Morgunblaðið - Sunnudagur - 28.02.2016, Síða 21

Juhl og Børge Mogensen, og hafa einbeitt sér
að stólahönnun og hefur Hjalti Geir sjálfur
hannað marga stóla. Hvert er aðdráttaraflið
við að hanna stóla?
„Ég hef stundum sagt að stóllinn fyrir hús-
gagnaarkitektinn sé eins og súpan fyrir kokk-
inn,“ segir hann. „Það er mikill vandi að útbúa
stól. Þegar ég var að þróa þennan þá hef ég
ábyggilega búið til ég veit ekki hvað mörg ein-
tök áður en lokaútgáfan varð til. Það þurfti að
stækka þetta og breikka hitt. Það þarf mikla
yfirvegun þangað til að það er komið í þetta
form eins og hér er,“ segir hann um stólinn
sem nú er í framleiðslu.
Hann rifjar upp söguna af SAS Royal-
hótelinu í Kaupmannahöfn sem Arne Jacobsen
hannaði marga sína frægustu gripi í. „Öll hús-
gögnin lifa enn,“ segir hann en þeirra á meðal
eru Eggið og Svanurinn.
Hann segir að þess vegna sé gaman að því
að hótel sem verið sé að byggja í dag notist
við íslenska hönnun, bæði gamla og nýja.
Þetta geti vakið enn meiri athygli á hönn-
uninni.
Vill fleiri í iðnnám
Ættu fyrirtæki og aðrir að huga enn meira að
þessum þætti?
„Það sem opinberir aðilar og aðrir eiga að
gera er að hvetja fólk til að fara í iðnnám,“ seg-
ir Hjalti Geir, sem finnst iðnnám hafa setið á
hakanum.
„Það eru örfáir að læra húsgagnasmíði og
örfáir sem eru að læra bólstrun. Það vantar
meiri kraft í iðnnámið og meiri hvatningu.“
Víst er að margir eru sammála honum og í
mörgum iðngreinum eru miklir atvinnumögu-
leikar.
„Eftir að ég kláraði Verzlunarskólann fór
ég og lærði húsgagnasmíði hjá pabba,“ segir
hann en það veitti honum ákveðið forskot í
náminu. „Ég var árinu skemur í Sviss af því
að ég var með þennan bakgrunn. Þá hefur
maður meiri tilfinningu fyrir efninu.“
Hjalti Geir rifjar upp þegar hann hélt sjálf-
ur út til náms en hann lærði húsgagna-
arkitektúr í Zürich. „Það var gott að fara til
Sviss árið 1948 því þeir höfðu lítið skaðast af
stríðinu. Þýskaland var ekki um að ræða,“
segir hann.
„Á leiðinni heim var ég eitt ár í Konstfack í
Stokkhólmi því mig langaði að komast inn í
þennan skandinavíska rytma. Síðan fór ég og
vann á teiknistofu í Nyköping eftir þetta,“ seg-
ir hann en allt þetta nám og tengslin sem
sköpuðust á þessum tíma áttu eftir að nýtast
honum vel.
Þegar hann flutti heim var eins og áður
sagði mikið blómaskeið framundan í íslenskri
hönnun og framleiðslu. „Þetta voru grósku-
miklir tímar,“ segir hann.
Erfitt hefur þó reynst fyrir íslenska fram-
leiðslu að keppa við erlenda. „Við reyndum að
taka þátt í sýningum erlendis og sýna þar hús-
gögn sem við höfðum teiknað en við gátum
ekki verið samkeppnishæfir hvað varðar
verð,“ segir hann og svo minnir alltaf á sig
reglan um að markaðurinn verði að vera
stærri en minni.
Framleiðsla feðganna flutti af Smiðju-
stígnum í Lágmúla og svo á Hestháls. Sam-
keppnin var mikil. „Þá sameinuðum við þrjú
fyrirtæki, Gamla kompaníið, Stálhús-
gagnagerð Steinars og Kristján Siggeirsson.
Við sameinuðum það í fyrirtæki sem enn er í
framleiðslu og heitir GKS og er mikið í inn-
réttingum. Við ákváðum að þetta gengi ekki
lengur og snerum bökum saman,“ segir hann
en GKS er nú við Funahöfða.
Ræktar líkama og huga oft í viku
Þó að hann líti ekki út fyrir það staðfestir
Þjóðskrá að Hjalti Geir fagnar stórafmæli
næsta sumar en þá verður hann níræður.
„Tíminn líður svo hratt! Gæfan, það er heils-
an númer eitt, tvö og þrjú. Hvað gerir maður
til að halda heilsu? Ég veit það ekki en ég held
það sé að hreyfa sig mikið. Við förum svona
þrisvar í viku í World Class úti á Nesi að gera
æfingar og synda,“ segir hann og á þar við sig
og eiginkonu sína.
