Tímarit lögfræðinga - 20.12.1990, Page 68

XVI. Staða Dómarafélags íslands og framtíð
í skýrslu stjórnar sem lögð var fram á síðasta dómaraþingi var þess getið að
nauðsynlegt væri á þeim tímamótum sem framundan væru í dómstólaskipaninni
að skoða sérstaklega stöðu Dómarafélags íslands. Til athugunar þyrfti að koma
hvort rétt væri að halda uppbyggingu og starfi félagsins óbreyttu eða hvort
breytingar á dómstólaskipaninni kölluðu á breytingar á félagsskipaninni.
Stjórnin hefur lítillega rætt um þetta mál en hefur ekki mótað tillögur um
hvernig best verði að þeim unnið. Sama nauðsyn er þó fyrir hendi og fyrr en ef til
vill er málið ekki jafn brýnt og haldið var, enda má vel hugsa sér að
félagsskipanin geti staðið fyrst um sinn eftir að aðskilnaðurinn hefur orðið og
víst er að sýslumenn og dómarar þurfa að vinna saman að ýmsum málum eftir
þann tíma. Gæti því verið skynsamlegt að sjá hvað reynslan leiðir í ljós í þessum
efnum og taka að því búnu ákvarðanir um félagsskipanina til frambúðar.
Reykjavík 29. október 1990.
Friðgeir Björnsson Halldór Kristinsson Haraldur Henrýsson
Pétur Kr. Hafstein Valtýr Sigurðsson
266