Bændablaðið - 11.08.2016, Blaðsíða 1

15. tölublað 2016 ▯ Fimmtudagur 11. ágúst ▯ Blað nr. 472 ▯ 22. árg. ▯ Upplag 32.000
Atvinnuveganefnd Alþingis fundar um breytingatillögur vegna búvörusamninga:
Bjartsýn á að búvörusamningar verði afgreiddir
Fulltrúar stjórnarmeirihlutans í
atvinnuveganefnd Alþingis hafa
í sumar unnið að tillögum um
breytingar á frumvarpi sem fylgir
búvörusamningunum sem lagðar
verða fyrir þingið fljótlega eftir
setningu þess.
Reiknað er með að samningarn-
ir verði samþykktir fyrir kosningar
sem fyrirhugaðar eru í haust. Alþingi
kemur aftur saman eftir sumarhlé
15. ágúst.
Haraldur Benediktsson, þingmað-
ur Sjálfstæðisflokksins og annar vara-
formaður atvinnu veganefndar, sagði í
samtali við Bændablaðið að vinna við
breytingatillögur nefndarinnar stæðu
enn yfir og því erfitt að tjá sig mikið
um þær.
Jón Gunnarsson, þingmaður
Sjálfstæðisflokksins og formaður
atvinnuveganefndar, tekur í sama
streng og segir að unnið hafi verið
að breytingatillögum í nefndinni í allt
sumar. „Málið er á viðkvæmu stigi
og nefndin hittist í fyrsta sinn í dag,
miðvikudag, með formlegum hætti til
að ræða um það. Á fundinum verður
farið yfir stöðu málsins og eftir það
verður fundað með þingflokkunum
um tillögur nefndarinnar.“
Hann á ekki von á öðru en að
búvörusamningarnir verði samþykktir
á Alþingi fyrir kosningar í haust.
Tillögurnar ekki tilbúnar
Haraldur segir að fundað hafi verið
hjá stjórnarmeirihlutanum í nefndinni
og tillögurnar ræddar. „Vinna við
málið hefur staðið yfir í allt sumar
og gengið vonum framar að mínu mati
og við teljum okkur geta lokið þeirri
vinnu á næstu dögum og innan þess
ramma sem bændur hafa samþykkt.
Ég get þó sagt að málið hefur tekið
breytingum í meðferð nefndarinnar en
ekki hversu miklar þær breytingar eru.
Meðal þess sem unnið hefur verið að
er lengd samningstímans og opnunin
á breytingar sem eru skrifaðar inn í
samninginn.
Markmið okkar er að ná niður-
stöðu sem gerir það að verkum að
hér ríki meiri sátt um landbúnað-
inn í landinu um langan tíma og að
endurskoðunin sem á að fara fyrst
fram árið 2019 verði víðtæk og vel
undirbúin með góðum greiningum
og samtölum á milli hagsmunaaðila.
Þrátt fyrir það vil ég taka fram að
samningagerðin sjálf verður alltaf á
hendi bænda og stjórnvalda.“
Haraldur segir að nefndin sé
einnig búin að vinna mikið í tolla-
málunum, umhverfis- og loftslags-
málum og nefndin sé með ákveðnar
tillögur tengdar þeim málum.
„Starf nefndarinnar hefur sem
sagt fyrst og fremst legið í því að
fara yfir umsagnirnar sem henni
hafa borist vegna búvörusamninga
og vinna að meiri sátt um þá, bregð-
ast við ábendingum og umsögnum.
Slíkt mun kosta breytingar en von-
andi ekki það miklar að það verði að
fara fram ný atkvæðagreiðsla meðal
bænda um samninginn.
Ég á ekki von á öðru en að
samningurinn verði samþykktur.
Búvörusamningurinn og tolla-
samningurinn haldast í hendur og
hvorugur verður samþykktur án
hins,“ segir Haraldur Benediksson.
Stjórnarandstaðan ekki með
Lilja Rafney Magnúsdóttir, þingmað-
ur Vinstri hreyfingarinnar – græns
framboðs, og Kristján L. Möller,
þingmaður Samfylkingarinnar, og
fulltrúar í atvinnuveganefnd sögðu í
samtali við Bændablaðið að þau gætu
ekki sagt mikið um starf nefndarinnar
í sumar hvað varðar búvörusamn-
inginn þar sem fulltrúar stjórnarand-
stöðunnar hefðu ekki verið kallaðir
á þá fundi.
„Við í stjórnarandstöðunni höfum
ekki komið að málinu með formleg-
um hætti í sumar og höfum ekkert
frétt af vinnu hennar, né vitum hvað
hefur verið rætt um.
Fyrr í sumar lagði stjórnar-
andstaðan áherslu á í minnisblaði
til nefndarinnar um samninginn að
fjallað yrði um mál eins og hraða
skerðingu á beingreiðslum, sauðfjár-
búskap á jaðarsvæðum og að fleiri
umdeilanleg mál í búvörusamn-
ingunum yrðu tekin fyrir á fundum
hennar ásamt áhrifum tollasamn-
ingsins á landbúnaðinn. Ég geri ráð
fyrir að stjórnarmeirihlutinn hafi rætt
þessi mál í sumar og sé ekki á byrj-
unarreit hvað þau varðar þegar við
komum saman.
