Bændablaðið - 16.07.2020, Page 46

Bændablaðið | Fimmtudagur 16. júlí 202046
Á hverju ári síðan 1987 hafa
bifhjólamenn götumótorhjóla
haldið sameiginlegt landsmót
sem er hápunktur sumarsins
hjá mörgum. Þrátt fyrir mikla
mótorhjóladellu hef ég ekki farið
á þetta mót síðastliðin 29 ár fyrr en
nú. Reykjavík Motor Center, sem
hefur aðsetur við Flatahraun 31 í
Hafnarfirði, hefur flutt inn BMW
mótorhjól um nokkurt skeið. Mér
var boðið að fara á nýju BMW
F750 GS hjóli á landsmótið þar
sem ég tók það til kostanna.
Mikið af aukabúnaði gerir
aksturinn öruggari og þægilegri
Þó að hjólið nefnist F750 þá er vélin
samkvæmt bæklingi 853 cc og á
að skila 77 hestöflum. Gírkassinn
er sex gíra, kúplingin er fjöldiska
blautkúpling með hraðskipti (e.
quick shift), sem ég kýs að nefna
hér eftir „fljótfærsla“. Þyngdin er
216 kg með öllum vökvum (fullt
af bensíni og olía á vél). Hjólið
er hlaðið aukabúnaði sem er m.a.
hraðastillir (e. cruse control), hiti
í handföngum (3 mismunandi
hitastillingar), spólvörn sem
vinnur með stöðugleikabúnaði
(e. Automatic Stability Control),
tölvufjöðrun sem hægt er að stilla
á marga vegu (hækka og lækka
hjólið, gera fjöðrun mjúka eða stífa)
og margt fleira. Mælaborðið býður
upp á ótal valmyndir og upplýsingar.
Reykjavík - Laugabakki í Miðfirði
Veðrið var gott, vegir þurrir svo að
ég lagði af stað með fjöðrunina stillta
á mýkstu stillingu (e. comfort) og
gripið á malbiksstillingu (e. road).
Strax og komið var í Kollafjörð voru
þar nokkrir bílar með aftanívagna og
fóru hægar, þá var vélarstillingunni
breytt í „dynamic“ (sem eykur
snerpu vélarinnar) og fjöðrunin sett
á „normal“. Við þetta var viðbragðið
betra í framúrakstri. Fyrr en varði
var ég kominn í Staðarskála en eftir
kjötsúpustopp var haldið áfram.
Þéttur vindur var á hlið frá
Hrútafirði í Miðfjörð, en hjólið
virðist höndla hliðarvind ágætlega,
þó hefði vindhlífin mátt vera um
20–30 cm hærri, sérstaklega þegar
maður mætti stórum bílum svo að
vindhöggið kæmi ekki á ökumanninn
(betra að hjólið taki svoleiðis
vindhögg). Einnig er betra gagnvart
þrifum á mótorhjólafötunum að
flugur fari á vindhlífina í stað þess
að fara efst á mótorhjólafötin.
Miðfjörður - Vatnsdalur og til
baka
Daginn eftir var svipað veður og
fórum við konan í rúmlega 100 km
hjólatúr. Á leiðinni inn Vatnsdalinn
margprófaði ég gírskiptinguna sem
ég kalla „fljótfærslu“. Virknin er
þannig að maður tekur í kúplinguna
þegar maður setur í fyrsta gír, en
síðan þegar maður eykur hraðann
skiptir maður bara um gír án þess
að kúpla (bæði þegar maður eykur
hraða og hægir á). Fljótfærslan var
alltaf betri og mýkri en ef ég notaði
hefðbundna akstursaðferð, þ.e.a.s.
að kúpla á milli gírskiptinga (varð
að játa mig sigraðan af tækninni
þrátt fyrir yfir 40 ára reynslu í
mótorhjólaakstri). Gírskiptingin
var tær snilld!
Svona fíflaskapur er ekki í boði!
Á malarveginum innst í Vatnsdal
var látið reyna á fjöðrunina
og mismunandi stillingar
spólvarnarinnar. Ef stillt var
á „rain“ fór spólvörnin strax í
gang við smæstu steinvölur. Á
malbiksstillingu var það aðeins
skárra en spólvörnin fór of snemma
í gang. Enduro-stillingin virkaði
best á mölinni og til að prófa
stöðugleikabúnaðinn. Á leið niður
brekku í beygju þar sem örlítil
lausamöl var gíraði ég viljandi
niður um tvo gíra og við svoleiðis
ætti hjólið að renna til að aftan, en í
stað þess fór stöðugleikabúnaðurinn
að vinna sína vinnu. Hjólið byrjaði
sjálft að snuða kúplingunni og tók
af mér öll völd. Ef hjólið hefði
kunnað að tala hefði það eflaust
sagt „svona fíflaskapur er ekki í
boði!“
Haldið heim
Á degi þrjú var haldið heim
í þéttri sunnudagsumferð, þá
var gott að geta bara hengt sig
fyrir aftan næsta bíl og stillt
hraðastillinn á umferðarhraða. Að
loknum 551 kílómetra prufuakstri
var meðaleyðsla mín 4,9 lítrar
á hundraðið (fyllti tankinn í
Staðarskála og aftur í Reykjavík
og á þessum legg var eyðslan 7,8
lítrar).
Fínt hjól fyrir misháa knapa
Hjólið eins og það er á myndunum
kostar nýtt 2.800.000. Fínt hjól,
sérstaklega fyrir lágvaxna þar sem
að hægt er að lækka hjólið niður í 77
cm með takka í stýrinu. Þó er tvennt
sem ég vildi breyta, annars vegar
vindhlífin að framan (mætti hækka
um 20–30 cm) og hvar pumpað er í
dekkin (ekki hægt að setja slöngu í
ef maður beyglar felgu).
Nánari upplýsingar
Allar upplýsingar um hjólið má fá á
vefsíðunni www.bmwmotorcycles.
com eða hjá Reykjavík Motor
Center í netfangið info@
reykjavikmotorcenter.is.
VÉLABÁSINN
Hjörtur L. Jónsson
liklegur@internet.is
BMW F750 GS er fyrirtaks ferðahjól. Þó að hjólið nefnist F750 þá er vélin samkvæmt bæklingi 853 cc og á að skila 77 hestöflum. Gírkassinn er sex gíra, kúplingin er fjöldiska blautkúpling með
hraðskipti. Myndir / HLJ
Nýtt BMW F750 GS
– með frábærri gírskiptingu
Vindhlífin er heldur lítil. Dauðu flugurnar var auðvelt að þrífa af plastinu en
ekki af úlpunni minni!
Það fer ekki mikið fyrir þessari snilld sem ég nefni „fljótfærslu“. Ein besta
uppfinning í mótorhjólum síðustu 10 ár.
Vissulega er auðvelt að pumpa í
dekkið með ventilinn þarna. En
ef felgan bognar er hægt að nota
slöngu – en þá vantar gat fyrir
ventilinn.
Margir takkar við handfangið.
Hringurinn lengst til vinstri stjórnar
tölvumælaborðinu og virkar eins og
mús á tölvu.
Fjöðrunin stillist eftir þyngd sem
hjólið á að bera. Hægt er að hækka
hjólið með einum takka úr 77 cm í
84 cm.
Fjölbreyttar upplýsingar er að finna
á skjá í mælaborðinu.