Skírnir - 01.09.2005, Blaðsíða 6

Frá ritstjórum
Umhverfismál og nýting náttúruauðlinda eru mál málanna á okkar dögum.
Unnur Birna Karlsdóttir fjallar í þessu hefti um áform manna á fyrri hluta 20.
aldar um að virkja Gullfoss, eitt dáðasta náttúrufyrirbæri á Íslandi. Linda Ásdís-
ardóttir veltir aftur á móti fyrir sér táknrænu sambandi náttúru og þjóðar í grein
sinni um bókina Íslendingar eftir Sigurgeir Sigurjónsson og Unni Jökulsdóttur.
Nútími og bókmenntir eru annað stef í þessu hefti. Tvær greinar fjalla um
módernisma. Benedikt Hjartarson gerir grein fyrir ímagisma og vortisisma í
inngangsorðum sínum að yfirlýsingum þessara listastefna sem birtast hér í
fyrsta sinn á íslensku. Bragi Halldórsson gerir sagnagerð Geirs Kristjánsson-
ar skil og veltir fyrir sér tengslum hennar við módernisma, marxisma og til-
vistarstefnu. Skáld Skírnis er Vésteinn Lúðvíksson sem hóf feril sinn sem
módernisti og skrifaði síðar undir merkjum nýraunsæis en hefur þróað skáld-
skap sinn í nýjar og óvæntar áttir á síðari árum. Nútímabókmenntir koma
einnig við sögu í greinum um bækur. Sigurjón Árni Eyjólfsson fjallar um bók
Gunnars Kristjánssonar um trúarstef í verkum Halldórs Laxness og Valgerð-
ur Kr. Brynjólfsdóttir ræðir um sjálfsögur Gyrðis Elíassonar.
Miðaldabókmenntir hafa löngum átt sinn fasta sess í tímaritinu og svo er
enn. Baldur Hafstað bregst við skrifum Gísla Sigurðssonar um Austfirðinga-
sögur og Katrín Axelsdóttir færir rök fyrir því að Gunnlaugur Leifsson hafi
að öllum líkindum þýtt Ambrósíus sögu.
Fræðin eiga iðulega erfitt uppdráttar á viðsjárverðum tímum. Magnús
Þorkell Bernharðsson fjallar um stöðu Mið-Austurlandafræða í Bandaríkjun-
um nú um stundir og Aðalgeir Kristjánsson sýnir að vöxtur og viðgangur ís-
lenskra fræða á 18. og 19. öld var að mörgu leyti að þakka dönskum áhuga-
og efnamönnum sem upprunnir voru á Fjóni.
Myndlistarmaður Skírnis er Haraldur Jónsson og fjallar Æsa Sigurjóns-
dóttir um list hans í lokagrein þessa heftis.
Frá árinu 1989 hefur ritstjórn Skírnis jafnan verið skipuð tveimur mönn-
um og hefur hvor komið úr sínum geira hugvísinda til að tryggja sem mesta
breidd í tímaritinu, en vettvangur þess hefur verið vestræn menningarsaga í
víðum skilningi. Sú ágæta venja hefur einnig skapast að skipt er um ritstjórn
á 5–6 ára fresti og er nú komið að okkur að standa upp úr ritstjórastólunum
sem við höfum vermt í sex ár. Við þökkum öllum þeim mörgu sem unnið hafa
með okkur að útgáfu tímaritsins. Ónefndum yfirlesurum Skírnis í ýmsum
fræðagreinum færum við sérstakar þakkir fyrir þeirra mikilvæga framlag. Við
höfum leitast við að gera ritrýningu tímaritsins markvissari og einnig reynt að
stuðla að því að fleiri konur birtu efni í því. Það er okkur fagnaðarefni að hlut-
ur kvenna hefur aukist jafnt og þétt og vonandi verður svo áfram. Nýrri rit-
stjórn óskum við velfarnaðar í starfi.
Svavar Hrafn Svavarsson og Sveinn Yngvi Egilsson
Skírnir haust 05 RÉTTUR 23.11.2005 13:52 Page 236