Tímarit Máls og menningar - 30.03.2001, Page 57

Bragi Ólafsson: Ljóð bls. 57
Bragi Ólafsson er rithöfundur í Reykjavík. Árið 1999 sendi hann frá sér
ljóðaúrval og skáldsöguna Hvíldardaga. Von er á nýrri bók frá Braga
innan tíðar.
Hliðarvagn
Systir mín hefur keypt sér mótorhjól
og ég sit í hliðarvagninum.
Við rennum eftir Þingholtsstrætinu
og ég læt mig hlakka til framtíðarinnar.
Hvernig maður hegðar sér meðal innfæddra
Allt lýtur eina
og sama lögmálinu:
lögmáli innfæddra.
Barþjónninn á ekki í nokkrum erfiðleikum
með að afgreiða fastagesti.
En öðru máli gegnir
um þá sem hafa villst hingað inn
með líf sitt og peninga.
Þeir fá sérstaka afgreiðslu:
afgreiðslu fyrir aðkomufólk.
Það er ómögulegt að segja
hvað þessi dagur verður lengi að líða.
Allt sumarið er framundan.
Síðan kemur haust.
Og ég sé ekki betur
en verið sé að auglýsa ástralskt hvítvín á hálfvirði.
Ég mun verða drukkinn
áður en yfir lýkur.
Ég mun eignast vini.
Ég mun eldast en verða ungur á ný.
Ég verð minn eigin herra.
Ég heyri sjálfan mig hvísla einhverju fallegu í eyru ókunnugra.
Ég mun standa eins og einkennisklæddur
á eigin fótum.
Ég mun riða til falls
og hugsa í fallinu:
ég er mikill lukkunnar pamfíll.
En hver er þessi maður í horninu.
Hann er einhver annar en ég.
Hann er með bjórglas hálft,
bók fyrir framan sig
og flóttaleg augu sem ég skil ekki að hafi ekki
þegar flúið þessa hlandkompu.
Hann er að lesa um raunir Gilberts Pinfold.
Hann er að lesa sér til um mannskepnuna.
G8126 tmm mars 22x27 Q.4.1 3/30/01 11:55 PM Page 57