Húnavaka - 01.05.2015, Side 166

H Ú N A V A K A 164
Gunda var bæði tónelsk og listræn. Hún söng í kirkjukórnum um tíma og
spilaði á gítar en fyrst og fremst undi hún sér við hannyrðir hvenær sem tími
gafst til. Hún hafði næmt auga fyrir smekklegum hlutum og bar heimili hennar
og Þórarins þess glöggt vitni. Sjálf var hún alltaf glæsileg til fara. Í mörg ár
hafði hún þann sið að sauma sér kjól milli jóla og nýárs sem hún skartaði svo
á dansleiknum á gamlárskvöld. Gunda prjónaði einnig mikið og gerði það af
sömu smekkvísi og með því listræna handbragði sem einkenndi allt sem hún
lagði hönd á. Þá réðust þau hjón stundum í samvinnuverkefni og gerðu m.a.
saman stór blómahengi sem voru með glerplötu í botninum og ljós uppi. Þessir
gripir voru gjarnan seldir og voru vinsælir eins og peysurnar sem húsfreyjan
prjónaði.
Gunda og Þórarinn fluttu til Akureyrar árið 1981 en þá glímdi Þórarinn við
vanheilsu eftir vinnuslys en hann stríddi einnig við hjartveiki sem að lokum dró
hann til dauða árið 1985. Það var að vonum mikið áfall því þau hjón höfðu
alla tíð verið mjög samrýnd og miklir vinir.
Eftir að Gunda var orðin ein nýtti hún ýmis tækifæri til að stytta sér stundir.
Það hafði reynst henni heillaspor að hafa tekið bílpróf því hún var mjög
dugleg að drífa sig á bílnum og sótti gjarnan vinkonur sínar og keyrði fram í
sveitir. Hún eignaðist einnig góðan vin á efri árum, Guðmund G. Halldórsson
skáld, sem var búsettur á Húsavík. Þau urðu miklir sálufélagar og fóru víða um
að selja ljóðabækurnar hans. Svo fannst Gundu gaman að spila og greip
gjarnan í spil með vinkonum sínum og barnabörnunum. Gunda kunni þá list
öðrum betur að láta sér aldrei leiðast. Síðustu árin dvaldi hún á Dvalar- og
hjúkrunarheimilinu Hlíð og þar lést hún. Útför hennar fór fram 19. nóvember
2013 frá kapellunni við Akureyrarkirkjugarð og er hún jarðsett þar í garðinum.
Sr. Hildur Eir Bolladóttir.
Hulda Sigríður Pálsdóttir
frá Njálsstöðum
Fædd 30. september 1916 – Dáin 31. janúar 2014
Hulda var fædd að Njálsstöðum í Vindhælishreppi. Foreldrar hennar voru
Ingibjörg H. Sigurðardóttir (1892-1986) húsfreyja og Páll Sigurðsson
Steingrímsson (1887-1964) búfræðingur og bóndi. Þau hjón eignuðust níu
börn og var Hulda þriðja elst þeirra. Systkini hennar eru: Þormóður Ísfeld
(1914-2007), Þórhallur Aðalsteinn (1915-1965), Sigríður Pálína (1919-1991),
Guðmar Friðrik, f. 1920, Halldóra Nellie (1923-2013), Auður Davíðsína eldri
(1928-1930), Auður Davíðsína yngri (1930-2012) og yngst systkinanna er
Anna María, f. 1932.
Hulda átti öll sín bernsku- og unglingsár heima á Njálsstöðum þar sem
Laxá rennur við túnfótinn, lækir hjala og víðsýni er mikið. Hún tengdist fæð-
ing arstaðnum sterkum böndum. Þangað þótti henni alltaf jafn gott að koma
eða ferðast þangað í huganum. Rifja upp gamlar yndisstundir og upplifa nýjar.