Dagblaðið Vísir - DV - 25.03.2011, Blaðsíða 32

32 | Viðtal 25.–27. mars 2011 Helgarblað
É
g var langyngstur á hjarta­
deildinni,“ segir Svavar
Halldórsson, fréttamað­
ur á RÚV, en fyrir fjórum
árum fékk hann hjarta­
áfall aðeins 37 ára að aldri. Svavar seg­
ir hjartaáfallið hafa komið til vegna
erfða, neysluvenja og ekki síst þess
mikla álags og streitu sem fylgi því að
vera fréttamaður. Því álagi fékk hann
til að mynda að kynnast í vikunni þeg­
ar kveðinn var upp úrskurður í meið­
yrðamáli Pálma Haraldssonar á hend­
ur honum.
Svavar hlaut fulla sýknu í héraðs­
dómi ásamt samstarfsfólki sínu, Maríu
Sigrúnu Hilmarsdóttur og Páli Magn­
ússyni, en fagnaðarlæti brutust út í
dómsal þegar niðurstaðan lá fyrir.
Svavar segir málshöfðanir Pálma og
Jóns Ásgeirs Jóhannessonar á hendur
sér til að hræða blaðamenn og heim­
ildarmenn þeirra. Svavar segist fyrr
láta dæma sig sekan en að gefa upp
heimildarmenn sína.
Svavar er mikill fjölskyldumaður og
á þrjár dætur úr fyrra sambandi auk
fimm ára sonar og tveggja ára dóttur
með sambýliskonu sinni, sjónvarps­
stjörnunni Þóru Arnórsdóttur. Á góð­
ærisárunum hafnaði hann hálauna­
starfi til þess að geta eytt meiri tíma
með fjölskyldunni og einsetur hann
sér að vera manneskja sem börnin geti
verið stolt af.
Reyndi að fá tíma
hjá hjartalækni
„Þetta var mikið sjokk,“ segir Svavar um
hjartaáfallið en hann var í sumarfríi
með fjölskyldunni þegar hann hneig
niður. „Ég var mjög heppinn. Það kom
ekkert drep í hjartað sem hefði ver­
ið mjög slæmt.“ Svavar var staddur á
Siglufirði í heimsókn hjá systur sinni
þegar hann fékk hjartaáfallið.
„Ég var búinn að reyna að panta
tíma fyrir sumarfríið. Ég hafði þegar
fundið fyrir mæði, einhverjum sting
og óþægindum.“ Það var kransæð sem
stíflaðist með fyrrgreindum afleiðing­
um.
Svavar telur ástæðuna fyrir hjarta­
áfallinu hafa verið margþætta. „Að
einhverju leyti gen, maður passaði sig
ekki nægilega vel í mat og drykk og
svo starfið sem ég valdi mér. Það er oft
gríðarlegt álag sem fylgir þessu starfi
og stíf tímapressa. Ég er mikið í stærstu
og þyngstu málunum og því fylgir auk­
ið álag,“ segir Svavar en hann vill vera
þar sem mesti hasarinn er, fyrst hann
er í þessu starfi á annað borð. „Á með­
an ég er í þessu starfi þá vil ég vera þar.
Í eldlínunni og í stóru málunum. Svo
vil ég auðvitað líka gera hverja og eina
frétt vel. Ef ég get gert fréttina vel og
það er aðalfréttin þá leggst ég sáttur á
koddann,“ segir hann og brosir. „Það
er viss umbun í því að eiga fyrstu frétt.
