Húnavaka - 01.05.2015, Page 9
Ávarp ritstjóra
Ágætu lesendur!
Að þessu sinni lítur 55. árgangur Húnavökuritsins dagsins ljós. Efni þess er fjölbreytt að
vanda; frásagnir, kveðskapur, mannalát, fréttir og annar fróðleikur. Ritstjóri og ritnefnd þakka
öllum þeim sem leggja lið við öflun efnis. Án hinna mörgu hollvina ritsins væri það fljótt að
leggja upp laupana.
Að þessu sinni ber sérstaklega að þakka Héraðsskjalasafni A-Hún. og starfsmanni þess,
Guðmundi Paul Jónssyni, sem lagt hafa til myndir í nokkrar greinar í ritinu.
Árið 2014 var frekar tíðindalítið í A-Hún. Flestir hlutir voru í föstum skorðum,
grunnatvinnuvegirnir; landbúnaður og sjávarútvegur, breyttust lítið, iðnaður átti almennt
undir högg að sækja, opinber þjónusta stóð að mestu í stað og ný tækifæri voru fá. Íbúum
sýslunnar og reyndar alls Norðurlands vestra, fækkar hægt en bítandi, mest fækkar í yngstu
aldursflokkunum, aldurspýramídinn skekkist.
Þessi þróun er ekki bara bundin við þennan landshluta. Á flestum svæðum utan Stór-
Reykjavíkursvæðisins er fólksfækkun og æ færri hendur standa undir þjónustukröfum
samfélagsins. Auk þess er Norðurland vestra í heild lágtekjusvæði og það hjálpar heldur ekki
til.
En er eitthvað til ráða? Er hægt að snúa þessari þróun við? Nú eru að störfum tvær nefndir
á Norðurlandi vestra; Norðvesturnefndin og A-Hún. nefndin, sem báðar leitast við að finna
„lausnir“ á þessu verkefni. Hætt er við að það geti reynst torsótt leið og þær tillögur sem heyrst
hafa virðast við fyrstu sýn lítt raunhæfar.
Að mínu mati er verkefnið tvíþætt; atvinnutengt og hugarfarstengt. Á Norðurlandi vestra
verður enginn umsnúningur í atvinnulegu tilliti nema til komi stór iðnaðartækifæri þar sem
talað verður um hundruð starfa, ekki bara einhverja tugi. Þessi störf þurfa einnig að vera vel
launuð til að laða að fólk inn á svæðið.
Stór iðnaðartækifæri eru í flestum tilvikum raforkufrek og eins og stendur er lítil
umframorka til í kerfinu, auk þess sem flutningslínur geta verið hamlandi við flutning hennar
milli landshluta. Á hinn bóginn er stórt orkuver við bæjardyrnar, Blönduvirkjun, sem nú þegar