Skírnir - 01.09.2015, Síða 70

má finna í köflum 6–15 í Tristrams sögu ok Ísöndar, norrænni út-
gáfu Tristran sem þýdd var á norrænu snemma á 13. öld.10 Í þeim má
lesa upprunasögu aðalsöguhetjunnar Tristrams — ástarsögu foreldra
hans, þeirra Blensenbilar og Kanelangres. Hún hefst á því að Blens -
enbil verður ástsjúk á því augnabliki er hún sér Kanelangres: „…
eptir þenna mann sénan koma til hennar svá margfaldar hugrenn-
ingar, hugsóttir ok mikil óró …“ (Tristrams saga ok Ísöndar 1999:
34). Á eftir fylgja lýsingar á kvölum hennar í löngu máli. Hún líkt og
skerst öll að innan og brennur í huga sínum, hjarta hennar og limir
skjálfa og hún svitnar um allan líkamann sem hún hafi tekið sótt
(Tristrams saga ok Ísöndar 1999: 36). Í ljós kemur að bæði Blensen-
bil og Kanelangres bera sama angur og unna hvort öðru heitt. En
þetta er ást í meinum því bróðir hennar hefði lagst gegn sambandinu
hefði hann vitað af því. Harmþrungnum aðstæðum við getnað Trist-
rams er sérstaklega lýst og þegar Kanelangres fellur í bardaga verður
Blensenbil yfirbuguð af sorg og missir allan lífsvilja. Við þær
aðstæður „fæddi hún einn fríðan svein veð mikilli mæðu ok mein-
læti og andaðiz, síðan <er> barnit var fætt, af þeim mikla harmi ok
píning, er helt henni með svá ákafri ást, er hún til bónda síns hafði“
(Tristrams saga ok Ísöndar 1999: 48). Þarna kemur skýrt fram að
banamein Blensenbilar er ást hennar til Kanelangres og við þær
aðstæður fæðist Tristram. Hann fær nafn sitt af því að „hann var í
harmi ok sorgum fæddr“ (Tristrams saga ok Ísöndar 1999: 48). Er það
útskýrt í sögunni sem svo að nafnið sé samsett úr orðunum hryggur
(triste) og maður (hum) (Tristrams saga ok Ísöndar 1999: 48). Þannig
má segja að ástsýki myndi umgjörð um allan uppruna Tristrams og
nafngjöf, sem gefur forbendingu um hans eigin harmrænu ævi. Sagan
af foreldrum Tristrams er mörkuð þjáningarfullum og banvænum
afleiðingum ástsýki sem leiddu móðurina til dauða; stef sem svo er
endurtekið í aðalfrásögninni með dauða bæði Tristrams og Ísöndar
úr sama sjúkdómi. Það eru einmitt þessir kaflar Tristrams sögu ok
Ísöndar sem enduróma í Egils sögu eins og hér verður rakið.
370 brynja þorgeirsdóttir skírnir
10 Sjá umræðu um tímasetningu þýðingarinnar í síðasta hluta greinarinnar.
Skírnir Haust 2015 NOTA ÞESSA.qxp_Layout 1 19.10.2015 10:51 Page 370