Þá finnst mér ég hafa skilað góðu dags­
verki. Maður fær alla vega ekki umbun
í launaumslaginu í þessu starfi.“ Hins
vegar er starfið afskaplega gefandi og
skemmtilegt segir Svavar. „Samstarfs­
fólkið á fréttastofunni er líka frábært,
valinn maður í hverju rúmi og eigin­
lega engir veikir hlekkir.“ Álagið hafi
aukist gríðarlega frá hruni á sama tíma
og skorið hafi verið mikið niður. „Það
beita sko allir bjóðin sín og enginn sem
getur tekið því rólega á fréttastofunni.“
Allt getur breyst á augabragði
Svavar prísar sig sælan eftir áfallið en
hann er við góða heilsu í dag. „Þetta
fór betur en á horfðist og maður passar
sig mun betur í dag. Það skiptir mestu
máli að hreyfa sig reglulega.“ Það
breytti lífsviðhorfum Svavars að upp­
lifa áfall af þessu tagi. „Maður áttar sig
á því hvað hlutirnir geta breyst hratt.“
Svavar segir ýmislegt koma upp í lífi
hvers og eins sem fái fólk til að endur­
skoða hlutina og það hafi hann gert
fyrir um áratug. „Fyrir svona tíu árum
fór ég í ákveðna sjálfsskoðun og ákvað
að setja mér persónuleg prinsipp. Ég
reyndi að skoða mig eins hlutlaust og
hægt er. Hvernig manneskja ég væri og
hvernig manneskja ég vildi vera. Svo
reyndi ég að sníða agnúana af.
Ég hugsa þetta aðallega út frá því
að ég geti verið maður sem börnin
mín geti verið stolt af. Ef börnin mín
eru spurð að því hver sé pabbi þeirra
geti þau svarað því með stolti. Það er sá
maður sem ég vil vera. Þó svo að það
takist auðvitað ekki alltaf. En á með­
an ég reyni þá held ég að ég nálgist
það.“ Hann segir þetta svipað í frétta­
mennskunni. Ef maður reyni að vera
sanngjarn og hlutlaus en um leið
gagnrýninn og beittur, þá fari maður
væntanlega nærri því þótt það takist
kannski ekki alltaf.
Fjölskyldan númer eitt
Svavar leggur mikla áherslu á fjöl­
skylduna og segir börnin alltaf vera í
fyrsta sæti. Annað komi einfaldlega
þar á eftir. Til að mynda bauðst Svav­
ari vel launað starf utan fjölmiðlageir­
ans í góðærinu en það hefði þýtt mikla
fjarveru frá börnunum og ferðalög er­
lendis. „Fyrsta spurningin sem ég fékk
í atvinnuviðtalinu var: „Spilarðu golf?“
Ég hugsaði þá; vel launað starf þar sem
ég sé ekki börnin eða illa launað blaða­
mannsstarf þar sem ég get átt góðan
tíma með börnunum. Valið var ekki
erfitt.“
Þegar Svavar skildi við barnsmóð­
ur sína sem hann á stelpurnar þrjár
með ákvað hann að halda áfram að
taka virkan þátt í uppeldinu. „Ég ákvað
strax að ég ætlaði ekki að vera einhver
helgarpabbi sem setur pening í um­
slag um jólin. Heldur ætlaði ég að vera
alvörupabbi og taka þátt í uppeldinu.
Ég hef gert það allan tímann og það
eru mjög góð tengsl þarna á milli. Sem
er mjög mikilvægt og þær eiga tvö frá­
bær heimili.“
Svavar segir það þó auðvitað hafa
verið erfitt að ganga í gegnum skiln­
að. „Tölum ekki um þegar þú ert með
þrjú börn á leikskólaaldri. Þetta er ekk­
ert grín og ég mæli ekki með þessu við
neinn. En okkur hefur alltaf tekist að
hafa dæturnar í öndvegi og þetta hefur
gengið mjög vel.“
Sálufélaginn Þóra
Í dag er konan í lífi Svavars, eins og fyrr
sagði, Þóra Arnórsdóttir sjónvarps­
kona. Þóra sagði frá því í viðtali við DV
fyrir nokkru að það hefði verið skrítið
að hugsa til þess að sálufélagi henn­
ar hefði verið starfandi í sama húsi
og hún í þó nokkurn tíma áður en
þau kynntust. Þótt þau þekktust fyr­
ir lágu leiðir þeirra fyrir alvöru saman
fyrir hálfgerða tilviljun þegar nokkrir
vinnufélagar hittust eftir vinnu. Meira
þurfti ekki til og ástin blómstraði. Sú
ást hefur alið af sér son sem er nú fimm
ára og dóttur sem er tveggja ára. Svav­
ar er þakklátur fyrir konuna í lífi sínu
og fyrir þann stuðning sem þau veita
hvort öðru.
