Bændablaðið - 31.10.2013, Síða 30
30 Bændablaðið | Fimmtudagur 31. október 2013
Heimilis- og starfsfólk dvalar- og
hjúkrunarheimilisins Grenilundar
á Grenivík í Grýtubakkahreppi hélt
á dögunum upp á þau tímamót að 15
ár eru liðin frá því að starfsemi þess
hófst. Boðið var upp á afmælisköku
og kaffi. Ingólfur Ásgeirsson söng
nokkur hugljúf lög við undirspil
Petru Bjarkar Pálsdóttur og séra
Bolli hélt messu með gestum og
heimafólki.
Á afmælisdaginn sjálfan var létt
kráarkvöld þar sem hægt var að fá
sér sérrístaup eða bjór eða þá kaffi og
koníak. Hljómsveitin Hlíðin mín fríða
lék fyrir dansi og valdi sérstaklega
til flutnings gömlu lögin sem allir
geta sungið með. Talsverður fjöldi
gesta mætti á svæðið og var dansað
og sungið og einnig hlegið hressilega
meðan Siggi í Alaska, rúmlega
áttræður uppistandari, sagði nokkrar
vel valdar gamansögur.
G r e n i l u n d u r ,
sambýli aldraðra
á Grenivík, var
byggður 1997–1998
og fyrstu íbúar fluttu
inn í september
1998. Heilsugæslan
á Grenivík var
byggð í sama húsi
og er staðsett í
norðausturenda
húss ins . Á
Grenilundi búa
að jafnaði níu
íbúar. Átta íbúar
eru með fasta
búsetu og eitt
skammtímarými. Grenilundur
þjónar mikilvægu hlutverki í
sveitarfélaginu, bæði fyrir aldraða og
einnig hvað atvinnumöguleika varðar.
Áfram í heimabyggð þótt
heilsunni hraki
„Við leggjum áherslu á heimilislegt
andrúmsloft og gott umhverfi, það er
kjarninn í allri starfsemi okkar,“ segir
Fjóla Stefánsdóttir, forstöðumaður á
Grenilundi. Hún segir eldri borgara
í Grýtubakkahreppi þurfa að eiga
góðan aðgang að búsetuformi sem
hæfi aðstæðum þeirra, þar sem
auðvelt sé að mæta þörf þeirra fyrir
þjónustu, þannig að þeir geti áfram
búið í heimabyggð sinni þó svo að
heilsunni hraki.
„Það eru grundvallarmannréttindi,”
segir hún. „Það er líka mikilvægt að
aldraðir geti, svo lengi sem þeim er
unnt, búið við eðlilegt heimilislíf,
en jafnframt að þeim sé tryggð
nauðsynleg stofnanaþjónusta þegar
hennar er þörf.“
Fjóla segir að stofnanir, m.a.
hjúkrunarheimili eins og við þekkjum
þau, með sjúkrahúsmiðaða starfsemi
og starfsfólk sem ákveður alla hluti
muni smám saman heyra fortíðinni til.
„Það hefur orðið jákvæð þróun
í öldrunarþjónustu á Íslandi,
hjúkrunarheimili eru nú óðum að
breytast í heimili íbúanna þar sem
starfsemin tekur mið af venjum þeirra
og lífsháttum.“
Skref í rétta átt
Fjóla nefnir að stefna stjórnvalda
sé sú að færa lögbundna þjónustu
við aldraða frá ríki til sveitarfélaga
og segir að það sé skref í rétta átt.
„Við megum samt ekki flýta
okkur um of, eins og oft vill
verða hjá okkur. Það er að mörgu
að hyggja og ég nefni sem dæmi
lífeyrisskuldbindingar sem hvíla á
dvalar- og hjúkrunarheimilum. Það
þarf líka að taka tillit til reynslu af
tilfærslu þjónustu við fatlað fólk
yfir til sveitarfélaganna. Bæði
sveitarfélögin og ríkið þurfa tíma
til að undirbúa mótttöku svo stórra
verkefna og það þarf að gæta að
því að fjárhagslegar forsendur liggi
fyrir,“ segir hún.
Öldruðum mun fjölga
umtalsvert
á næstu áratugum
Stærsta verkefnið á þessum
vettvangi segir hún þó vera
fyrirsjáanlega fjölgun þeirra sem
verða 67 ára og eldri. Samkvæmt
mannfjöldaspám Hagstofunnar
muni álíka margir fæðast hér á landi
árið 2045 og fæddust árið 2005, en
fjöldi aldraðra mun á sama tímabili
tvöfaldast. Fæðingum muni því
ekki fjölga næstu 45 ár, en þeim
sem ná 67 ára aldri mun fjölga um
100 prósent frá því sem nú er.
„Þessi staðreynd sýnir hve brýnt
er að takast á við verkefnið af
krafti, sýna fyrirhyggju og byggja
upp úrræði sem mæta fólki á því
þjónustustigi sem best hæfir á
hverjum tíma,“ segir Fjóla.
/MÞÞ
Dvalar- og hjúkrunarheimilið Grenilundur í Grýtubakkahreppi 15 ára:
Mikilvægt að aldraðir búi við eðlilegt heimilislíf
Guðrún Sigurðardóttir, Fjóla Stefánsdóttir og Gísli Björnsson. Myndir / MÞÞ
Valgerður Jónsdóttir, Jóhanna Daðadóttir, Jórlaug Daðadóttir, Guðný Sverrisdóttir, Þórgunnur Eyfjörð og Elísa
Ingólfsdóttir.
Ingibjörg Siglaugsdóttir og Ólafur Kjartansson.
Guðrún Sigurðardóttir og Kristján
Jóhannsson.