Húnavaka - 01.05.2015, Side 55

H Ú N A V A K A 53
ÞORSTEINN GUÐMUNDSSON, frá Holti:
Tangó er dansaður af glæsibrag
og trega
Ferð til Argentínu
Í ágúst 2011 eyddum við hjónin fjórum vikum í sumarfríi í Argentínu. Svili minn,
Hartmut, býr þar með eiginkonu sinni, Adriönu, sem er argentínsk og nú eftir mörg ár var
tími til kominn að heilsa upp á þau. Hann var nýkominn á eftirlaun og þau vildu gjarnan
sýna okkur land sitt og þjóð og gáfu sér mikinn tíma í að ferðast með okkur.
Ferðin hófust með flugi frá Frankfurt til Rio de Janeiro í Brasilíu en þar var einungis
stoppað til að skipta um vél og áfram flogið til Buenos Aires. Þar dvöldum við í 3 daga en
síðan var ferðinni heitið til Cordoba, stórrar borgar um 700 km vestar og var sú ferð yfir
slétturnar, sem eru frjósamasti hluti landsins og oft kallað Pampa, farin á einum degi. Þá
var haldið vestur og norður með Andesfjöllunum til Salta en þar býr um hálf milljón
manna. Borgin er í norðvestasta hluta landsins, rétt suður af hásléttunni Altiplano en
þangað var síðan ferðinni heitið að landamærum Bólivíu. Seinasti áfangastaðurinn voru
Iguazu fossarnir. Þaðan var farið til Buenos Aires og sömu leið til baka til Evrópu.
Argentína er á suðurhveli jarðar þannig að ferðatími okkar í ágúst samsvarar febrúar á
norðurhveli. Argentína er rétt tæplega 3.700 km frá norðri til suðurs og með 2,78 milljón
ferkílómetra er landið um 27 sinnum stærra en Ísland. Það er því ljóst að við sáum ekki
nema brot af landinu. Íbúafjöldi landsins er um 43 milljónir og þar af meira en fjórðungur
í Buenos Aires. Argentína er þekkt fyrir hinar víðáttumiklu sléttur en landamæri í vestri að
Síle er Andes fjallgarðurinn mikill og hár. Andesfjöllin taka af úrkomu úr vestri og í skjóli
þeirra er mjög þurrt.
Buenos Aires
Við vorum sótt á flugvöllinn sem er suður af Buenos Aires. Ferðin gekk mjög
greiðlega eftir hröðum brautum. Fyrst fram hjá fátækrahverfum sem mynda
hring eða belti utan um borgina og að því meðtöldu þá eru íbúar borgarinnar
um 14 milljónir. Þangað flyst fólk úr öðrum landshlutum sem er að leita
gæfunnar í stórborginni. Við vorum um sólarhring á leiðinni og að vonum
slöpp en spennt og eftir nokkra hvíld var gengið inn í miðbæ.