„Svo fer ég tvisvar í viku í qi qong. Gunnar
Eyjólfsson leikari byrjaði á þessu, við vorum
saman í Verzlunarskólanum og erum miklir
vinir. Ég er búinn að vera í þessu í 20-25 ár.
Þetta er svona viss hugleiðsla og djúpöndun.“
Hann hefur ennfremur stundað líkamsrækt
í áratugi með eiginkonu sinni. „Við vorum
fyrst alltaf í sundi í Vesturbæjarlauginni en
þegar tækin bættust við fórum við að fara á
Nesið,“ segir Hjalti Geir, sem er líka viss um
að göngutúrar hafi mikið að segja. „Ég held að
göngur séu betri en hlaup.“
Var aðalræðismaður Sviss
Athygli vekur að svissneska aðalræðismanns-
skrifstofan er til húsa við Laugaveg 13, nánar
tiltekið í skrifstofu Hjalta Geirs.
„Ég var í ein tólf, fimmtán ár ræðismaður.
Sveinn Björnsson var ræðismaður fyrir Sviss
en svo kom að því að hann hætti en þeir vilja
ekki hafa menn eldri en sjötuga. Við þekkt-
umst vel og hann bendir á mig og það verður til
þess að ég tek við. Svo kom að því að ég varð
sjötugur líka. Þá segir sendiherrann, sem kom
og var lengi að hugsa sig um: Kristjánsson, því
miður er þetta í lögum í Sviss að við getum
ekki haft ræðismenn eldri en sjötuga. Ég get
engu ráðið með þetta en ég er samt með hug-
mynd. Jóhanna Vigdís dóttir þín hefur oft að-
stoðað okkur ef eitthvað hefur verið. Af hverju
gerum við ekki bara hana að ræðismanni fyrst
þú ert að hætta? Jæja, allt í lagi með það. Þetta
er sama skrifstofan og sami síminn nema hvað
það er nýr ræðismaður og ég er orðinn ritari
hjá henni,“ segir hann og hlær en svo vill til að
báðar dætur hans, Jóhanna Vigdís fréttamað-
ur og Ragnhildur lögfræðingur eru menntaðar
í Sviss eins og faðirinn.
Stigagangurinn í húsinu við Laugaveg 13 er
einstaklega fallegur. „Faðir minn byggði þetta
á sínum tíma. Panellinn á veggjunum var
gerður upphaflega þegar húsið var byggt árið
1955 og svo höfum við bara haldið þessu vel
við,“ segir hann. „Það er mikilvægt að vanda
til verka í upphafi.“
Morgunblaðið/RAX
Í sýningarbás Kristjáns Siggeirssonar hf. á sýningunni Húsgögn 1960. Þarna má sjá listmálarann Jón
Stefánsson og Hjalta Geir en húsgögnin á myndinni eru öll hönnun hans.
’ Ég hef stundum sagt aðstóllinn fyrir húsgagna-arkitektinn sé eins og súpanfyrir kokkinn.
28.2. 2016 MORGUNBLAÐIÐ SUNNUDAGUR 21
Á nýju hóteli Icelandair hótela við svo-
kallaðan Hljómalindarreit verða ís-
lenskri list gerð ítarleg skil með marg-
víslegum hætti. Fyrirtækið segir að
leitast sé við að versla við innlenda
birgja þegar því verður við komið og
liður í því er að nú hefur félagið pantað
170 sérsmíðaða stóla af Hjalta Geir
Kristjánssyni.
Sunnudagsblaðið hafði samband við
Icelandair hótels og segir fyrirtækið að
þeim sé mikils virði að geta haft til sýn-
is hönnun íslenskra frumkvöðla með
þessum hætti.
Nýja hótelið, sem verður opnað í
maí næstkomandi, verður það fyrsta
sem er opnað undir nýju lífsstíls-
vörumerki Hilton International, sem
nefnist Canopy og heitir hótelið Ca-
nopy Reykjavík.
Lykiláhersla við hönnun Canopy hót-
elanna er lögð á tengingu við nær-
umhverfi þeirra og samvinnu við birgja
hvers svæðis. Á Canopy Reykjavík
verður sterk skírskotun í menningu
Reykjavíkur, myndlist, hönnun og jafn-
vel tónlist innan hótelsins. Í Hjarta-
garði Hljómalindarreitsins var áður
mikið um graffitíverk á veggjum, og fá
sum þeirra að ganga í endurnýjun líf-
daga innan veggja hótelsins.
CANOPY REYKJAVÍK
VERÐUR OPNAÐ Í MAÍ
Tenging við
nærumhverfið