Skessuhorn - 28.10.2020, Blaðsíða 16

2
Gefið út 28. október 2020 í tilefni 50 ára afmælis Brákarhlíðar
31. janúar 2021.
Útgefandi: Brákarhlíð, hjúkrunar- og dvalarheimili, Borgarbraut 65 Borgarnesi.
Ábyrgðarmaður: Björn Bjarki Þorsteinsson.
Umsjón með útgáfu: Skessuhorn – Fréttaveita Vesturlands.
Ritun efnis: Anna Rósa Guðmundsdóttir, Björn Bjarki Þorsteinsson, Gunnhildur
Lind Hansdóttir, Jón G Guðbjörnsson, Magnús Magnússon og fl.
Ljósmyndir: Anna Rósa Guðmundsdóttir, Gunnhildur Lind Hansdóttir, Ómar Örn
Ragnarsson, Magnús Magnússon, ljósmyndasöfn Brákarhlíðar og ljósmyndasafn
Skessuhorns.
Forsíðumynd: Ómar Örn Ragnarsson.
Umbrot: Skessuhorn - Ómar Örn Sigurðsson.
Dreifing: Til áskrifenda Skessuhorns og á öll heimili á starfssvæði Brákarhlíðar.
Upplag 5000 stk.
Prentun: Landsprent.
Ágæti lesandi,
Brákarhlíð á sér langa og merka sögu eins og rak-ið er hér í blaði þessu. Full-
trúar Brákarhlíðar, stjórn og starfs-
menn, hafa unnið að þessu afmæl-
isblaði undir öruggri handleiðslu
starfsmanna héraðsfréttablaðs-
ins Skessuhorns og vil ég hér, f.h.
okkar í Brákarhlíð, þakka því góða
fólki gott samstarf við undirbún-
ing og vinnu við þetta afmælisblað
heimilisins.
Það styttist í fimmtugsafmæli
Brákarhlíðar sem verður 31. janúar
2021. Við höfðum sett okkur
það markmið, fyrir um ári síðan,
að hafa fimmtugasta starfsárið
töluvert líflegt, með uppákomum
og samkomum í tilefni þessara
merku tímamóta. Sett var saman
afmælisnefnd sem átti að halda
utan um verkefnið. En svo kom
Covid 19, sending sem enga óraði
fyrir um áhrifin af. Allt var sett
á ís varðandi hátíðarhöld, en eitt
hélt sér. Það er þetta blað sem
við vildum gefa út til þess að
kynna fyrir samferðafólki okkar í
héraði og öðrum vildarvinum fyrir
hvað Brákarhlíð, hjúkrunar- og
dvalarheimili, stendur.
Eitt af því sem við höfum
stefnt að nú á afmælisári er að
byggja gróðurhús í og við garð
heimilisins. Óformleg söfnun fór
af stað og viðbrögðin urðu hreint
út sagt ótrúleg. Félagasamtök og
einstaklingar hafa nú þegar fært
Hollvinasamtökum heimilisins
til þessa verkefnis rúmlega tvær
milljónir króna að gjöf. Hlé hefur
verið á undirbúningi undanfarið
en við vonumst til að í kringum
hinn eiginlega afmælisdag getum
við hrint af stað frekari vinnu og
formlegri söfnun og að sumarið
2021 rísi gróðurhús hjá okkur.
Gaman er að segja frá því að
undanfarin tvö ár höfum við skreytt
garðinn okkar með sumarblómum
sem hefur verið sáð til af heimilis-
og starfsfólki og nostrað við fram
eftir vori innanhúss hjá okkur,
gróðurhús myndi t.d. bæta þann
aðbúnað verulega sem og auka
möguleika okkar til frekari vinnu.
Hollvinasamtök heimilisins voru
nefnd hér að ofan. Þau samtök
voru sett á laggirnar árið 2009 og
síðan þá hefur nánast öllu gjafafé
og styrkjum verið beint í þá átt.
