Húnavaka - 01.05.2015, Side 98

H Ú N A V A K A 96
áratugina og er í það efni sótt við gerð þessa greinarkorns. Þegar Jónas
Tryggvason flutti til Blönduóss 1959, héldu kórfélagar hans honum veglegt
kveðjusamsæti í Húnaveri. Þar var einnig kvaddur séra Birgir Snæbjörnsson
sem þá var á förum norður í Laufás. Séra Birgir kom nývígður prestur í
Bólstaðarhlíðarprestakall 1952. Hann vann strax hug og hjörtu Bólhlíðinga og
starfaði með kórnum þann tíma er hann þjónaði hér.
Einn félagi í kórnum, rithöfundurinn Guðmundur Halldórsson frá
Bergsstöðum, hefur í sögunni „Undir ljásins egg“ brugðið upp eftirminnilegri
og raunsærri mynd af kóræfingu karlakórsins frá þessum tíma. Sýnt var við
hvaða erfiðleika var að etja. Það var hart í ári. Ótíð og ófærð gerðu mönnum
erfitt um vik til ferðalaga. Menn voru farnir að mæta seint og illa, samt var
fyrirhuguð söngför á næstunni.
Guðmundur Halldórsson var nýbyrjaður í kórnum dagbókarárið 1944.
Hann var formaður kórsins um skeið og félagi þar til hann flutti til Sauðárkróks.
Á árunum frá 1960 til 1970, fór kórinn inn á nýjar brautir. Séra Jón Ísfeld
var þá prestur í Bólstað. Kórinn fór þá að setja á svið leikþætti og leikrit undir
hans stjórn. Þá var vegur Húnavöku mjög mikill. Það var skemmti- og
menningarvika sem ungmennasambandið stóð að. Tók Karlakór Ból-
staðarhlíðarhrepps þátt í þeirri dagskrá um árabil, bæði með flutningi leikþátta
og kórsöng.
Kórinn hefur á merkum tímamótum haldið upp á afmæli sín. Á 35 ára
afmæli kórsins, 1960, skrifaði séra Gunnar Árnason sögu kórsins sem gefin var
út, ásamt frumsömdum sönglögum stjórnendanna. Ritið hlaut nafnið Tónar í
tómstundum. Þetta rit var sérstakt að því leyti að það er allt handskrifað af
listaskrifaranum Guðmundi Tryggvasyni í Finnstungu. Þetta rit var svo
endurútgefið á 60 ára afmæli kórsins 1985 en mun nú ófáanlegt.
Plötuútgáfa
Í tilefni 60 ára afmælisins réðst kórinn í plötuútgáfu. Á þessari plötu eru
eingöngu lög eftir þá sem hafa starfað í kórnum. Söngstjórar voru þá Jón
Tryggvason og Gestur Guðmundsson og söng Gestur einsöng í tveimur lögum.
Á 75 ára afmælinu var þessi vinílplata, sem hlaut nafnið „Tónar í tómstundum“,
færð yfir á geisladisk. Var hún þá löngu uppseld og flestir plötuspilarar ónýtir.
Næst gaf kórinn út geisladisk 1997. Hlaut hann nafnið „Norðlenskar nætur“.
Fékk hann afar góðar viðtökur og er löngu uppseldur. Síðasta verkefni kórsins
var geisladiskur með lögum skagfirska sveiflukóngsins, Geirmundar Valtýssonar.
Kom hann út núna í haust, 2014 og hlaut nafnið „Látum sönginn hljóma“.