Skírnir - 01.09.2015, Qupperneq 76

vegar ekki bróðir hennar sem leggst gegn ráðahagnum heldur faðir
hennar sem fastnar hana öðrum manni. Þorgrímur nemur Ólöfu á
brott en fer ekki með hana til Bretlandseyja heldur beint til Íslands
og heldur brúðkaup þar. Víglundur kemur ekki undir í þessum um-
brotum heldur fæðist sem annað barn foreldra sinna á Íslandi og fer
ekki í fóstur. Ketilríður, konan í lífi hans, kemur hinsvegar í fóstur
á heimili Víglundar. Þarna er því um helmingur frásagnarþáttanna
átta, sem settir voru hér upp, samsvarandi. Dragi Vésteinn Ólason
ályktun af þessu um áhrif Tristrams sögu á Víglundar sögu virðast
enn sterkari rök fyrir áhrifum hennar á Egils sögu. Hinsvegar má
einnig líta svo á að Víglundar saga tengist Egils sögu frekar en Trist-
rams sögu hvað varðar þessa þætti. Víglundar saga er talin með
yngstu Íslendingasögum, frá lokum 14. aldar eða upphafi þeirrar
fimmtándu (Vésteinn Ólason 2006: 157), en Egils saga aftur á móti
með þeim elstu. Einn frásagnarþáttur í forsögu Víglundar á meira
sameiginlegt með Egils sögu en Tristrams sögu. Það er að Víglundur
og Ketilríður alast upp saman frá barnsaldri, líkt og Egill og Ás-
gerður. Tristram og Ísönd alast ekki upp saman. Mögulega á því
aðdragandi ástarsögu Víglundar sögu sterkari samsvaranir við upp-
runa sambands Ásgerðar og Egils en Tristrams og Ísöndar.
Höggvið á landfestar
Í lýsingu á uppvexti jafnaldranna í Egils sögu er aldrei sagt berum
orðum að Egill leggi ástarhug á Ásgerði. Fyrstu merki þess eru ofsa-
fengin viðbrögð hans þegar Þórólfur bróðir hans ætlar að fara með
Ásgerði úr landi. Egill og Ásgerður eru orðin stálpuð þegar
Þórólfur kemur heim til Íslands úr langri frægðarför og dvelur um
veturinn að Borg. Hann vill fara til Noregs strax næsta sumar og
gefur í skyn að tilgangur þeirrar ferðar sé að biðja föður Ásgerðar
um hönd hennar. Þetta verður ljóst þegar Þórólfur tekur þrennt
fram í samtali við föður sinn: Að hann eigi nauðsynlegt erindi til
Noregs, ætli að taka Ásgerði með sér en snúa aftur og stofna heim-
ili á Íslandi. Eða með orðum Þórólfs: „[Á] ég nauðsynlegt erindi til
fararinnar. En þá er eg kem út öðru sinni mun eg hér staðfestast.
En Ásgerður fóstra þín skal fara utan með mér á fund föður síns“
376 brynja þorgeirsdóttir skírnir
Skírnir Haust 2015 NOTA ÞESSA.qxp_Layout 1 19.10.2015 10:51 Page 376