„Þóra er frábær og við erum mjög
samhent. Við vinnum í sama bransa
og höfum að minnsta kosti tvisvar
upplifað það að vinna á hvort á sínum
miðlinum. Það var ekkert vandamál.“
Svavar segir að engir árekstrar séu á
milli atvinnu og einkalífs, heldur þvert
á móti. „Það er frekar að við köstum
á milli okkar hugmyndum og ræðum
hlutina. Hún á til dæmis oft hugmynd­
ir að málum sem ég er að vinna að og
öfugt.“
Svavar segir þau líka gagnrýna
hvort annað á uppbyggilegan hátt.
„Það er mjög gott að vera með sinn eig­
in ráðgjafa í þessu. Það getur líka verið
óþolandi að horfa á fréttir með okkur
þar sem við ræðum hvert einasta smá­
atriði í hörgul og veltum upp öllum
hugsanlegum vinklum.“
Sannleikur Svavars
Það var fyrir einskæra tilviljun að Svav­
ar rataði yfirhöfuð í fréttamennsku.
Svavar fór í háskólanám um þrítugt en
fram að því hafði hann starfað í hinu
og þessu. Hann hafði meðal annars
verið á sjó og stofnað sitt eigið fyrir­
tæki. Hann fór á endanum í stjórn­
málafræði í Háskóla Íslands og tók svo
master í opinberri stjórnsýslu.
„Það var svo fyrir rælni að ég sótti
um starf hjá fréttastofu útvarpsins á
meðan ég var í háskólanum. Vinkona
mín sem var með mér í náminu var
að sækja um og ég skilaði líka inn um­
sókn bara að gamni. Ég var svo boð­
aður í fréttamannapróf og hef verið í
þessu síðan.“ Svavar hefur að auki tek­
ið að sér nokkur verkefni þar sem hann
nýtir stjórnmálafræðimenntunina sér­
staklega, meðal annars í samvinnu
við erlenda háskólamenn sem eru að
rannsaka hrunið. Hann er formaður
í Félagi stjórnmálafræðinga og fylgist
enn vel með í fræðunum.
Svavar er þakklátur fyrir að hafa
byrjað blaðamennskuferil sinn á
fréttastofu Útvarpsins því þar hafi
hann lært vönduð og góð vinnubrögð
sem hafi fylgt honum alla tíð. Svavar
er til að mynda sannfærður um að þau
vinnubrögð hafi hjálpað honum í mál­
um eins og þeim sem Pálmi Haralds­
son höfðaði gegn honum. En hvernig
var tilfinningin á þriðjudagsmorgun
þegar sýkna lá fyrir í málinu?
„Það var frábær tilfinning að fá
fulla sýknu. Maður var búinn undir
það versta en vonaði það besta,“ segir
Svavar en baráttan er einungis hálfn­
uð því að Pálmi hefur áfrýjað mál­
inu til Hæstaréttar. „Ég hef fulla trú
á Hæstarétti í málinu og hef í raun
engar áhyggjur. Ég hef sagt allan tím­
ann að sannleikurinn sé mín megin.
Við hjá Ríkisútvarpinu skömmumst
okkar ekki neitt fyrir að leiðrétta vit­
leysur sem kunna að rata út í frétta­
tímanum. Kjarni málsins er hins vegar
sá að ég hef engu logið og engu stolið.
Fréttin var byggð á rannsóknarvinnu
og traustum heimildum. Hún stend­
ur óhögguð þrátt fyrir harða atlögu
Pálma.“
Frétt Svavars af Fons
Fréttin sem Svavar sagði af Pálma var
um 2,5 milljarða sem Fons, fyrirtæki
Pálma, fékk að láni frá Glitni fyrir hrun
þar sem skuldaviðurkenning frá Baugi
var sett sem veð. Í fréttinni segir að
peningarnir hafi „horfið í reyk“ eins og
Svavar orðaði það. Pálmi kærði Svav­
ar fyrir meiðyrði en hluti af málsvörn
Pálma var að það hefði verið Fons sem
tók lánin en ekki Pálmi persónulega.