Minningarsjóður sem hefur haldið
utan um sölu á minningarkortum
hefur einnig runnið í sjóð
Hollvinasamtakanna. Í gegnum
Hollvinasamtökin höfum við á
undanförnum tólf árum náð að
endurnýja öll rúm heimilismanna
auk þess að bæta annan tækjakost
varðandi umönnun verulega.
Þetta fimmtugasta starfsár
hefur svo sannarlega verið
lærdómsríkt. Það hefur sýnt
Brákarhlíð í fimmtíu ár
okkur að við mannfólkið ráðum
ekki öllu því sem gerist í kringum
okkur eins og við héldum fyrir
nokkrum mánuðum síðan. Ef
einhver hefði sagt mér fyrir tíu
mánuðum síðan að við myndum
loka fyrir heimsóknir, skipta
starfsmannahópnum upp í hópa,
við myndum fara með andlitsmaska
út að versla, eða hvað það nú er
sem við fáumst við þessi misserin,
hefði ég haldið að viðkomandi
væri í besta falli galinn. Starfsfólk
heimilisins hefur nánast verið í
sjálfskipaðri sóttkví og nálgast
viðfangsefnið af mikilli auðmýkt
sem er alls ekki sjálfgefið en
sýnir hug þess til heimilismanna
í verki. Raunveruleikinn er á
tíðum miskunnarlaus á margan
hátt og eru Covid áskoranir ein
birtingarmynd þess. Vil ég hér
nota tækifærið til þess að þakka
heimilisfólki í Brákarhlíð, okkar
frábæra starfsfólki, aðstandendum
og öðrum vildarvinum fyrir einstök
viðbrögð á allan hátt við þeim
aðgerðum sem við höfum gripið til,
það er ómetanlegt að finna þann
hlýhug allan og mörgum verður
seint fullþakkað.
Brákarhlíð er á margan hátt
sérstakur vinnustaður þar sem
að jafnaði eru um 80 manns
á launaskrá í mismunandi
starfshlutföllum. Við starfsfólkið
störfum inn á heimili þeirra sem
í Brákarhlíð búa, heimilismenn
eiga sínar vistarverur og í
kringum það þarf að skapa bæði
notalegan heimilisbrag sem og
skilvirkan vinnustað á ýmsan hátt.
Heimilismenn eru á bilinu 52 til
58 eftir því hverjar heimildir okkar
eru frá ríkisvaldinu. Þannig að við
erum um 130 manns sem myndum
það samfélag sem í Brákarhlíð
býr og starfar, einstaklingar á
aldursbilinu 16 ára og upp í
stundum 100 ára, og já allt upp í
104 ára gamalt fólk, sem myndar
samfélag sem samsvarar íbúatölu
í litlu þorpi. Við höfum verið
lánsöm hvernig úr hefur spilast og
þar skiptir mannauður okkar og
kunnátta í starfsmannahópnum öllu
máli.
Á þeim tíma sem
undirritaður hefur gegnt starfi
framkvæmdastjóra heimilisins
hef ég verið lánsamur
með samstarfsfólk. Allur
starfsmannahópurinn skiptir þar
máli, þær Halla Magnúsdóttir, sem
er forstöðumaður þjónustusviðs,
og Jórunn María Ólafsdóttir, sem
er forstöðumaður hjúkrunarsviðs,
mynda stjórnendateymi heimilisins
og höfum gert það síðan snemma
árs 2008. Einnig höfum við
verið lánsöm hvað varðar skipan
einstaklinga í stjórn heimilisins sem
ber ábyrgð á rekstri heimilisins.
Brákarhlíð er sjálfseignarstofnun
með trygga bakhjarla í
sveitarfélögunum þremur sem
eru á starfssvæði heimilisins
en það eru Borgarbyggð,
Eyja- og Miklaholtshreppur
og Skorradalshreppur. Einnig
hefur, frá fyrstu tíð, Samband
borgfirskra kvenna og kvenfélögin
öll verið ötulir bakhjarlar. Stjórn
nú er þannig skipuð að Jón G.
