Bókasafnið - 01.06.2016, Blaðsíða 33

Bókasafnið 40. árg – 2016 33
ferðum sínum. Íslensk bókasöfn og upplýsingamiðstöðvar
eru órjúfanlegur hluti leiksins sem vöggur lærdóms og upp-
götvana og taka þannig þátt í stríðinu hvort sem þeim líkar
betur eða verr.
Ingress er leikur sem hvetur þig ekki bara til uppgötvana
í nærumhverfi heldur til aukinnar hreyfingar og ferðalaga
inn á áður óþekkt svæði innan og utan borgarmarka. Þú
getur til dæmis aflað þér viðurkenninga með því að taka að
þér verkefni. Þau fela í sér að „hakka“ orkugáttir á ákveðnu
svæði. Dæmi um verkefni er að „hakka“ fimm listaverk
á Ásmundarsafni eða að heimsækja íþróttamiðstöðvar í
Reykjavík.
Leikurinn hefur ekki bara afþreyingargildi því leikmenn
læra meðvitað og ómeðvitað að þekkja menninguna í
kringum sig, bæði nöfn, uppruna og tilurð listaverka, sem og
staðsetningar menningarstofnana þar sem hægt er að afla
sér meiri þekkingar. Leikurinn er þannig úr garði gerður að
til að ná árangri þarf að ferðast víða og oft á sömu staði. Á
Íslandi eru á að giska milli tvö og þrjúhundruð leikmenn í
heildina en það eru rétt um hundrað spilarar sem koma að
leiknum í hverri viku og sem skiptast milli liðanna tveggja,
Upplýstra (grænir) og Andspyrnunnar (bláir). Einnig er
talsvert um ferðamenn sem taka þátt. Á heimsvísu eru
spilarar taldir í miljónum eða tugmiljónum en ekki eru til
nákvæmar opinberar tölur.
Samvinna er mikilvægur hluti af leiknum og hefur myndast
öflugt samfélag leikmanna á Íslandi í báðum liðum sem
keppast um að safna stigum fyrir sitt lið. Einnig eru fjöl-
mörg dæmi um samvinnu milli landa og heimsálfa innan
liðanna.
Ingress er lífleikur því hann er spilaður í raunheimum en
ekki í sýndarveruleika fyrir framan tölvuskjá. Leikurinn
byggir á auknum-raunveruleika (AR/Augmented Reality)
þar sem tækni er beitt til að leiða saman raunverulegar stað-
setningar og menningarverðmæti við viðbótarlag af upp-
lýsingum og afþreyingu. Þessi tækni og hugmyndafræði við
framsetningu upplýsinga mun blómstra á næstu árum með
hraðri þróun á tækjum fyrir notendamarkað og samhliða
þróun sýndarveruleika (VR/Virtual Reality).
Lífleikurinn Ingress er dæmi um samruna leiks, fræðslu og
daglegs veruleika. Hann gæti verið tækifæri fyrir bókasöfn
og aðrar menningarstofnanir til að setja upp sín eigin verk-
efni fyrir leikmenn og hvetja þannig til óvæntra heimsókna
þar sem allt getur gerst. Í versta falli er hér ef til vill komin
útskýring á dularfullum heimsóknum safngesta sem sitja í
símanum alla heimsóknina og á dularfullum mannaferðum
og bílaumferð í kringum söfn á öllum tímum sólarhringsins.  
Óskar Þór Þráinsson, Upplýsingafræðingur, LVL10 Upp-
lýstur (Enlightened, grænn).
Áhugasamir geta haft samband við greinarhöfund til að fá
frekari upplýsingar um tæknikröfur og hvernig á að taka
þátt í lífleiknum.
Vefur Ingress: https://www.ingress.com/
Orkugátt við Kringlusafn