Skírnir - 01.09.2015, Qupperneq 81

381elskhuginn ástsjúki
síðar lendir Egill aftur upp á kant við Eirík og konu hans Gunn-
hildi með því að ráðast á bróður hennar, Eyvind skreyju. Þetta hefur
þær afleiðingar að þeim bræðrum er ekki vært í Noregi. Vart er
hægt að komast hjá þeirri hugsun að þarna stýri afbrýðisemi Egils
gagnvart Þórólfi gerðum hans. Um þetta hefur Torfi Tulinius fjallað
í bók sinni Skáldið í skriftinni: Snorri Sturluson og Egils saga. Hann
telur að með því að ráðast á Eyvind skreyju hafi Egill viljað koma í
veg fyrir samvistir Þórólfs og Ásgerðar, enda urðu þeir bræður að
fara úr landi eftir þessa árás en Ásgerður varð eftir í Noregi. Hann
segir lítinn vafa á því að það sem stýri þessari atburðarás og gefi
henni merkingu sé vilji Egils til að fá Ásgerðar (Torfi Tulinius 2004:
51). Torfi bendir ennfremur á að ákvörðun Egils um að ráðast á Ey-
vind hafi þær afleiðingar að þeir bræður ganga til þjónustu við
Englakonung þar sem Þórólfur fellur í orrustu (Torfi Tulinius 2004:
51). Egill beri þannig ábyrgð á dauða bróður síns um leið og hann
sé afbrýðisamur út í hann og girnist konu hans (Torfi Tulinius 2002:
256–257). Þessi túlkun Torfa styrkist enn frekar þegar horft er á þau
mynstur ástsýkinnar sem birtast í kringum þessa atburðarás og hér
hafa verið rakin.
Egill fær Ásgerðar
Þá er komið að þeim hluta verksins sem lýsa má sem hápunkti ást-
arsögunnar. Þegar Þórólfur er fallinn fer Egill beint til Noregs á
fund Ásgerðar. Hann segir henni lát manns hennar og býður henni
umsjá sína. Hér fáum við í fyrsta sinn lýsingar á tilfinningum Ás-
gerðar þó sparlegar séu. Hún verður mjög „ókát“, en „svaraði vel
ræðum Egils og tók lítið af öllu“ (Egils saga 1985: 440, 56 k.). Þessi
dauflegu viðbrögð Ásgerðar benda til þess að ást Egils sé ekki end-
urgoldin og skýra mögulega líðan Egils sem svo er lýst: „Og er leið
á haustið tók Egill ógleði mikla, sat oft og drap höfðinu niður í feld
sinn“ (Egils saga 1985: 440, 56 k.). Dregin er upp mynd af manni sem
situr löngum stundum álútur og sviptur allri gleði vegna þrár sinnar
eftir konu, eins og hann tjáir sig sjálfur um örlitlu síðar við Arin-
björn vin sinn í tveimur vísum. Ástsýkieinkennin sem birtast hér
eru dapurlegar hugsanir, hinn sjúki situr aðgerðalaus, sem rændur
skírnir
Skírnir Haust 2015 NOTA ÞESSA.qxp_Layout 1 19.10.2015 10:51 Page 381