Húnavaka - 01.05.2015, Page 171
H Ú N A V A K A 169
Rannveig Elín Sigurtryggvadóttir,
Kornsá
Fædd 26. september 1920 – Dáin 28. apríl 2014
Elín var fædd að Litlu-Völlum í Bárðardal. Foreldrar hennar voru hjónin
Friðlaugur Sigurtryggvi Tómasson (1863-1935) og seinni kona ha ns, Sigríður
Daníelsdóttir (1890-1979). Elín var fjórða í aldursröð níu alsystkina en fimm
eldri hálfsystkini átti hún. Alsystkini Elínar eru: Sigurður Eyvald, f. 1916, Gísli,
f. 1918, Tryggvi, f. 1919, Valgerður, f. 1922, Daníel, f. 1924, Unnar Sæmundur,
f. 1927, Ingimar Rósar, f. 1928, Baldvin, f. 1930 og stúlka fædd andvana vorið
1935. Hálfsystkini Elínar, samfeðra, voru: Margrét, f. 1890, Tómas, f. 1891,
Kjartan, f. 1892, Nanna, f. 1894, og Jón, f. 1897. Elín var sú síðasta eftirlifandi
af stórum hópi systkina. Hún ólst upp í Bárðardalnum, skólagangan var
skyldunám þess tíma í sveitinni.
Ung fór Elín að vinna fyrir sér meðal annars í
Mývatnssveit. Síðan lá leið hennar að Ási í Vatns-
dal en þar lágu saman leiðir hennar og Þorbjarnar
Kristjáns Jónssonar (1905-1976) frá Skrapatungu.
Elín og Þorbjörn hófu búskap að Kornsá 2 í
Vatnsdal og bjuggu þar allt til Þorbjörn féll frá.
Elín hélt áfram búskap með börnum sínum þar til
sonur þeirra, Sigurður Ingi, tók við búinu haustið
1977. Það ár flutti Elín til Blönduóss.
Börn Elínar og Þorbjarnar urðu sjö. Elstur er
Jón Tryggvi, f. 1941, maki Guðlaug Heiðdal
Ólafsdóttir, börn þeirra eru fimm. Guðmundur
Karl, f. 1943, maki Sæunn Freydís Grímsdóttir,
börn þeirra eru tvö. Sigurður Ingi, f. 1945, maki Erla Bergþórsdóttir, börn
þeirra eru fjögur. Aðalheiður (1950-1950). Kristján, f. 1954, börn hans eru
fimm. Ingibjörg (1955-1956). Yngst er önnur stúlka með sama nafni Ingibjörg,
f. 1957, börn hennar eru tvö. Barn Elínar og Jóns Hannessonar var Jósefína
Stella Þor björns dóttir (1952-1999), hún eignaðist fimm börn.
Elín vann utan heimilis, frá árinu 1974 vann hún á Heilbrigðisstofnuninni
á Blönduósi. Hún vann um nokkurra ára bil í mötuneyti Húnavallaskóla en
hún byrjaði síðan aftur að starfa á Heilbrigðisstofnuninni á Blönduósi og þar
vann hún allt til þess að hún lét af störfum vegna aldurs. Síðast var Elín til
heimilis að Flúðabakka 2 á Blönduósi. Á Heilbrigðisstofnuninni andaðist hún
eftir stutta sjúkralegu.
Elín lifði fyrir heimili sitt, börnin og fjölskyldur þeirra. Hún var mannblendin
og félagslynd og um langt árabil var hún í kvenfélagi sinnar sveitar. Hún var
alltaf ung í anda og hélt vel sínum andlegu kröftum.