Fréttablaðið - 22.08.2020, Page 28

Neyðaraðstoð vegna fátæktar
Hjálparstarf kirkjunnar veitir fólki í félagslegri neyð efnislega aðstoð í samvinnu við presta, félags- og námsráðgjafa um land allt. Aðstoðinni er ætlað að svara
skyndilegri neyð enda er það skylda stjórnvalda að tryggja framfærslu fólks í félagslegum vanda þannig að það fái lifað mannsæmandi lífi til lengri tíma.
Meginmarkmiðið er að grunnþörfum fólks sé mætt, að fjárhagslegir erfiðleikar ógni ekki heilsu fólks og takmarki ekki möguleika barna og unglinga til farsæls lífs.
Faglegt mat félagsráðgjafa Hjálparstarfsins liggur til grundvallar efnislegum stuðningi sem veittur er án tillits til trúar- og lífsskoðana, þjóðernis, litarháttar
eða kyns þeirra sem hans leitar.
Ráðgjöf
Félagsráðgjafar Hjálparstarfs kirkjunnar taka á móti fólki sem leitar eftir efnislegum stuðningi hjá stofnuninni, ræða við það og benda á úrræði í samfélaginu
sem kunna að gagnast því við að komast út úr erfiðum aðstæðum. Vegna samkomutakmarkana ráðleggjum við fólki að hringja milli klukkan 10 og 15 á virkum
dögum í síma 5284400 og panta viðtalstíma hjá ráðgjafa.
Inneignarkort fyrir matvöru
Hjálparstarf kirkjunnar veitir fólki sem býr við fátækt neyðaraðstoð til skemmri tíma meðal annars með inneignarkortum í matvöruverslunum en mikil valdefling
felst í því að fólk versli sjálft þær nauðsynjar sem það þarf í stað þess að bíða í röð eftir matarpoka sem aðrir hafa fyllt.
Aðstoð vegna lyfjakaupa
Hjálparstarf kirkjunnar aðstoðar fólk í félagslegri neyð þegar sýkingar eða veikindi kalla á óvænt útgjöld vegna lyfjakaupa. Þó er ekki greitt fyrir lyf sem eru á lista
Lyfjastofnunar yfir ávana- og fíknilyf. Hjálparstarfið greiðir lyfjaverslunum beint fyrir lyfin sem aðstoðað er um.
Fataúthlutun og fatasöfnun
Í mörg ár hefur fólk í félagslegri neyð getað sótt sér notaðan fatnað á lager Hjálparstarfs kirkjunnar. Vegna kórónuveirufaraldurs og smithættu hefur
fatamiðstöðin verið lokuð síðan í mars 2020. Á meðan lokað er höfum við því miður ekki pláss til að taka við fatnaði frá hjartahlýju fólki. Við munum auglýsa á
vefsíðu okkar www.hjalparstarfkirkjunnar.is þegar ákvörðun liggur fyrir um að opna fatamiðstöðina á ný.
Velferð barna og ungmenna
Börn og unglingar sem búa við fátækt fá styrk frá Hjálparstarfi kirkjunnar til íþróttaiðkunar, listnáms og frístundastarfs. Foreldrar geta einnig leitað eftir styrk
til að senda börn í sumarbúðir og ungmenni á sjálfstyrkingarnámskeið. Foreldrum grunnskólabarna býðst aðstoð í upphafi skólaárs og ungmenni sem búa við
fátækt fá styrk til náms sem gefur þeim réttindi til starfs eða veitir þeim aðgang að lánshæfu námi.
Sjálfstyrkingarnámskeið og hópastarf
Til þess að fólk komist út úr vítahring fátæktar og félagslegrar einangrunar þarf það að takast á við aðstæður á heildrænan hátt. Félagsráðgjafar Hjálparstarfs
kirkjunnar skipuleggja reglulega sjálfstyrkingarnámskeið og hópastarf í samráði við þá sem leita aðstoðar hjá okkur.
Taupokar með tilgang er saumaverkefni fyrir konur sem eru nýkomnar til landsins og eru utan vinnumarkaðar. Konurnar sníða og sauma fjölnota innkaupapoka
og fleira úr efni og/eða notuðum fatnaði sem almenningur hefur gefið og nota til þess saumavélar sem almenningur hefur gefið sömuleiðis. Konurnar fá félagsskap
og læra að sauma, efni er endurunnið og umhverfið græðir.
Stattu með sjálfri þér – virkni til farsældar er verkefni skipulagt með konum sem búa við örorku og eru með börn á framfæri. Markmiðið er að bæta
sjálfsmynd og trú á eigin getu, að styrkja tengslanetið og eflast í foreldrahlutverkinu.
