Morgunblaðið - 28.02.2019, Qupperneq 14

14 FRÉTTIRInnlent
MORGUNBLAÐIÐ FIMMTUDAGUR 28. FEBRÚAR 2019
Guðni Einarsson
gudni@mbl.is
Nýr Herjólfur mun ekki hefja áætl-
unarsiglingar milli lands og Eyja
hinn 30. mars, eins og að var stefnt,
að sögn Hjartar Emilssonar, skipa-
tæknifræðings og framkvæmda-
stjóra Navis ehf. Hann er verkefna-
stjóri Vegagerðarinnar vegna loka-
frágangs og afhendingar nýja
skipsins. Vonast er til þess að búið
verði að afhenda skipið 30. mars og
eftir afhendinguna tekur við heim-
sigling og þjálfun áhafnarinnar.
Líst mjög vel á skipið
„Mér leist mjög vel á skipið. Ég
get ekki talað nema sem leikmaður
en ég vil gjarnan taka mér far með
þessu skipi,“ sagði Bergþóra Þor-
kelsdóttir, forstjóri Vegagerðar-
innar, sem skoðaði nýja Herjólf í
Gdynia í Póllandi í gær. Fulltrúar
Vegagerðarinnar fóru um allt skipið
og skoðuðu farþegasalina, eldhús,
vélarrúm, rafhlöðugeymslur og önn-
ur rými. „Þetta er allt glæsilegt og
nú er unnið að lokafrágangi. Þetta er
verulega huggulegt skip.“
Stefnt er að því að nýi Herjólfur
geti siglt í Landeyjahöfn um leið og
skipið verður tekið í notkun. Dýpk-
unarskip er nú til reiðu að hefja
dýpkunarframkvæmdir um leið og
veður leyfir, að sögn Bergþóru.
„Þegar gefur til dýpkunar verður
farið í það. Svo vonumst við til að
höfnin verði opin. Fyrir utan veður-
haminn sem hefur tafið okkur eru
aðstæður í höfninni fremur góðar,“
sagði Bergþóra.
Unnið er að undirbúningi upp-
setningar fasts dælubúnaðar í Land-
eyjahöfn. Því verkefni mun ekki
ljúka á þessu ári, að sögn Bergþóru.
„Það er verið að leggja grunn að því
að þessi samgöngumáti geti nýst
betur, bæði með nýja skipinu og að-
gerðum í höfninni,“ sagði Bergþóra.
Vanda til undirbúningsins
„Áherslan verður lögð á að vanda
til undirbúningsins og að allt verði
klárt og áhöfnin fullþjálfuð áður en
áætlunarsiglingar hefjast,“ sagði
Hjörtur Emilsson. „Það verður tölu-
verð breyting frá gamla skipinu með
þessu skipi. Stjórn nýja skipsins er
allt önnur en gamla Herjólfs. Eins
og þetta lítur út í dag mun skipið
ekki hefja rekstur 30. mars, það
verður einhver töf á því. Gamli Herj-
ólfur er til staðar og mun halda uppi
áætlunarsiglingum þar til nýja skip-
ið tekur við.“
Reynslusiglingar nýja Herjólfs
hafa gengið ágætlega og engin stór
atriði komið upp á í þeim, að sögn
Hjartar. „Það eru ýmis minni háttar
atriði sem þarf að lagfæra en
reynslusiglingarnar gengu alveg
prýðilega.“ Fyrri reynslusiglingin
var þriggja til fjögurra sólarhringa
löng og svo var önnur styttri í byrj-
un vikunnar. Skipið lenti í smá
brælu og öldugangi og reyndist
mjög vel, að sögn áhafnarinnar.
Hjörtur sagði að það hefði verið létt
yfir áhöfninni eftir prufutúrinn og
menn ánægðir með skipið. Nýi Herj-
ólfur verður rafknúinn, sem er nýj-
ung í íslenska skipaflotanum. Hjört-
ur sagði að sá búnaður hefði reynst
vel.
Hópur frá Vegagerðinni er nú
staddur í Gdynia í Póllandi vegna
lokauppgjörs ferjusmíðinnar. Hjört-
ur sagði að það styttist í afhendingu
skipsins en dagsetning hennar hefur
ekki verið ákveðin.
Farþegasalur Stórir gluggar veita mikilli birtu inn í farþegasalinn þar sem farþegarnir geta tyllt sér og horft á sjónvarp. Veitingar Fullkomið eldhús og veitingabúð verða í skipinu.
„Þetta er verulega huggulegt skip“
 Eitthvað dregst að nýr Herjólfur hefji áætlunarsiglingar  Þjálfa þarf áhöfnina eftir að skipið
kemur  Sanddælubúnaður í höfninni ekki tilbúinn á þessu ári  Reyndist vel í reynslusiglingum
Ljósmyndir/Vegagerðin
Herjólfur Skipið hefur farið í reynslusiglingar, þar af eina langa, og reynst vel. Það fer vel í sjó og engin stór atriði sem þarfnast úrlausnar.
Bíladekkið Skipið er gegnumakstursskip og smíðað til flutnings á fólki og farartækjum. Vistlegt Nú er lögð lokahönd á frágang nýju ferjunnar hjá CRIST S.A. skipasmíðastöðinni.