Bændablaðið - 16.07.2020, Síða 24

Bændablaðið | Fimmtudagur 16. júlí 202024
ÍSLAND ER LAND ÞITT
Kríunes:
Sveitahótel við Elliðavatn
– Falin náttúruperla í jaðri höfuðborgarsvæðisins
Hótel Kríunes er fallegt sveita-
hótel og falin náttúruperla við
Elliða vatn á Vatnsendabletti í um
15 mínútna akstursfjarlægð frá
miðbæ Reykjavíkur. Á Kríunesi
eru 26 herbergi, þar á meðal fjórar
svítur, fjölskylduherbergi og þrír
fundarsalir.
Sara Björnsdóttir hótelstjóri segir
að fjölskyldan hafi rekið hótelið í 22
ár. „Upphafið að þessu er að pabbi
keypti hér land fyrir tæpum 28 árum
með litlu íbúðarhúsi. Mamma og
pabbi áttu fjögur börn og fljótlega
byggðu þau nýtt hús. Gamla húsið
var leigt út en það kom upp í því
eldur og það brann til kaldra kola. Í
framhaldi af því var byggt hús með
fjórum herbergjum og var það leigt
út sem eins konar bændagisting.
Leigan gekk vel og þá var ákveðið
að breyta gömlum bílskúr sem áður
hafði verið hesthús í fundarsal. Við
buðum einnig upp á tjaldsvæði á
þessum tíma.“
Gaman að alast hér upp
Sara segir að það hafi verið einstakt
ævintýri að alast upp við Elliðavatn.
„Það kom skólabíll að sækja okkur
í skólann og svo vorum við með
vatnið og náttúruna allt í kringum
okkur og búféð á Vatnsendabýlinu
sem var svo gaman að fylgjast með,
sérstaklega á vorin í sauðburðinum.
Svo komu kríurnar á sumrin og
þær koma enn og verpa fyrir utan
gluggana á hótelherbergjunum ásamt
öðrum fuglategundum.“
Höfðað til Íslendinga
„Fram að COVID-19 var yfirdrifið
nóg að gera, enda mikið um erlenda
ferðamenn, auk þess nóg um að vera
vegna fundahalda, ráðstefna og
annars konar mannfagnaðar. Við
sjáum líka um veitingar og undir
venjulegum kringumstæðum er líka
boðið upp á mat hér á hverju kvöldi
fyrir hótelgesti, en í dag þarf fólk að
panta fyrirfram.
Þegar COVID-19 faraldurinn
kom upp hrundi starfsemin hjá okkur
eins og hjá svo mörgum öðrum hót-
elum á landinu. Það hefur samt verið
okkar gæfa að við höfum alltaf höfð-
að mikið til Íslendinga og það hefur
haldið okkur gangandi og við erum
með fasta kúnnahópa sem koma
hingað reglulega.
Við erum með tilboð í júlí og
ágúst fyrir Íslendinga ef þeir bóka
í gegnum okkur og erum við að
bjóða yfirburða herbergi á 12.000
krónur og svítu á 15.900 krónur og
með því fylgir aðgangur að kajak
til að sigla á vatninu, heitum potti
og sauna. Reksturinn hefur verið
að rétta úr kútnum undanfarið
og talsvert um fundi hjá okkur
og svo er að rofa mikið til í hót-
elgistingunni eftir að landið var
opnað fyrir erlenda ferðamenn en
við erum enn góður kostur fyrir
landsbyggðarfólk sem ætlar að
heimsækja höfuðborgarsvæðið.
Við bjóðum einnig upp á morgun-
verðarmatseðil en höfum til þessa
verið með hlaðborð og hér er gróð-
urhús og matjurtagarður og ræktum
við hluta af okkar grænmeti sjálf og
stundum fáum við fisk úr vatninu.“
Opna kaffihús í ágúst
Að sögn Söru stendur til að opna
kaffihús á Kríunesi snemma í ágúst
og verður það opið öllum og með
fyrsta flokks kaffi og meðlæti. „Við
eigum aðeins eftir að ganga frá
nokkrum smáatriðum áður en við
getum opnað og það verður gaman
að bæta þessari þjónustu við og opna
Kríunes fyrir almenningi. Fólk héðan
úr hverfinu hefur svo sem komið til
okkar og við tekið vel á móti því en
við höfum ekki verið með formlega
opið kaffihús áður. Okkur langar líka
til að auka við starfsemina með því
að vera með einhvers konar viðburði
eða uppákomur, uppistand eða tónlist
um helgar.“
Sveit í borg
Björn Ingi segir að Kríunes sé eina
hótelið á höfuðborgarsvæðinu sem
er í raun hægt að skilgreina sem
sveitahótel í borg. „Við erum hluti af
Ferðaþjónustu bænda /Hey Iceland og
erum ekki við götulóð með götunúm-
eri á höfuðborgarsvæðinu. Hótelið
stendur á um tveggja hektara lóð sem
er að stórum hluta girt af með vatni
og skógi. Svæðið er því einstakt fyrir
hótel í Reykjavík vegna staðsetningar-
innar, kyrrðarinnar, náttúrunnar og
útsýnisins. Hér allt í kring eru góðir
reið-, hjóla- og göngustígar og mikil
saga sem við höfum stundum tekið að
okkur að segja frá og hér skammt hjá
eru hestaleigur.“
Hann segir að í raun sé hótelið
og staðsetning þess enn sem komið
er talsvert leyndarmál og ekki
margir sem viti af því enda hefur
það ekki verið mikið auglýst. Björn
Ingi bætir við að fljótlega verði
sett upp hleðslustöð fyrir rafbíla
í hlaðinu á Kríunesi og ekkert því
til fyrirstöðu að taka á móti slíkum
ökutækjum.
Morð við Elliðavatn –
Morðgátukvöld
Í haust ætlar Sara að fara af stað með
það sem hún kallar Murder mistery
kvöld en þá kemur fólk saman eitt
kvöld, fær mat og gistir eina nótt og
tekur þátt í leik sem felst í að leysa
morðgátu. „Ég fékk sjálf mikinn
áhuga á svona kvöldum og ákvað að
slá til og prófa þetta fyrir vini mína
og ætla að prófa þetta fyrir gesti í
haust.“ /VH
Hótel Kríunes við Elliðavatn hefur vaxið og dafnað síðustu ár. Myndir / úr einkasafni
Hluti Kríunesfjölskyldunnar. Sara Björnsdóttir hótelstjóri, Björn Ingi
Stefánsson eigandi ásamt ömmunni, Helgu Björnsdóttur. Mynd / VH
Veislusalurinn er rúmgóður og útsýnið glæsilegt. Til stendur að opna kaffihús
á Kríunesi snemma í ágúst.
Herbergin eru með útsýni út á Elliðavatn.
Sara í gróðurhúsinu þar sem er
ræktað grænmeti fyrir hótelið.