AVS. Arkitektúr verktækni skipulag - 01.06.1994, Blaðsíða 48

HÖSKULDUR JÓNSSON FORSTJÓRI
Stefna ÁTVR
Aundanförnum 5 árum hefur verslunum
ÁTVR fjölgað úr 12 í 21. En verslununum
hefur ekki aðeins fjölgað. Allar eru þær
nú betur búnar tækjum en áður, flestar
orðnar kjörbúðir og meirihluti þeirra hefur fengið nýjan
svip, yfirbragð sem til skamms tíma var ekki talið við
hæfi áfengisverslana.
ÁTVR selur vöru sína dýrt. Flestir þurfa að leggja í
nokkra fyrirhöfn við að nálgast vöruna. Við kaupin
greiða þeir hærri skatt en þekkist í nokkrum öðrum
viðskiptum. Með þessar staðreyndir í huga hefur sú
stefna verið mótuð að verslanir ÁTVR og aðrar
starfsstöðvar hennar séu ekki óásjálegri en almennt
tíðkast hjá verslunarfyrirtækjum og jafnvel eigi ÁTVR
að vera skrefinu á undan.
Þrír hönnuðir hafa mótað flestar verslanir ÁTVR:
arkitektarnir Karl Rocksén og Pálmar Kristmundsson
og Finnur Fróðason, innanhússarkitekt. Fljá því verður
ekki komist í viðskiptum við hönnuð að verkkaupi
leggi áherslu á góða nýtingu húsrýmis og óhindraða
rás vöru frá móttöku og til þess er viðskiptavinur ber
hana burt með sér. Vegna eðlis vöru ÁTVR og sjálfs-
afgreiðslu á vörunni verður hönnuður einnig að taka
fullt tillit til þeirrar nauðsynjar að starfsmenn hafi góða
yfirsýn yfir flest það sem fram fer innan verslunarinnar.
Að slepptum þessum höfuðreglum hefur ÁTVR boðið
hönnuði að setja þann svip á verk sitt sem hann teldi
að yrði honum og ÁTVR til sóma. Meginmarkmiðið
er að verslunin, veggir hennar og loft, afgreiðsluborð
og hillur hlaðnar vörum, myndi heildarsvip sem
viðskiptavini finnst vert að virða fyrir sér um leið og
hann verslar. Kaupandanum má gjarnan finnast að í
svona verslun hljóti að vera góðar vörur. Með þetta í
huga er eðlilegt að val og uppsetning listaverka, sem
prýða eiga verslanir, sé í samráði við hönnuð.
Það er lán ÁTVR, að fjármálaráðuneytið og fjárlaga-
nefnd hafa tekið undir sjónarmið ÁTVR hvað snertir
húsakost fyrirtækisins og búnað. ÁTVR hefur ekki
verið boðið að leita ódýrustu lausna. Vafalaust væri
unnt í skjóli einkaréttar að dreifa áfengi og tóbaki úr
tjöldum. En sá réttur væri hróplegur óréttur yrði
honum beitt þannig, að allt annað sé aumt hjá rétt-
hafa en það verð, sem viðskiptavinurinn þarf að
greiða fyrir vöruna. Vegna ástands efnahagsmála og
hugmynda um breytingar á verksviði ÁTVR hefur að
undanförnu verið leitað ódýrari lausna við að hýsa
vínbúðir og búa þær innréttingum en gert hefur verið
á undanförnum árum. ■
46