Húnavaka - 01.05.2015, Page 160
H Ú N A V A K A 158
Sveinn orti nokkuð í Grindavík. Um þetta leyti
var prestur í Grindavík Brynjólfur Magnússon.
Sunnudag einn bar það við að Sveinn boðaði til
upplestrar á kveðskap sínum en síra Brynjólfur til
guðsþjónustu. En sjóveður var gott þennan dag og
allir bátar á sjó. Mættu þar af leiðandi fáir og
urðu Sveinn og sr. Brynjólfur að aflýsa sínum
„messum“. Um það orti Sveinn:
Viskusnjallir vildu tveir
vekja spjall með dáðum.
Megnum halla mættu þeir;
messufall hjá báðum.
Eitt sinn meðan Sveinn stundaði róðra í
Grinda vík brá hann sér til Sandgerðis. Kom hann
í sjóbúð eina þar sem verið var að borða heita kútmaga og þorsklifur. Sveini
var boðið að smakka þetta hnossgæti. Þá kastaði hann fram eftirfarandi:
Björg á diski best til hagar;
bragastrengir hreyfast skjótt.
Bæði fiska- og meyjamagar
mér hafa löngum sætir þótt.
Á þessum árum var Sveinn upp á sitt besta, rúmlega tvítugur. Hann var vel
í meðallagi hár, eftir því sem þá gerðist, dökkur á brún og brá, örlítið lotinn í
herðum. Hann var fremur laglegur maður. Og víst leit kvenfólkið hann hýru
auga. Ekki þó eingöngu vegna ytra útlits heldur vegna orðheppni hans,
hagmælsku og léttleika í máli. Kvenfólkið bað Svein að yrkja um sig vísur eða
hann orti um þær sem honum geðjaðist að og leist vel á. Skáld og hagyrðingar
hafa lengi, öðrum mönnum fremur, verið orðaðir við konur. Þeir eru hrifnæmir.
Og Sveinn orti til kvenna alla ævi. Honum var kvenlegur yndisþokki kært
yrkisefni. Enginn ætti að lá honum það.
Um Þóru, móður Sveins, hefur nokkuð verið skrifað enda var hún gáfuð
kona og skáldmælt vel. Lítt mun hún þó hafa flíkað gáfu sinni og aðeins ein
vísa er, mér vitandi, til eftir hana. Tilefni vísunnar er það að Sveinn, sonur
hennar, sem þá var unglingur, orti skæting um móður sína. Þóra taldi að
Sveinn færi þarna illa með þá gáfu sem Guð hafði gefið honum og orti:
Gættu þess, að Guð er einn
gáfuna, sem léði.
Ef þú yrkir svona, Sveinn,
sál þín er í veði.
Sýnir þessi vísa, svo að ekki verður um villst, að Þóra hefur verið vel skáld-
Brynjólfur Magnússon prestur
í Grindavík.