Húnavaka - 01.05.2015, Page 178
H Ú N A V A K A 176
Búskap í Vatnahverfi hóf Ingibjörg á hálfri jörðinni með Guðmundi Jakobs-
syni (1905-1977). Árið 1964 kaupa þau jörðina Neðri-Lækjardal og giftu sig
ári síðar. Guðmundur var fæddur að Blálandi í Hallárdal, foreldrar hans voru
Þórdís Stiesen Jósefsdóttir og Jakob Guðmundsson.
Þau Ingibjörg og Guðmundur eignuðust tvíbura árið 1950, þá Ellert Karl,
hann er kvæntur Birnu Sólveigu Lúkasdóttur, þau eignuðust fimm börn en eitt
þeirra er látið og Jakob Þór, hann er kvæntur Auði Hauksdóttur og börn þeirra
eru þrjú.
Að Neðri-Lækjardal bjuggu þau Ingibjörg og Guðmundur til ársins 1964 en
fluttu þá til Blönduóss. Á veturna fór Guðmundur suður á land í vinnu en á
sumrin vann hann fyrir norðan. Ingibjörg hélt heimili á Blönduósi en með
heimili sínu vann hún hjá Sölufélaginu í sláturtíðinni frá árinu 1964 þá um
haustið til ársins 2002, í hartnær fjörutíu ár.
Ingibjörg var í eðli sínu bóndi og húsmóðir. Á Blönduósi hélt hún kindur og
hross sér til gagns og gamans til ársins 2006.
Ingibjörg var í langan tíma með kostgangara á heimili sínu á Blönduósi.
Hún naut þess að vera innan um fólk, hún var mannblendin og vinamörg.
Síðustu árin dvaldi Ingibjörg á Heilbrigðisstofnuninni á Blönduósi, þar
andaðist hún og var útför hennar gerð frá Blönduósskirkju 13. september.
Jarðsett var í Blönduósskirkjugarði.
Sr. Sveinbjörn Einarsson.
Guðrún Anna Pálsdóttir
frá Blönduósi
Fædd 24. september 1943 – Dáin 6. september 2014
Anna var fædd á Blönduósi og fyrsta barn foreldra sinna, þeirra Torfhildar
Sigurveigar Kristjánsdóttur (1924-1997) og Páls Sesselíusar Eyþórssonar
(1919-2002). Anna var elst sex systkina sem eru í aldursröð: Óskar, f. 1946,
Haukur Reynir (1949-1998), Ingvar, f. 1951, Vigdís Heiður, f. 1957 og Lovísa
Hafbjörg, f. 1960.
Anna ólst upp hjá foreldrum og systkinum á Blönduósi en í tvo vetur var
hún hjá þeim Jónínu Jónsdóttur og Ævari Klemenzsyni er bjuggu í Bólstaðarhlíð
og þar gekk hún í barnaskóla. Strax eftir fermingu og barnaskóla fór hún sem
kaupakona til þeirra Jónínu og Ævars í Bólstaðarhlíð. En einnig var hún um
tíma í Brúarhlíð og í Grænuhlíð í kaupavinnu.
Anna sótti nám í Kvennaskólann á Blönduósi og útskrifaðist þaðan árið
1961. Á þeim tíma höfðu legið saman leiðir hennar og Björns Sigurfinnssonar
frá Hurðarbaki á Ásum (1933-1987). Hún og Björn fluttu að Meðalheimi á
Ásum og bjuggu þar félagsbúi með bróður Björns, Óskari og konu hans,
Guðnýju Þórarinsdóttur, frænku Önnu. Að Meðalheimi bjuggu Anna og
Björn til ársins 1964 en fluttu þá til Blönduóss. Þar bjuggu þau í um eitt ár eða
til þess tíma er þau hófu búskap að Hurðarbaki á Ásum árið 1966. Að