Strandapósturinn - 01.06.2011, Side 32

30
Eitt haustið þurfti einhverra hluta vegna að slátra hér einu
lambi sem Jóhannes í Vík átti. Ég var sendur með innvolsið úr
því inn að Vík. Blóðið var látið í vömbina og allt hirt. Svona voru
sendiferðirnar á milli bæja.
Mikið labb var stundum að ná í hestana. Þeir sóttu fram í
Bitru og þangað máttum við fara gangandi að leita þeirra. Ef
þeir voru svo ekki þar fórum við labbandi heim. Fyrst þegar
bílarnir komu fældust hestarnir og ruku eitthvað út í loftið.
Sömuleiðis fældust þeir ef heyrðist í flugvél. En flugvélar flugu
oft hér yfir á tímabili. Þetta voru erfiðir tímar með hestana. Einu
sinni fældust hestar hér fyrir sláttuvél. En þeir fóru svo nálægt
torfkofa hér út við hliðið að sláttuvélargreiðan rakst í kofavegg-
inn og allt stóð fast. Þar gátum við losað hestana frá sláttuvélinni
sem var stórskemmd. Mikil voru viðbrigðin þegar dráttarvélin
kom hér 1954 að geta sest á hana og farið að vinna í stað þess að
byrja á því að leita að hestum.
Húsaskipun á túninu þegar ég ólst upp var þannig að fjárhús,
hesthús og hlöður voru á Melnum, fjárhús og hlaða uppi á túni
þar sem grafreiturinn er. Hesthús og hlaða efst á Gimbrahústúni.
Það var fljótlega lagt niður og byggt hesthús og hlaða fyrir fram-
an Smiðjuhólinn. Síðan var fjós, hlaða og haughús á Skollu.
Húsin voru svona dreifð til þess að hægara væri að koma áburð-
inum á túnið.
Stórt eldhús var byggt yfir Norðurlækinn fyrir norðan Skollu.
Lækurinn rann í gegnum húsið í tréstokk og þar var lengi
kornmylla. Í henni var malað korn fyrir heimilið og aðra bæi.
Í húsinu voru þrennar hlóðir fyrir stóra potta. Þarna var þveg-
inn þvottur og skolaður í læknum inni í húsinu. Slátursuða fór
þarna fram á haustin og stundum önnur meiri háttar matarsuða.
Rúgbrauð voru bökuð í hlóðunum og oft hékk hangikjöt uppi
í rjáfri.
Öll húsin sem hér hafa verið nefnd voru með torfveggjum
og torfþaki. Og bærinn sem stóð hér upp á milli lækjanna var
torfbær. Úr þeim bæ var flutt í nýtt timburhús sem stendur á
Bæjarmelnum á þorra árið 1907. Þetta gamla timburhús er nú
mikið breytt frá því það var byggt. Og það var byggt eldhús við
það árið 1947. Og viðbygging úr steinsteypu kom svo árið 1954.
Ég man ekkert eftir gamla bænum sem stóð hér upp á milli