Húnavaka - 01.05.2015, Side 32

H Ú N A V A K A 30
Félagslífið
Merete: Ekki er mikið um beint félagslíf hérna í sveitinni sem kallaðist
Skefilsstaðahreppur þangað til árið 1998 þegar öll sveitarfélögin í Skagafirði
nema Akrahreppur sameinuðust. Hér er kvenfélag starfandi en flestar
konurnar orðnar aldraðar og því ekki kraftmikið í dag. Ekki er mikið um
samkomur nema þá stórafmæli en við búum svo vel að eiga fallegt félagsheimili
hér í sveitinni sem heitir Skagasel. Þorrablót eru haldin af miklum krafti á
hverju ári, ávallt afar vel sótt og skemmtileg og margur maðurinn sem þá fær
á baukinn.
Ég er með átta konum í leshring, við hittumst einu sinni í mánuði og ræðum
bókina sem við vorum að lesa og svo er auðvitað margt annað skemmtilegt
skrafað. Síðan er stundum farið á hestbaki á milli bæja og árlega fer ég með
konum af Reykjaströndinni í lengri hestaferðir. Ég söng einn vetur í
Rökkurkórnum og núna er ég nemandi í Tónlistarskóla Skagafjarðar og er að
læra á fiðlu. Steini er félagi í Lionsklúbbi Skagafjarðar og starfar einnig nokkuð
fyrir Rauða krossinn, auk þess að sinna félagsmálum trillukarla á Norðurlandi
vestra en þeir hafa með sér félagsskap sem heitir Skalli.
Framtíðin
Merete og Steini: Byggðin hér á Skaganum hefur grisjast afar mikið. Þar eru
margar góðar jarðir sem ekki eru setnar eða standa tæpt. Nýlega flutti þó ungt
par að Hvalnesi og er þar að koma sér upp bústofni. Það er kannski ekki
ástæða til að vera með svartsýni en það er brýnt fyrir þessa sveit að komast í
gott netsamband. Núna er mjög misjafnt hvernig skilyrðin eru en ef
netsamband er gott þá opnast möguleikar á að vinna við ýmis verkefni sem
krefjast ekki endilega viðveru á ákveðnum stað.
Þessi jörð, Hraun, sem við búum á er eftirsóknarverð og vel hægt að búa
hér þokkalega góðu búi og hafa ágætar tekjur. Það er þægilegt að búa á
Skaganum, auðvelt að smala og við erum ekki svo langt frá þeirri þjónustu sem
þéttbýlið býður upp á. Ef Skaginn sem landbúnaðarsvæði lifir ekki af þá á nú
margt eftir að breytast.
Við höfum þá trú að Íslendingar vilji hafa traustar undirstöður og neyta
þeirra afurða sem margvíslegur og fjölbreyttur landbúnaður gefur af sér. Við
vitum að allt tekur breytingum, vitum að fjölbreytni landbúnaðarins er stöðugt
að aukast og erum bjartsýn á að sveitirnar muni halda velli þótt með öðrum
svip verði. Án efa breytast viðhorf og ýmislegt verður áreiðanlega með öðrum
hætti en nú er þegar tímar líða fram. Þannig er nú bara lífið sjálft og við
tökumst glöð á við þau verkefni sem framtíðin færir okkur.