Mín skoðun er að stjórnarliðar séu
ekki einir á báti þegar kemur að lausn
þessa máls og að þeir teldu sér hag í
að vinna með stjórnarandstöðunni á
uppbyggilegan hátt að úrlausn þess.
Ég er vongóð um að svo megi verða,“
segir Lilja Rafney.
Kristján L. Möller sagðist ekki
hafa setið neina fundi í nefndinni
í sumar vegna búvörusamnings-
ins fyrir utan einn sem var haldinn
skömmu eftir að þingi lauk. „Hafi
atvinnuveganefnd komið saman í
sumar til að funda um búvörusamn-
inginn hafa þeir fundir einungis verið
á vegum stjórnarmeirihlutans,“ segir
Kristján. /VH
Sláturhús KVH á Hvammstanga
hefur gefið út verð fyrir sumar-
slátrun og hefur verðið lækkað
frá sama tíma í fyrra. Formaður
Landssamtaka sauðfjárbænda
segir lækkunina mikil vonbrigði
og slæman fyrirboða fyrir haust-
slátrun.
Magnús Freyr Jónsson, forstöðu-
maður SKVH á Hvammstanga, segir
að verðið gildi bara í sumar. „Gefið
verður út annað verð fyrir haustslátr-
un sem hefst 12. september en það er
ekki búið að ákveða það verð ennþá.“
Sé borið saman verð hjá KS/
SKVH í sömu vikum í fyrra er niður-
staðan sú að vika 34 (21. til 27. ágúst)
er með óbreyttu verði, 733 krónur.
Meðalverð viku 35 (28. ágúst til 3.
september) lækkar úr 703 kr. í 691
krónur, eða um 1,7%. Meðalverð
viku 36 (4. til 10. september) lækkar
úr 657 í 645, eða um 1,8%.
Meðalverð fyrir kjöt af fullorðnu
lækkar úr 174 krónum í 116 krónur í
öllum vikunum þremur, sem er þriðj-
ungslækkun, um 33,3%.
Verð á lambakjöti fylgir ekki
verðlagsþróun
Þórarinn Ingi Pétursson, formaður,
Landssamtaka sauðfjárbænda, segir
lækkunina mikil vonbrigði.
„Satt best að segja kemur lækk-
unin mér ekki á óvart í ljósi þess að
sauðfjárafurðir hafa ekki hækkað á
markaði undanfarin þrjú ár. Verð á
lambakjöti hefur ekki fylgt verðlags-
þróun undanfarinna ára og verð til
neytenda nánast staðið í stað.
Í mínum huga eru það mikil von-
brigði að menn geti ekki gert betur
í að verðleggja vöruna sem þeir eru
að framleiða. Laun í landinu hafa
hækkað og í raun óásættanlegt að
frumframleiðendur, það er að segja
bændur, þurfi einir að bera þann
kaleik og sitja eftir þegar kemur að
launahækkunum.
Ráði bændur menn í vinnu hefur
sá kostnaður náttúrlega hækkað í
takt við launahækkanir í landinu.
Auk þess sem framleiðslukostnaður
hefur hækkað eitthvað líka en sem
betur fer ekki mikið.“
Slæmur fyrirboði
Þórarinn segist hafa verulegar
áhyggjur af því að verðið fyrir sumar-
slátrunina sé fyrirboði þess verðs sem
sett verður upp fyrir slátrun í haust.
„Samningsstaða bænda er engin
í þessu máli og það eina sem við
megum gera hjá Landssamtökum
sauðfjárbænda er að gefa út það
viðmiðunarverð sem okkur þykir
sanngjarnt.
Satt best að segja er óþolandi að
staðan skuli vera eins og hún er. Ég
hef fengið fjölda símtala frá sauð-
fjárbændum undanfarið og hljóðið
í þeim er ekki gott. Sérstaklega á
stöðum þar sem næga atvinnu er
að hafa og menn sjá sér færi á að
hætta með kindur og fara að gera
eitthvað annað og á ég þar við störf
við ferðaþjónustu eða stóriðju,“ segir
Þórarinn Ingi Pétursson, formaður
LS, að lokum.
/VH
Margir sauðfjárbændur hyggjast hverfa til annarra starfa:
Verð til bænda vonbrigði
4 34
Skógræktin
tekin til starfa
8
Þessar tvær erlendu vinkonur voru glaðbeittar í reiðtúr á vegum Óbyggðaseturs Íslands í Norðurdal í Fljótsdal,
í jaðri stærstu óbyggða Norður-Evrópu. Óbyggðasetrið var opnað fyrr í sumar en þar er boðið upp á fjölbreytta
upplifun og afþreyingu. Nánar er fjallað um starfsemi Óbyggðasetursins og rætt við forsvarsmenn þess á bls. 30.
Mynd / Steingrímur Karlsson
Matarhátíð
alþýðunnar
Býflugur
eru bráð-
skemmtilegar