, hláturmild og
skemmtileg. Við gátum hlegið að öllu
á æskuárunum – engar áhyggjur þá.
Oft minntumst við ferðanna með
KFUK í Vindáshlíð og í Vatnaskóg,
líf og fjör með góðu fólki.
Árið 1951 var stofnaður nýr skóli,
Gagnfræðaskóli Verknáms. Þar voru
kennd bókleg fög og verkmennt, við
drifum okkur í þann skóla. Maddý
hafði áhuga á vefnaði og fór í vefn-
aðardeild og óf mörg falleg stykki.
Árið 1953 var fyrsta útskrift úr
„verknáminu“ og vorum við nemend-
ur ánægðir með þennan nýja skóla.
Við minntumst 50 ára útskriftaraf-
mælis og Maddý gat ekki mætt þar
með okkur og saknaði ég hennar úr
hópnum. Maddý vann hjá kjötbúð
J.C. Klein, einnig hjá versluninni
Biering.
Hún giftist ung Magnúsi Jónssyni
og eignuðust þau sjö börn. Hún fékk
stórt hlutverk í lífinu, fór í gegnum
það með léttleika og prýði. Öll eru
börn þeirra hjóna mannkostafólk.
Síðan eignuðust þau tengdabörn,
barnabörn og barnabarnabörn. Stór
fjölskylda saknar og syrgir ásamt
vinum og vandamönnum.
Kæra fjölskylda, guð gefi ykkur
öllum styrk í sorginni.
Anna Hannesd. Scheving.
MÁLFRÍÐUR AGNES
DANÍELSDÓTTIR