Andvari - 01.01.1991, Qupperneq 21

ANDVARI
BJÖRN SIGURÐSSON
19
aö eitt sinn þegar þeir voru á gangi saman á götu í Kaupmannahöfn hafi
Björn trúaö honum fyrir því að Fischer hefði skrifað Rockefeller-
stofnuninni í Bandaríkjunum og mælt með að hún veitti Birni styrk til
vísindarannsókna. Björn bætir síðan við þessari látlausu athugasemd
sem lýsir honum vel: „Hann heldur að ég geti kannski helst dundað við
einhver vísindastörf“.
Að lokinni þriggja mánaða námsdvöl á Statens Seruminstitut í
Kaupmannahöfn sumarið 1940 hvarf Björn heim til íslands þá um
haustið. Danmörk hafði nú verið hernumin af Þjóðverjum og á íslandi
sat breskt herlið svo að ekki var auðvelt um ferðalög á milli landanna.
Var hann í hópi íslendinga sem seinastir komu heim frá Norðurlönd-
um um Petsamó, áður en allar leiðir lokuðust frá Evrópu vegna styrj-
aldarinnar. Björn hóf nú aftur störf á sínum gamla vinnustað á Rann-
sóknastofu Háskólans. Tæpu ári seinna, í júlí 1941, fór hann vestur um
haf til Bandaríkjanna til þess að stunda rannsóknir við Rockefeller
Institute for Medical Research í Princeton, New Jersey. Hlaut hann til
þess styrk frá Rockefeller Foundation. Við Rockefellerstofnunina
störfuðu þá afburðamenn í lífefnafræði og veirufræði og má þar helst
nefna Wendell M. Stanley sem fyrstur hreinsaði tíglaveikiveiru tó-
baksplöntu og ákvarðaði efnainnihald hennar. Þetta var í fyrsta sinn
sem tókst að hreinsa veirur efnafræðilega og markaði tímamót í skiln-
ingi manna á eðli veira.
Björn vann að veirurannsóknum þau tvö ár sem hann dvaldist við
meinafræðideild Rockefellerstofnunarinnar. Hann kannaði m.a. vöxt
hundaæðiveiru, vesicular stomatitisveiru og inflúensuveiru í hænsna-
fóstrum og áhrif hita og aldurs fóstursins á vöxtinn. Hann notaði síðan
unguð hænuegg til þess að mæla magn vesicular stomatitisveiru og
rannsaka sýruþol hennar. Niðurstöður rannsókna Björns við
Rockefellerstofnunina birtust í fimm greinum á árunum 1942-1943.
Arið 1943 sneri hann heim frá Bandaríkjunum. Gerðist hann enn að-
stoðarlæknir við Rannsóknastofu Háskólans og vann við þá stofnun
næstu tvö árin.