Bændablaðið - 16.07.2020, Blaðsíða 28
Bændablaðið | Fimmtudagur 16. júlí 202028
Jón Magnús Jónsson og Kristín Sverrisdóttir, bændur á Reykjabúinu og eigendur Ísfugls:
Skýr stefna að bjóða eingöngu upp á
íslenskt kalkúna- og kjúklingakjöt
– Mikil samkeppni einkennir markað með fuglakjöt en tollaumhverfið er skaðlegt íslenskum landbúnaði
Á Reykjum í Mosfellsbæ búa
þau Jón Magnús Jónsson og
Kristín Sverrisdóttir. Þau eru
þriðja kynslóð á býlinu en það er
hvað þekktast fyrir kalkúnarækt
og brautryðjendastarf í
alifuglaframleiðslu á Íslandi. Börn
þeirra eru Hrefna, María Helga,
Jón Magnús og Sverrir. Bæði
stunduðu þau hjónin nám við
framhaldsdeild Bændaskólans á
Hvanneyri. Jón Magnús lauk síðar
BS-gráðu í alifuglarækt í Madison,
Wisconsin í Bandaríkjunum
og Kristín BS-gráðu í almennri
búfjárrækt frá Hvanneyri.
Saman reka þau Reykjabúið og
eru eigendur Ísfugls sem slátrar
og markaðssetur afurðir búsins
og fleiri bænda. Hjá Ísfugli
var mörkuð sú stefna að selja
einvörðungu íslenskt alifuglakjöt.
Jón Magnús og Kristín hafa skýra
sýn á gildi þess að framleiða mat
á Íslandi og sterkar skoðanir
á rekstrarumhverfi íslensks
landbúnaðar. Jón Magnús segir
að núverandi tollaumhverfi
sé bændum erfitt og hvetji
til innflutnings. Bændur geti
auðveldlega annað markaðnum
og það sé hægur vandi að reka
landbúnað á Íslandi ef þjóðin
sameinast um það.
Reykjabúið framleiðir fyrst og
fremst kalkúna- og kjúklingakjöt
en á Reykjum er einnig haldinn
kalkúna- og holdastofn til
framleiðslu frjóeggja. Þá er lítil
heimaverslun á Reykjum þar sem
seldar eru kalkúnaafurðir beint til
neytenda. Árið 2012 tóku þau alfarið
yfir rekstur Ísfugls sem er til húsa á
Reykjavegi skammt frá búinu.
Jón Magnús er alinn upp á
Reykjum en Kristín er Reykvíkingur
sem kynntist sveitastörfum frá
barnsaldri hjá móðursystur sinni á
Oddgeirshólum í Flóa. Á Reykjum
hófst hænsnarækt árið 1946 og
kalkúnarækt í litlum mæli stuttu
síðar.
Varphænur í Reykjabíói
„Það er í raun grunnurinn að því
búi sem við erum með í dag. Hér
var hafin ræktun á varphænum á
tveimur hæðum í gömlu bíói frá
stríðsárunum, Reykjabíói,“ segir
Jón Magnús. Faðir hans, Jón
Magnús Guðmundsson, kom heim
úr námi í Bandaríkjunum í búfjár-
og hænsnarækt árið 1947 og hóf
hænsnarækt samhliða kúabúskap.
„Hann keypti svo hænsnabúið á
sjötta áratugnum og í kjölfarið hófst
framleiðsla kjötfugla á Reykjum.
Pabbi fór aftur til Bandaríkjanna
skömmu síðar að kynna sér strauma
og stefnur í búgreininni, og eftir
heimkomu hófst hann handa snemma
á sjöunda áratugnum við að byggja
kjúklingasláturhús. Eftir það hófst
innflutningur á fuglastofnum fyrir
kjötfuglaeldi. Fram að því höfðu
Íslendingar látið sér nægja að borða
afgangs fugla frá eggjaframleiðslu!“
segir Jón Magnús.
Hefðbundin eggjaframleiðsla
hefur ekki verið að neinu ráði á
Reykjum að sögn Jóns. „Amma
mín, Ingibjörg Pétursdóttir, var
með töluvert af hænum og seldi
nágrönnum og fleirum egg. Annars
var hér fyrst og fremst útungun
og framleiðsla á varphænum og
kjúklingum. Þetta bú hefur aldrei
verið í framleiðslu neyslueggja.“
Þriðja kynslóð tekur
við búskapnum
Jón Magnús og Kristín eru af
þriðju kynslóðinni sem býr á
Reykjum. Þau keyptu búið af
fjölskyldunni árið 2005.
Hvaða stefnu tókuð þið í
búskapnum árið 2005 þegar þið
eignuðust búið?
„Við rýndum í reksturinn og
reyndum að hagræða eins og
kostur var,“ segir Kristín og bætir
við að ýmsu hafi verið breytt í
rekstrinum á þeim tímamótum,
bætt við fleiri eldishúsum
fyrir kalkúna og kjúklinga og
framleiðslan aukin.
Kristín Sverrisdóttir og Jón Magnús Jónsson, bændur á Reykjum. Þau hafa skýra sýn á gildi þess að framleiða mat á Íslandi og sterkar skoðanir á rekstrarumhverfi íslensks landbúnaðar. Hér
eru þau í sveitaversluninni, sem opin er sídegis tvo daga í viku, þar sem boðið er upp á ferskar og frosnar vörur beint til neytenda. Myndir / TB
Kristín og Jón Magnús hafa í mörg horn að líta á degi hverjum. Á Reykjabúinu
eru um 10 stöðugildi og hjá Ísfugli eru um 40 starfsmenn.
Spjallað við bændur
Tjörvi Bjarnason
tjorvi@bondi.is
Sláturhús Ísfugls við Reykjaveg. Ísfugl er með um 20% markaðshlutdeild í
alifuglakjöti og er með þá stefnu að selja eingöngu íslenskt kjöt.