Læknablaðið - 01.12.2021, Blaðsíða 47

L ÆKNABL AÐIÐ 2021/107 611
„Stóra mál Læknafélags Reykjavíkur er
samningsleysið við Sjúkratryggingar
Íslands. Við þurfum að finna samningnum
framtíðarfarveg,“ segir Guðmundur Örn
Guðmundsson, nýr starfandi formaður
LR fram að aðalfundi í vor. Hann var áður
varaformaður en tekur nú við af Þórarni
Guðnasyni sem er í leyfi
Bíða eftir skýrum línum
frá yfirvöldum
„Þótt samningsleysið sé efst á baugi snúa
verkefni LR einnig að innra starfi,“ segir
Guðmundur Örn sem starfar sem bæklun-
arskurðlæknir í Orkuhúsinu og auk þess
að starfa við að meta örorku einstaklinga
sem lent hafa í slysum. Verkefnin hafi
undið upp á sig. „En veturinn leggst ágæt-
lega í mig.“
Hann segir að félagsmenn hittist
nokkrum sinnum á ári til að tala um
annað en þref og kjarabaráttu. Hagsmuna-
gæslan sé rík en málum sé nú í meira
mæli útvistað til Læknafélagsins, eins og
til að mynda Lækningaminjasafninu, árs-
hátíð og öðrum félagsstörfum. „Við höfum
verið að straumlínulaga starfsemina.“
En hvernig standa samningsmálin?
Hann segir merki um að viðsemjandinn,
ríkið, vilji standa öðruvísi að samningn-
um en áður. „Það er þó óljóst hvernig.
Ekki hefur verið lagt fram vel afmarkað
skýrt módel, heldur aðeins sagt að gera
eigi hlutina á annan hátt. Það leggst mis-
vel í félagsmenn.“ Guðmundur segir að
þótt venjast megi óvissunni sé hún óþægi-
leg til lengri tíma.
Lítil framlegð af einkarekstri
„Eins og hér í Orkuhúsinu, þar sem eru
tugir starfsmanna, gríðarleg fjárfesting
í húsnæði og búnaði, þá er ekki besta
ástand í heimi að hafa ekki skýra mynd af
því í hvaða rekstrarumhverfi við erum,“
skýrir hann. „Við mætum bara í vinnuna
og tökum við því sem kemur.“
En sér hann fram á að þessi óvissa
eigi eftir að skapa vandræði í rekstri
sjálfstæðra stofa? „Við sáum hvað lokanir
vegna COVID-19 komu áþreifanlega niður
á rekstrinum. Við eigendurnir þurftum
að greiða inn í félagið. Það sýnir hver
framlegðin er.“ Afdrif Domus Medica sem
verður lokað um áramótin gefi innsýn í
rekstur fyrirtækja á heilbrigðissviði. „Fyr-
irtæki í góðu rekstrarumhverfi eru ekki
lögð niður.“
Guðmundur bendir á að rekstur sjálf-
stætt starfandi lækna sé að flækjast. Kröf-
urnar verði sífellt meiri. „Við verðum að
hafa tölvubúnað í hýsingu til að tryggja
öryggi, hafa persónuverndarfulltrúa, skrá
þjónustuna og senda skýrslur til land-
læknis, sem dæmi. Allskonar nýtilkomnir
þættir sem ekki voru til staðar þegar upp-
runalega gjaldskráin var teiknuð upp,“
segir hann. „Veruleikinn er nýr og það
virðist ekki alltaf vera skilningur á því.“
Guðmundur lýsir því hvernig sjálfstætt
starfandi læknar hafi slitið viðræðum við
SÍ í aðdraganda kosninga. Samstaða sé
um að hefja þær ekki að nýju fyrr en ný
ríkisstjórn taki við taumunum og línurnar
skýrist. „Enn er sama staða og fyrir kosn-
ingar og því ekki vitað hverjar áherslurn-
ar verða.“ Margir félagsmenn séu þeirrar
skoðunar að lítill ávinningur væri af frek-
ari samningaviðræðum.
„Þessir félagsmenn eru hvekktir vegna
þess hvernig staðið var að málum þegar
samningur gilti. Lokað var fyrir nýliðun
og læknar sem höfðu hug á að koma heim
og vinna lentu í málaþrefi.“ Félagsmenn
séu því varkárir og bíði skýrrar sýnar.
„Læknafélagið er að velta vöngum yfir
því hvað er skynsamlegt að gera á meðan
við fáum ekki skýrari merki hinum megin
frá,“ segir hann.
Samstaða meðal félagsmanna
Læknafélag Reykjavíkur er eitt stærsta að-
ildarfélag Læknafélagsins með 490 félags-
menn. Guðmundur segir hópinn virkan.
Samstaða ríki sem sjáist á þeim einhug
sem birtist þegar samningaviðræðunum
var slitið.
En hvers vegna tekur hann þátt í
félagsstörfum? Guðmundur segir að
Ragnar Jónsson, sem var formaður Félags
íslenskra bæklunarlækna, hafi beðið hann
að koma í samninganefndina fyrir það
félag. „Ég fór í kjölfarið í samninganefnd
LR.“
En af hverju er hann læknir? Hann var
ungur og ómótaður og elti félaga sína í
námið. Enginn læknir er í fjölskyldunni.
„Það var tilviljun. „En ég byrjaði og gekk
ágætlega þannig að þá var bara að halda
áfram,“ segir hann.
En af hverju þessi sérgrein? „Margt
kom til greina en einhvern veginn komu
bæklunarlækningar upp.“ Aðgerðir hafi
heillað hann og að vinna með höndunum.
„Það brýtur upp flæðið. Svo vann ég á
Borgarspítalanum og þar var fagið mjög
sýnilegt.“
Guðmundur Örn Guðmundsson, bæklunarskurðlækn-
ir í Orkuhúsinu, er starfandi formaður Læknafélags
Reykjavíkur. Hér er hann á einni skurðstofunni í lok
vinnudags. Mynd/gag