Guðbjörnsson er formaður,
varaformaður er Magnús Smári
Snorrason og aðrir stjórnarmenn
eru Lára Kristín Gísladóttir, Sigrún
Ólafsdóttir, Guðsteinn Einarsson
og Páll S. Brynjarsson.
Áskoranir þær sem við blöstu
þegar undirritaður tók við góðu búi
af Margréti Guðmundsdóttur voru
töluverðar. Um árabil hafði verið
í gangi barátta við ríkisvaldið um
heimild til að komast í endurbætur
á húsakosti heimilisins og hafði
því miður lítt miðað. En loks
tókst það og fór allt á skrið árið
2010. Þá tóku við nýjar áskoranir
við skipulagningu nýs húsnæðis
og aðrar áskoranir við að halda
starfseminni gangandi þrátt fyrir
framkvæmdir innan- og utanhúss.
Þegar sá tími, framkvæmdatíminn
allur sem varði í raun um fjögur
ár, frá 2010 til 2014, er rifaður
upp getur maður ekki annað en
dáðst að æðruleysi starfsmanna og
heimilisfólks. Hávaði, rykmyndun
og skert aðstaða haggaði ekki
nokkrum manni og hlutirnir gengu
sinn gang í þeirri bjargföstu trú
að betri tíð væri í vændum, og svo
fór, 17. júní 2014 var endurbætt
Brákarhlíð komin í gagnið þó
eilítill frágangur væri eftir. Enn
eru áskoranir í rekstri Brákarhlíðar
og það gerir dagana bara meira
ögrandi að fást við heldur en ef
allt væri á lygnum sjó. Samskipti
við ríkisvaldið taka sinn tíma og
við erum ætíð að berjast fyrir
fjölgun rýma því biðlistinn er
langur og ennfremur er barátta um
að fá tryggari rekstrargrundvöll
því alltaf viljum við gera betur
fyrir heimilisfólk og okkar
góða starfsfólk. Heildarvelta
Brákarhlíðar er farin að losa
600 milljónir á ári og koma um
95% tekna heimilisins í gegnum
svokölluð daggjöld sem ríkisvaldið
greiðir til heimilisins. Aðrar tekjur
eru vegna sölu á matarbökkum
og leigutekjur og síðan höfum
við notið húsnæðisframlags frá
sveitarfélögunum og þannig náð
að standa algerlega í skilum vegna
lántökukostnaðar sem kom til
vegna gríðarlegra endurbóta á
húsakosti og stendur það framlag
einnig undir viðhaldskostnaði á
húsakosti okkar.
Á tímamótum sem þessum
er mörgum sem ber að þakka,
einstaklingar og félagasamtök hafa
verið dyggir stuðningsaðilar okkar,
samanber áðurnefnd kvenfélög,
Lionsklúbbana í héraði og fleiri og
fleiri sem hafa fært heimilinu að
gjöf stórar og verðmætar gjafir sem
nýst hafa til búnaðarkaupa. Einnig
hafa núverandi og fyrrverandi
starfsmenn verið óþreytandi við að
aðstoða við ýmis verkefni, innan
og utan vinnutíma og líka eftir að
starfsmenn hafa verið hættir að
vinna, samanber aðstoð við kaffihús
sem starfrækt var síðastliðinn vetur
og við vonandi getum endurvakið
fljótlega, allt ómetanlegt á svo
margan hátt.
Það er ósk okkar sem að þessari
blaðaútgáfu stöndum að þetta
afmælisrit veiti ákveðna innsýn í
það umhverfi sem við störfum í.
Brákarhlíð, áður Dvalarheimili
aldraðra, hefur allt frá upphafi
notið mikillar velvildar í héraðinu
öllu, vonandi verður svo áfram
og að heimilið nái, og fái, að vaxa
áfram og dafna, öldruðum íbúum á
starfssvæðinu og samfélaginu öllu
til heilla.
Björn Bjarki Þorsteinsson,
framkvæmdastjóri Brákarhlíðar.
Hluti starfsfólks og íbúa í Brákarhlíð á fallegum haustdegi nýverið. Ljósm. Gunnhildur Lind Hansdóttir.
Björn Bjarki
Þorsteinsson.