Rit Landbúnaðardeildar : A-flokkur - 01.05.1953, Side 44

42
snjóa, og hélzt það tíðarfar fram til 11. desember, en þá tók við þíðviðri
fram að 22. des. Eftir það dyngdi niður snjó til áramóta, og tók þá mjög
fyrir allar samgöngur. Hross og sauðfé tekið á gjöf fyrri hluta mánaðarins.
Arið 1951 má telja í heild erfitt á ýmsa lund. Veturinn var kaldur og
snjóasamur. Vorið kalt í byrjun, en hlýrra þegar á leið. Klaki var í jörð
fram á sumar. Mikil brögð voru að kali í túnum. Sumarið var fremur
hlýtt, en lítil grasspretta. Nýting alls jarðargróða varð með bezta móti.
Haustið og fram til áramóta var fremur hagstætt.
b. Árið 1952.
Veturinn, frá nýjári fram að apríl, var snjóa- og frostasamur í byrjun,
en hlýtt í marz, og varð þá svo þíð jörð, að jarðvinnsla hófst seinast í
mánuðinum.
Vorið (apríl—maí) var í meðallagi hlýtt og úrkoma í meðallagi. —
Kornsáning hófst 23. apríl, og var henni lokið 3. maí. Maímánuður var
tæplega í meðallagi hlýr, enda sólarlítið. Klaki fór úr jörð um miðjan
mánuðinn. Sauðburður gekk vel. Lítill gróður kom í mánuðinum. Kart-
öflur voru settar niður dagana 25,—30., eða í seinna lagi.
Sumarið (júní—september). Júní var þurrviðrasamur og í meðallagi
lilýr, og tíðarfar sólríkt. Allur gróður var skammt á veg kominn í júnílok.
Seint kom upp í görðum vegna þurrkanna. Gefa varð kúm fram að jóns-
messu vegna grasleysis. Júlímánuður var kaldur og þurr. Grasspretta var
undir meðallagi, og sláttur hófst víðast hvar ekki fyrr en um og eftir 20.
júlí. Ágúst var mun kaldari en júlí, en tíðarfarið þá svipaði annars mjög
til hans. Grasfræ varð fullþroskað um 20. ágúst. Bygg náði ekki þroska
í mánuðinum. Heyskapartíðin var ágæt, og var heyöflun langt komið
víðast livar í ágúst. Nóttina milli 27. og 28. ágúst gerði allmikið nætur-
frost, er skemmdi kartöflugras og tók að mestu fyrir þroskun á byggi og
höfrum. Septembermánuður var sólríkur og þurr. Hiti fyrir neðan meðal-
lag. Kornskurður hófst 15. september, og lauk honum í mánuðinum.
Varð nýtingin góð. Kartöflur voru að mestu teknar upp í september, en
víðast varð lítil uppskera. Heyskap var lokið 10.—15. september.
Haustið (október—nóvember). Fyrri lilutinn var mildur og fyllilega
í meðallagi hlýr og svipaði til sumarsins um þurrviðri. Öllu korni var
ekið í liús 15.—23. október, vel þurru úr stökkum. Nokkuð var veðrasöm
tíðin, en ekki stórveður, og má telja veðráttuna hagstæða. Kýr víðast hvar
teknar inn 25,—30. október. í nóvember voru stillur og hægviðri. Fyrsta
frost kom þann 6. nóv. og stóð í nokkra daga. Svo kom aftur frost þann
21., og enn í lok mánaðarins. Úrkoman var talsverð, einkum hríð. — Um