Húnavaka - 01.05.2015, Síða 44

H Ú N A V A K A 42
hafði hann lært við skógarhögg í Noregi. Stærri sleðar voru notaðir þar sem
hægt var að koma því við, m.a. þá sleðafæri var á ám og vötnum.
Afi var um árabil endurskoðandi hjá samvinnufélögunum á Blönduósi og
hann var stjórnarformaður sparisjóðsins. Þar var opið tvisvar í viku og vann
afi þar oftast, þá þar var opið. Afi hljóp því marga daga til Blönduóss. Þegar
Vatnsdalsáin og eylendið var á ís hljóp hann beint af augum og fór hratt yfir,
stiklaði á þúfunum. Sagði afi einhverju sinni frá því að eitt sinn hefði maður
beðið leyfis að verða honum samferða þessa leið. Þá gat afi ekki hlaupið, varð
að ganga á hraða mannsins. Aldrei hafði hann verið jafn þreyttur eftir ferð frá
Blönduósi og það kvöld.
Í nokkur ár var afi markaðshaldari fyrir samvinnufélögin og keypti hross
sem seld voru til Englands og notuð í kolanámum þar. Afi mældi hrossin og
skráði aldur þeirra. Verðið var fyrirfram ákveðið og fór það eftir aldri þeirra.
Faðir minn fór ungur með honum á markaði í héraði þar sem hrossum var
safnað saman og þau síðan rekin til Reykjavíkur.
Áður var nefnt að erlendir veiðimenn hefðu farið að venja komur sínar í
Sveinsstaði um og eftir 1930 og skildu eftir tekjur fyrir veiðileyfi og þjónustu.
Allt hjálpaði þetta til við að komast yfir hinar miklu skuldir af húsbyggingunni
1929 en úrslitum réð síðan að hagstæð lán fengust úr kreppulánasjóði vegna
skuldanna.
Allavega tókst á næstu árum að rétta fjárhaginn það mikið að árið 1939
voru fjárhúsin byggð. Þá var pabbi nýkominn heim úr búnaðarnáminu á
Hvanneyri fullur af orku og ákveðinn að verða bóndi. Þetta voru steypt fjárhús
sem tóku 100 kindur og við húsin byggð steypt hlaða. Nágrönnum þótti þar í
mikið ráðist og gamlir og grónir bændur veltu fyrir sér að seint myndu
kindurnar borga þessa fjárfestingu. Að byggja steypta hlöðu, sem var 4 sinnum
10 metrar að grunnfleti, þótti fáránlegt. Ekki aðeins að það kostaði mikið
heldur hitt að seint yrði hægt að heyja það mikið á Sveinsstöðum að hlaðan
Séð fram Vatnsdal. Sveinsstaðir í forgrunni. Hjallinn til vinstri.