„Við fundum yfir fimmtíu dæmi
þar sem hann hefur sjálfur samsamað
sig við Fons. Þannig að sá hluti máls­
höfðunarinnar stenst enga skoðun.
Síðan kemur hann með nótur og segist
geta gert grein fyrir því hvað varð um
peningana. Þeir hafi að mestu farið í
að greiða upp lán í Landsbankanum.
Hann sýndi í raun bara fram á eina
færslu einhverra peninga á milli reikn­
inga Fons í Glitni og Landsbankanum.
Ekkert endilega sömu peninga. Fyrir­
tækið velti milljörðum á þessum tíma
og Fons fékk til dæmis annað lán hjá
Glitni í sömu vikunni upp á tíu millj­
arða. Svo stendur skýrt í lánasamn­
ingnum á milli Fons og Glitnis að féð
skuli fara til fjárfestinga. Hvernig getur
það talist fjárfesting að borga upp gam­
alt lán? Ef Pálmi hefði í raun haft ein­
hvern hug á því að sýna hvað varð um
þessa peninga þá hefði hann lagt fram
reikningsyfirlit, lánasamninga og mik­
ið víðtækari gögn þar sem hann hafði
augljóslega aðgengi að bókhaldsgögn­
um Fons. Hann sýnir í raun bara fram
á pínulítinn part af vegferð verðmæta
sem enduðu auðvitað einhvers staðar.
Hann tók lán í Landsbankanum, eng­
inn veit hvert það fór, fékk svo annað
lán í Glitni og segist hafa notað það til
að borga upp Landsbankalánið. Stað­
reyndin er eftir sem áður að hann
sýndi ekki fram á hvar verðmætin end­
uðu. Svo er þetta ennþá ógreitt í Glitni
og Fons er í 40 milljarða gjaldþroti. Ég
sagði að peningarnir væru týndir sem
er rétt og þeir hafa aldrei verið greiddir
til baka. Staðreyndin er einfaldlega sú
að málatilbúnaður Pálma snerist um
að sýna fram á hvað varð um pening­
anna, að fréttin væri röng að því leyti.
Honum mistókst það. Dómarinn sá
sem betur fer í gegnum þetta og fréttin
stendur.“
„Fyrr læt ég dæma mig“
Bæði Pálmi og Jón Ásgeir Jóhannes­
son hafa svo stefnt Svavari vegna
frétta sem hann sagði af viðskipt­
um Fons og Pace í Panama. „Fréttin
gengur í stuttu máli út á það að Fons
millifærði þrjá milljarða á Pace í Pan­
ama. Sex dögum síðar var gengið frá
Svavar Halldórsson fréttamaður á RÚV fékk
hjartaáfall fyrir fáeinum árum. Hann segir hluta
ástæðunnar vera álagið sem fylgi starfinu. Svavar
segir það hafa verið erfitt að ganga í gegnum skilnað
með þrjú börn á leikskólaaldri en að hagur barnanna
hafi orðið ofan á. Hann nýtur stuðnings frá sálufélaga
sínum, Þóru Arnórsdóttur, í leik og starfi og fjölskyld-
an reynir að slá eigið tímamet í að tjalda í sumarfríinu.
Ásgeir Jónsson ræddi við Svavar um meiðyrðamálin
gegn honum, starfið sem hann hafnaði fyrir fjölskyld-
una í góðærinu og hótelið sem hann ætlar að reka
með fjölskyldunni í sumar.
LANGYNGSTUR
Á HJARTADEILDINNI
Fagnaðarlæti í dómsal Þóra og Svavar
faðmast eftir að hann, María Sigrún og Páll
Magnússon voru sýknuð.
MYND SIGTRYGGUR ARI
Ríkur maður Börnin hans Svavars.
„Ég var mjög hepp-
inn. Það kom ekk-
ert drep í hjartað sem
hefði verið mjög slæmt.