Í Sumarbúðum fyrir fjölskyldur á Úlfljótsvatni, sem er samvinnu-
verkefni með Hjálpræðishernum á Íslandi, er boðið upp á fjölbreytta
dagskrá í fjóra daga með það að markmiði að fjölskyldur sem búa við
kröpp kjör geti átt gleðilegt frí saman og safnað góðum minningum.
Sumarfrí innanlands að eigin vali er verkefni sem Hjálparstarfið fór
af stað með sumarið 2020 en þá nutu barnafjölskyldur sem búa við kröpp
kjör stuðnings til að fara í sumarfrí að eigin vali. Að fríi loknu fara börnin
í skólann með minningar um samverustundir með fjölskyldunni, eins og
bekkjarsystkinin.
Ræktaðu garðinn þinn er hópastarf sem stendur yfir sumartímann
þar sem þátttakendur fá pláss í matjurtagörðum sveitarfélaga og fá þar
tækifæri til að rækta sitt eigið grænmeti. Að hausti er svo námskeið um
geymsluaðferðir uppskerunnar.
Málsvarastarf
Auk þess að veita neyðaraðstoð og hjálpa fólki til sjálfshjálpar með
ráðgjöf og valdeflandi verkefnum hefur Hjálparstarf kirkjunnar það að
markmiði að auka almenna vitund um mannréttindi og mikilvægi
félagslegs réttlætis. Hjálparstarf kirkjunnar vinnur með fólki í fátækt
sem talar fyrir sig sjálft og tekur þátt í opinberum ákvörðunum sem það
varðar. Þjónusta við fólk í félagslegri neyð á að vera notendastýrð og
fólk á að geta lifað mannsæmandi lífi af launum sínum og lífeyri.
EAPN og Pepp Ísland – samtök fólks í fátækt
EAPN er evrópskur samráðsvettvangur fyrir fólk sem býr við fátækt en
félagsráðgjafar og notendur þjónustu Hjálparstarfsins taka þátt í
störfum Íslandsdeildar EAPN. Hópurinn Pepp Ísland, samtök fólks í
fátækt var stofnaður í tengslum við EAPN á Íslandi og starfar á eigin
forsendum.
Hjálparstarf kirkjunnar á Íslandi
– átt þú erindi til okkar?
Kórónuveirufaraldurinn hefur kennt okkur að erfiðar aðstæður gera ekki alltaf boð
á undan sér og að það getur verið erfitt að vinna sig út úr þeim. Veikind, slys og
atvinnumissir geta valdið því að tekjur fólks sem áður var aflögufært duga því vart
til framfærslu. Hlutverk Hjálparstarfs kirkjunnar er að veita fólki í neyð efnislegan
stuðning, valdeflingarverkefni eru skipulögð til að koma í veg fyrir félagslega
einangrun og þrýst er á stjórnvöld um aukið félagslegt réttlæti.
Efnisleg aðstoð Hjálparstarfs kirkjunnar
á starfsárinu júlí 2019–júní 2020:
– 1.983 fjölskyldur fengu inneignarkort fyrir matvöru.
Faglegt mat félagsráðgjafa liggur að baki ákvörðunar um
upphæð inneignar hverju sinni.
– Aðstoð við lyfjakaup var veitt í 538 skipti.
– 49 ungmenni fengu styrk til greiðslu skólagjalda
í framhaldsskólum og fyrir bóka- og efniskostnaði,
meðalupphæð styrkja var 31.749 krónur.
– 42 börn og unglingar undir átján ára aldri nutu
styrkja til íþróttaiðkunar, listnáms og frístundastarfs.
– Á annað hundrað grunnskólabörn fengu í upphafi skólaárs
skólatöskur, nestisbox og ritföng til að hafa við heimanámið.
– 12 fjölskyldur með samtals 31 barn fóru í skipulagt sumarfrí með
Hjálparstarfi kirkjunnar og Hjálpræðishernum á Íslandi í
sumarbúðir Skáta við Úlfljótsvatn.
– 21 fjölskylda með samtals 45 börn fór í sumarfrí innanlands
að eigin vali með stuðningi Hjálparstarfs kirkjunnar.
– 30 fjölskyldur fengu árskort í Fjölskyldu – og húsdýragarðinn.
Auk þess hefur fjöldi barna og unglinga fengið leikhús- og
bíómiða og inneignarkort á veitingastað.
– Í desember 2019 fengu 307 fjölskyldur (830 einstaklingar)
notaðan fatnað hjá Hjálparstarfinu. Frá ágúst 2019 og
fram til marsmánaðar þegar fatamiðstöð Hjálparstarfsins var
lokað tímabundið vegna kórónuveirufaraldurs leituðu að
jafnaði milli 20 og 30 fjölskyldur eftir fatnaði hjá Hjálparstarfinu
í viku hverri.
4 – Margt smátt ...