Fréttablaðið - 10.12.2009, Síða 78

58 10. desember 2009 FIMMTUDAGUR
Þrándur Þórarinsson hefur
vakið mikla athygli síðustu
misserin fyrir kraftmikil
olíumálverk í gamaldags
stíl. Hann heldur nú þriðju
einkasýninguna sína á
Hverfisgötu 18a (áður 101
gallerí). Sýningin stendur
fram á Þorláksmessu.
Þrándur, sem er þrítugur, tók
bílpróf í fyrra og ætlaði að láta
gamlan draum rætast, ferðast
um landið og mála merkisstaði og
landslag eins og gömlu meistar-
arnir. Draumurinn endaði þó þar
sem hann hófst, á vinnustofunni í
miðbæ Reykjavíkur, þar sem hann
málaði tólf olíumálverk upp úr
Áföngum, kvæði Jóns Helgason-
ar frá 1939.
„Það var bara einhver skortur af
framtakssemi að ég tók ekki prófið
fyrr,“ segir Þrándur. „Yngri systir
mín tók það um síðustu jól og mér
fannst ég ekki geta verið minni
maður. Það var tími til kominn.
Stóra hugmyndin með prófinu var
að loksins gæti ég ferðast um land-
ið og málað landslagið. Ég á ekki
bíl og er frekar óöruggur í akstr-
inum. Ég er alltaf dauðstressaður
þegar ég sest undir stýri. Mér líst
reyndar betur á sjálfskipta bíla.
Prófaði þannig um daginn og það
gekk þrusuvel. Það var eiginlega í
fyrsta skipti sem ég ók eitthvað á
hraðbrautunum í bænum. Ég hef
forðast þær eins og heitan eldinn.
En ég treysti mér í hvað sem er á
sjálfskiptum.“
Myndir Þrándar geta verið
drungalegar og ógnvekjandi. Hann
hefur málað mynd af Grýlu að
narta í óþægan krakka. „Áfangar
er frekar myrkt kvæði svo mynd-
irnar eru eftir því, en það verður
ekki sett neitt aldursbann á sýn-
inguna. Það ætti enginn að míga í
sig við að sjá þessar myndir. Fyrir
utan myndirnar upp úr Áföngum
verður eitt og annað til sýnis. Ein
myndin er til dæmis um manntalið
1703 og önnur um Tyrkjaránið.“
Og Þrándur er með draumaverk-
efnið á hreinu. „Það væri draum-
ur í dós að fá að mála altaristöflu
í kirkju úti á landi svo ég komist
einhvern tímann út úr bænum. Þá
gæti maður mælt sig við hliðina
á fyrirmyndunum, öllum þessum
gömlu körlum,“ segir listamaður-
inn. drgunni@frettabladid.is
TREYSTI MÉR Í ALLT
Á SJÁLFSKIPTUM
DREYMIR UM BÍLFERÐIR ÚT Á LAND Þrándur Þórarinsson á vinnustofu sinni. FRÉTTABLAÐIÐ/PJETUR
„Það verður allt lagt í sölurnar
og ég er með svo ótrúlega flott
band með mér. Þarna eru Pétur
Ben, Ómar og Óskar Guðjónssyn-
ir, Magnús Tryggvason Elíassen,
Eyþór Gunnarsson og Þorsteinn
Einarsson (í Hjálmum), sem tekur
ótrúlega flott slide-gítarsóló á disk-
inum. Dætur mínar verða líka og
Elín Ey ætlar að spila á undan. Ég
tek öll lögin á diskinum og nokkur
lög eftir Magga Eiríks líka.“
Þetta segir Ellen Kristjánsdóttir
um útgáfutónleika sína fyrir plöt-
una Draumey sem fara fram í Frí-
kirkjunni í kvöld. Draumey er að
stórum hluta unnin með Pétri Ben
og er í hugljúfum og rólyndisleg-
um dúr. Hvernig stendur eigin-
lega á öllum þessum rólegheitum
hjá Ellen?
„Það er nú það!? Ég er allavega
ekki neitt sérstaklega róleg sjálf.
Eiginlega bara hrikalega ofvirk
og með athyglisbrest! Núna er ég
komin með svo margar hugmyndir
að ég á erfitt með að einbeita mér
að þessu verkefni.“
Þannig að við erum kannski
að tala um brjálaða teknóplötu
næst?
„Það er draumurinn. Ég er ekki
að djóka! Kannski fæ ég son minn
12 ára til að gera hann með mér.
Nei, ég segi svona. En mér þykir
ofsalega gaman líka að syngja
kraftmikil lög, blús og soul til
dæmis.“
Þannig að það er síðasti séns að
sjá rólegu Ellen í kvöld?
„Ha, ha, ha, já ætli það ekki
bara. Ætli næsta plata heiti ekki
bara Ellen hleypur um.“ - drg
Rólega Ellen er ofvirk
Í FRÍKIRKJUNNI Í KVÖLD Ellen er í skýj-
unum yfir hljómsveitinni sem spilar með
henni. FRÉTTABLAÐIÐ/ANTON
Sölvi Kárason, nemandi við Háskóla Íslands, hefur
verið kjörinn annar fulltrúi Student Union Develop-
ment Committee, nefndar sem vinnur að því að hlúa
að og byggja upp stúdentafélög í löndum innan Evr-
ópu. Nefndin hefur meðal annars verið að aðstoða
stúdentafélög í Úkraínu og Bosníu við að bæta hag
stúdenta þar.
