Strandapósturinn - 01.06.2011, Page 95

93
Var ánægjulegt að hitta þau hjónin, Önnu þessa dugmiklu
bóndakonu og alþýðuhetju, sem hafði eignast 14 börn og komið
þeim öllum á legg með miklum sóma, og Kristin, þennan fjöl-
fróða og hyggna Strandabónda, sem trúði áreiðanlega meira á
roðann í austri en margt annað, en þó fyrst og fremst á mátt jarð-
ar og náttúru og réttlæti manna á meðal. Þau voru Strandahjón á
gömlum merg – og það var dýrmætt að eiga þessa stund með
þeim, þó stutt væri.
Síðan var haldið frá Dröngum og við settir á land á Munaðar-
nesi, þar sem Jens á Munaðarnesi stóð í fjöru og tók á móti okkur,
glaður og hress að vanda – með spaugsyrði á vör, náttúrubarnið
og veiðimaðurinn snjalli, eiginmaður Pálínu móðursystur minnar
en þau komu upp 9 börnum á Munaðarnesi og voru mikil sæmd-
arhjón.
Þessu eftirminnilega ferðalagi var nú lokið – ég fékk að sjá
Strandirnar aftur eftir rúma hálfa öld – við ókum svo heim að
Hvoli og vorum komnir þangað að kvöldi dags eftir góða ferð og
eftirminnilega. Strandirnar eru magnaðar, náttúrufegurðin engu
lík og kyrrð og tign umhverfisins hefur sterk áhrif á hug og sál.
Sæmdarhjónin á Dröngum Kristinn Jónsson og Anna Guðjónsdóttir.
Ljósm.: Bragi J. Ingibergsson 1999