Strandapósturinn - 01.06.1976, Blaðsíða 8

Til lesenda
Með þessu hefti Strandapóstsins, sem er 10. árgangur, má
segja að áfanga sé náð, því oft hafa tímarit reynst skammlífari á
íslandi. Á slíkum tímamótum líta menn gjarnan yfir farinn veg
og reyna að leggja mat á það, sem á undan er gengið. Stranda-
pósturinn mun þó ekki gera tilraun til slíks hér, heldur láta
lesendum eftir að dæma. Væri vel ef einhverjir vildu láta í sér
heyra um það mál.
Þess í stað vilja ritnefndarmenn nú minnast eins ágætasta
stuðningsmanns Strandapóstsins frá upphafi, dr. Símonar
Jóhannesar Ágústssonar, sem lést 1. desember sl. Ritsmíðar hans,
sem birst hafa í Strandapóstinum undanfarin ár og einnig nú í
þessu hefti, bera dálæti hans á íslenskri alþýðumenningu og
þjóðlegum verðmætum órækt vitni. Dr. Símon var hámenntaður
gáfumaður, sem kunni að njóta hins rammíslenska í fari ein-
staklingá og þjóðar og leggja á það skynsamlegt og raunhæft
mat.
Dr. Símon Jóhannes Ágústsson fæddist í Kjós í Árneshreppi
28. september 1904. Foreldrar hans voru Petrína Sigrún Guð-
mundsdóttir og Ágúst Guðmundsson, bóndi í Kjós. Störf hans á
sviði vísinda, félagsmála auk margháttaðra ritstarfa á öðrum
sviðum eru alþjóð kunnug og verða ekki tíunduð hér. Á erfiðum
árum kreppunnar um 1930 sótti hann gull menntunar og
menningar í greipar erlendum stórþjóðum og lét landa sína vel
njóta um langa starfsævi. Jafnframt varðveitti hann hina
römmu taug og hinn hreina tón íslensks alþýðleika, sem best
reynist þegar annað bregst. Fyrir það skulu honum færðar ein-
lægar þakkir og hann kvaddur hinstu kveðju í góðri minningu.
Aðstandendum vottar ritnefnd og stjórn Átthagafélags
Strandamanna dýpstu samúð.
Að lokum skal hér komið á framfæri leiðréttingum við mis-
sögn í 9. hefti, bls. 37, í skýringum við bæjarnafnaþulu úr
Árneshreppi. Af óskiljanlegum ástæðum hafa nöfnin „Ávík“ og
„Djúpavík“ slæðst inn í textann. Þetta falli burt, en í staðinn
komi Stóra-Ávík og Litla-Ávík. Sigurrós Jónsdóttir er beðin
velvirðingar á þessum mistökum. Ritnefnd Strandapóstsins.