Sölvi hefur verið viðloðandi stúdentapólitík síðast-
liðin tvö ár og er félagsmaður í Röskvu, samtökum
félagshyggjufólks við Háskóla Íslands. Auk þess að
sinna stúdentapólitíkinni stundar hann meistaranám
í þróunarfræði við háskólann. „Ástæðan fyrir því að
ég gekk upphaflega til liðs við Röskvu var sú að mig
langaði að hjálpa til í baráttunni fyrir bættum hag
stúdenta. Þótt við höfum það mjög gott á Íslandi miðað
við víða annars staðar þá er alltaf eitthvað sem mætti
bæta,“ útskýrir Sölvi. Hann segir þó stefnuna ekki
tekna á landspólitíkina að námi loknu. „Ég veit ekki
hvað mig langar að verða þegar ég er orðinn stór en
ég sé ekki fyrir mér að fara í áframhaldandi pólitík.
Stúdentapólitík er hagsmunabarátta sem mér finnst
eiga lítið skylt við landspólitík.“
Heilmikil vinna fylgir því að sitja í stjórn SUDC
og tekur Sölvi sæti í nefndinni í janúar og mun sinna
því starfi næsta árið. Inntur eftir því hvort hann telji
nefndarstarfið mikilvægt starf svarar Sölvi því ját-
andi. „Þetta er tvímælalaust mikilvægt starf. Öll stúd-
entapólitík á að ganga út á það að efla rödd stúdenta
og nefndarstarfið hjálpar stúdentum að öðlast þessar
rödd.“ - sm
Bætir hag stúdenta í Evrópu
HUGSJÓNAMAÐUR Sölvi Karlsson var kjörinn annar fulltrúi
Student Union Development Committee. FRÉTTABLAÐIÐ/ANTON
Í síðasta mánuði var blásið til hinnar árlegu Jólalagakeppni Rásar 2.
Þetta er í sjöunda sinn sem keppnin er haldin og bárust tæplega 80 lög
að þessu sinni. Keppnin hefur notið mikilla vinsælda, en í fyrra sigraði
Greta Salóme Stefánsdóttir með lagið Betlehem.
„Það kennir ýmissa grasa og í úrslitum í ár eru stór og hátíðleg jólalög,
lítil og sæt jólalög og allt þar á milli. Flytjendur eru allt frá hinum þriggja
ára gamla Hróari Hrólfssyni til stórstjörnunnar Björgvins Halldórsson-
ar,“ segir Ólafur Páll Gunnarsson, betur þekktur sem Óli Palli á Rás 2. Dóm-
nefnd á vegum stöðvarinnar hefur nú valið tíu lög úr bunkanum og hlustend-
ur sjá svo um að kjósa vinningslagið, en hægt er að hlusta á lögin og kjósa
á heimasíðu Popplands, ruv.is/poppland. Lögin tíu munu hljóma á
Rás 2 til miðvikudagsins 16. desember, en þá verður tilkynnt
um sigurvegara í Jólalagakeppninni. Verðlaunin eru ekki af
verri endanum, en sigurvegarinn fær rúm frá Rekkjunni og
100.000 króna gjafabréf í Krónunni. - ag
Hörð jólalagakeppni á Rás 2
FJÖLBREYTT KEPPNI „Flytjendur eru
allt frá hinum þriggja ára gamla Hróari
Hrólfssyni til stórstjörnunnar Björgvins
Halldórssonar,“ segir Óli Palli.
„Ég fer reglulega með barnaföt og
leikföng upp í Fjölskylduhjálp og
hef bara séð raðirnar lengjast,“
segir Soffía Karlsdóttir söngkona.
Hún stendur ásamt hópi fólks fyrir
jólatónleikum til styrktar Fjöl-
skylduhjálp í kvöld. Tónleikarnir
fara fram í Víðistaðakirkju í Hafn-
arfirði og hefjast klukkan 20.
„Þegar ég fór upp í Fjölskyldu-
hjálp í byrjun nóvember náði röðin
út á götu. Fólk er að ganga þang-
að langar leiðir með börnin sín,
kerrur og poka og það er orðið
hálf óraunverulegt að sjá þetta.
Þá hringdi ég í Guðrúnu Árnýju
systur mína og spurði hvort við
gætum ekki gert eitthvað og við
höfðum samband við þessar æðis-
legu stelpur,“ segir Soffía. Söng-
konurnar sem koma fram á tón-
leikunum ásamt þeim systrum
eru Dísella, Esther Jökulsdóttir,
Guðbjörg Magnúsdóttir og Mar-
grét Árnadóttir. Um undirleik sjá
þeir Óskar Þormarsson, Vignir
Þór Stefánsson, Ólafur Þór Kristj-
ánsson og Pétur Valgarð Péturs-
son. „Allir vilja hafa þetta ofsa-
lega flott og við erum búnar að æfa
vel. Það er mikill metnaður fyrir
því að hafa þetta flotta tónleika
og eftirminnilega stund. Það voru
allir boðnir og búnir að leggja sína
vinnu í þetta og við fengum meira
að segja allt niður í posann gefins,“
útskýrir hún.
Miðasala verður við inngang-
inn og rennur allur ágóði óskiptur
til Fjölskylduhjálpar. „Fólk hefur
verið að spyrja hvort það sé ekki
forsala eða hvort hægt sé að panta
miða, þannig að við eigum von á
góðri mætingu,“ segir Soffía. - ag
Syngja til styrktar
Fjölskylduhjálp
N1 Deildin
KARLAR
Fimmtudagur
Höllin
Digranes
AKUREYRI - HAUKAR
HK - GRÓTTA
19:00
19:30
2009 - 2010
LÁTA GOTT AF SÉR LEIÐA Jólatónleikarnir til styrktar Fjölskylduhjálp fara fram í Víði-
staðakirkju í kvöld og hefjast klukkan 20. FRÉTTABLAÐIÐ/ANTON