Vikan - 04.12.1975, Síða 88

TVEIR DRAUMAR G.G.
Kæri draumráðandi!
Ég hef aldrei skrifað þér áður, en þessir tveir draumar
valda mér svo miklum heilaþrotum, að ég get ekki
á mér setið aö þiðja þig um að ráða þá.
Hinn fyrri var á þessa leið:
Ég var heima að passa litla bróður minn, sem í
rauninni er ekki nema sex mánaða, en í draumnum
var hann ellefu mánaða. Með mér var stelpa, sem
við skulum kalla E. Hún var búin að eignast stelpu,
sem var mjög tataraleg í útliti og í draumnum var hún
sex mánaða. Allt í einu var rauðum bíl, sem var
með eitt framhjól og tvö afturhjól, ekið inn í herbergið.
í honum voru tveir amerískir strákar, sem ég þekki,
og tvær vinkonur mínar, sem E. þekkir ekki. Þau spurðu
okkur, hvort við vildum koma á rúntinn. Við sögðum:
Nei, haldið þið, að við verðum ekki að passa þessa
krakka. Svo fórum við að grenja af reiði og henda
krökkunum í vegginn.
Ég vaknaði snöktandi.
Hinn draumurinn var svona:
Ég var ásamt pabba á sveitabæ og þar var stödd
stelpa, sem við skulum kalla X. Hún var þarna
í sumarleyfi. Ég heilsaði henni og svo fórum við í
gönguferð upp um hóla og hæðir. Það var mikið sól-
skin. Allt í einu sáum við kastala. Við urðum ákaf-
lega hissa og hlupum heim á bæinn að segja frá
þessu. Þá vár okkur sagt, að þarna hefði átt heima
greifi, sem hefði drepið sig fyrir ævalöngu. Ég
baö pabba að koma með okkur því að okkur langaði
að sjá kastalann að innan. Pabbi sagði, að við skyldum
ekki fara þangað, en við fórum samt. Þá var ekki eins
mikið sólskin og þegar við komum að kastalanum, var
orðið dimmt. Við komum að útidyrahurðinni og eftir
nokkurt stímabrak tókst okkur að opna hana. Það
marraði í henni, þegar hún opnaðist og við hrukkum
í kút. Þá sáum við andlit svífa í lausu lofti. Það
sneri sér hægt við og horfði á okkur stingandi
augum. Við urðum lamaðar af hræóslu og hlupum út,
og hentum okkur á hurðina, svo hún skelltist aftur.
í því vaknaði ég.
Með kveðju,
G.G.
Ef þú ferð ekki varlega í samskiptum þínum við
karlmenn, er hætt við, að þú lendir í vandræðum.
LÆKNIS VITJAÐ.
Kæri draumráðandi!
Mig dreymdi eftirfarandi draum í nótt. Mér fannst ég
vera í langri biðröö. Við biðum eftir því að komast til
læknis, sem var að taka á móti fólkinu. Hann stóð
þarna við borð, en virtist ekki hafa neina sér læknisstofu,
heldur var borðið bara meðal fólksins.
Þegar kom loksins að mér, var ég hálffeimin, en
stundi því þó upp, að X læknir hefði sagt þetta....,
sem ég man ekki hvað var, en eitthvað var það í sambandi
við veikindi. Allt i einu hallaði læknirinn sér að mér og
ýtti pennanum sínum fast í kinnina á mér. Mér fannst
eins og hann væri að ávíta mig fyrir eitthvað. Þá varð
ég reið og æddi út. Mér fannst hann koma á eftir
mér og sá ég skuggann hans, áður en hann kom til
mín. Hann virtist sjá eftir því að hafa verið svona við
mig. Ég var niðurlút og var að hugsa um að fyrirgefa
honum.
Allt í einu fannst mér ég vera komin upp á deild — ekki
man ég hvaða deild — í sjúkrahúsinu. Mér fannst
ég vera í fínum kjól og hélt ég á öðrum skónum
mínum í hendinni. Hann var bleikur á litinn og þegar
ég leit undir hann, sé ég, að þar stóð talan 347.
Ég kom að hurðinni og leit tvisvar á númerið á
henni og síðan undir skóinn til þess að fullvissa mig
um, að þetta væri rétt númer. Á ganginum mætti ég
tveimur læknum. Annar, sem var eldri maður, spurði
mig að nafni, og ég sagði honum til nafns, sem var
alls ekki mitt rétta nafn. Einnig vildi hann fá að
vita, hvert ferð minni væri heitið, og sagði ég
honum það og nefndi númer stofunnar. Þeir bæði
hálfbrostu og urðu hálfmæddir á svip.
Samt fannst mér ég eiga von á einhverju skemmti-
legu þarna inni í herberginu og var ákaflega spennt
að sjá hvað þar biði mín, en ég vaknaði, áður en
ég kæmist svo langt að opna hurðina.
Með von um ráðningu.
Ein mjög hugsi.
Þessi draumur virðist vera mjög tengdur framtíðar-
áformum þínum. Þú átt mjög erfitt með að gera upp
við þig, hvort af tvennu þú tekur þér fyrir hendur, en
fyrir orð eldri vinar þíns, velurðu erfiðara starfið og
ert í fyrstu ekki alveg viss um, hvort þú ræður við
það.
KYRTILKLÆDDAR STÚLKUR.
Kæri draumráðandi!
Mig dreymdi, að ég stóð í dyrum Fríkirkjunnar í
Reykjavík og sá stúlkur klæddar í hvíta kyrtla með
rúnnuðum kraga og að framan voru kyrtlarnir skreyttir
rauðum útsaumi.
Hvað merkir þessi draumur?
Með kveðju.
H.M.
Þú eignast að öllum líkindum nýja vini, sem munu
reynast þér afskaplega vel. Eins getur verið, að þú
kynnist nýrri og betri hlið á einhverjum, sem hafa verið
þér til ama hingað til.